HIBRU 9 - Akthar Trongirhna (BSI)

Thalei Khatkho Ringramtu vei Mathruun

¹ Ipek matsah trongirhna phaova mathruunna khatkho thaleitu vei akseengmun rella anijoom veia am.

² Alamva ramuk inkhat amchaangpei, apaaltongah meitaarna akeh, tebor, mahche Katna tol am; mah ita Akseeng Amun an ong.

³ Innih tihpi injaarpuun aknungtonga Akseeng chungleh Akseengta an ong thiilkhat am.

⁴ Ra–ao vaa amrimtuui haalna thiilla mahche ra–ao in apumte athlom trongirhnavaa pheichep am, asuung khanna manna anthunna ra–aobel, adoonsuun Aaron vaa sungrolh, mahche trongirhnavaa lungpep am;

⁵ pheichep achunga paarthravaa mahche Cherubim innih in rilvoltheihna phomta malih a am. Mah naamte irella ipek inih in invuia trong cheknohme.

⁶ Amah i nga tloh a amchaangpei, thiimpu mahche ankatthlou tlohnatu thiil asuungah injomma luutei,

⁷ chuta innih tihpi asuungtong thiilva akthloi thiimpu khopin kumma veikhat ruta luutning, amah atak turella mahche mii in ansoi anlaalta katnatu thii masuuknoh avah luutnoh ei.

⁸ Onna Li Akseeng in amtheihnatu apaaltong ramuk injaarpuunna amsoot akseeng amunkhan luutnatu lamkha mahoong nohmang.

⁹ (Maiva ipek chuptu khudamta ammuhna.) Mah amchaangi aknujuih akutthollei mahche inthiimna pootkat in amahta amthruunmii antak achim chimnoh romna rilkha mapung mapha cheknoh,

¹⁰ chuta anmahva saak iintuva, aje ajea inchaamnatu mahchuva, akthranohtu hoong anthlengna lai aphahnohmiil ruungtu vei anijoomta amthlohna ningei.

¹¹ Chuta Khrista in ralla liin mahche ralla mapungpha ramuk (kut a inseeemnoh, inseemche poot inoh a,) chuta akthlengsam akthra ei amaram rella akthloi thiimpu veia Khrista in andangin.

¹² Kel khatkho siiltevaa athiinoh a, amah ataktalvaa athii in ache amnoh inthlokha iphahpei, Akseeng Amunkhanna achenatu amtu veia mii naamte turella veikhat ruta luutning.

¹³ Alamva kel khatkho siilchalvaa athii mahche siil aruul anhaalna avaanta akseengnoh ei anchunga thinna ruung maseengnatu tlohve;

¹⁴ ache amnoh Li vaa apaalla Ringpu kuungah maraal amnoh ataktalta inkat Khrista vaa athii khanna, akring Ringpu ta routlohnatu, akthi thlounata inihva chim chimnoh romna rilta jikcha ralla nanimseeng ume.

¹⁵ Alamchunna amah in akthar trongirhnava amahchusa, matsah trongirhna athlanga anmahvaa anleh eita thloknatu amah in thisa, mah i trongchetvaa ache amnoh inphahtu phuta amah in aongmii in anphahnatu relna.

¹⁶ Alamva trongirhnata jaole, trongirhnata akseem amahvaa amramta amthruhtu.

¹⁷ Alamva trongirhna akseem mii in aringsootva akanana amnoh. Athihche apangkal amning.

¹⁸ Oirella matsahna trongirhna khakho thii jaonoh a injana thlennoh.

¹⁹ Alamva trongthuunvaa trongsuur rella mii naamte kuungah asonlai, amah in siil khatkho kelvaa athii tuii khatkho samul in aang khatkho, hissopta, nirik mahche mii naamte anchunga akthinei.

²⁰ Amah in ason, “Mah i Ringpu in nannih nankuungah trongthuunta nanimlan trongirhna thii khasa.”

²¹ Mahchunanga ramuk mahche mathruunna ah anhuuina beel anaamte amah in thii ah akthin.

²² Atak a trongsuur nujuih a bilam naamte thii in amseeng mahche thiinoh avah aleh ipcheknoh.

Khrista in Aleh Alohpei

²³ Nga tloh a ringramma am poot eisoh intrim eikhata maseengnatu poot inkatnoh janoh. Chuta ringramma am poottal khanna mahchunga ralla akthra inthimna vei.

²⁴ Alamva akchimsoh intrim, kut a inseem akseeng amunna Khrista in luutnoh, chuta inih ingut a amah in Ringpu kuungah angirhnatu, ringramma luutsa.

²⁵ Akthloi thiimpu in Akseeng Amunkhanna atak tanoh thii maruuia kumrel luut khananga ataktalta inleng inlenga akatnatu luutnoh;

²⁶ chulehva tukleiram mathron lainata amah in inleng inlenga klah knang adoutu tla. Chuta oinang chupva achena invah amah ataktal inthiimna veia inkat apaalla aleh alohnatu veikhatru indangsa.

²⁷ Che mii in veikhat thitu, mahche aknua pichaar thlengtu.

²⁸ Chunna Khrista in mii naamte anlehta phurhnatu veikhat inkat taningvah, veinih tihpi athlenglaiva alehrella matelnohtu, chuta amahta ngaaklipnoh a angaak eita akalnatuei.