HIBRU 7 - Akthar Trongirhna (BSI)

Melkhijedek Thiimpu

¹ Mairella Salem vaa kurung, Akthloirem Ringpu vaa thiimpu kurungeita seh a athatche inlenga Abraham ta intuukpia doi amlan;

² che Abraham in aphah anaam somsuungah inn khat akuungah amlan matsahrem amahminga arthava akchimlamsevaa kurung, mahche mah i Salem vaa kurung vei, mah chuvah leh-oi vaa kurung.

³ Amahvah apa nohle anu nohle anthohna amnoh, anthohna akni mathronna che achena nohle chaan achena amnoh, chuta Ringpu vaa Asa kupa nanga, amah in inpotnoh luunga ache amnohtu Thiimpu vei.

⁴ Amah i chapcha a liin tih a romve! Inthohna pa pu Abraham in kmaang kaa ralnata athlen pootnata somma inkhat amah kuungah amlan.

⁵ Thiimpu phom akphah Levi vaa asa kupa eiin trongthuun nujuih a mii ningnata, tihva Abraham nata thleng anmah unaoei tingnata somsuungah inkhat lohnatu jathang aphahpei.

⁶ Chuta anmah anthohnasoh inchunnoh anmah in Abraham nata somma inkhat aphahpei mahche trongchet ak am amahta doi amlanpei.

⁷ Achungbebna mii in athlangna miita doi malan tih i inkharhna phunoh.

⁸ Onna kthi nai mii in somma inkhat anphah; mah khanna inkhat in amahvah ringsangta sakhi amlan.

⁹ Tukhat in son aja, mah chuvah somma inkhat akphah Levital in Abraham apaalla somma inkhat amlanpei,

¹⁰ alamva Melkhijedek in Abraham ta anmuhpilai Levi vah poknohmang.

¹¹ Ipekva Levi innsuung tingna in thiimpu anvei apaalla mapuungpha veileva (alamva anmah in thiimpu anvei athlanga mii eiin trongsuur anphah) Aaron aknu noh a, Melkhijedek vaa athlanga aktlei thiimpu inkhat anthruhnatu jangdarkaar ammangme?

¹² Alamva thiimpu thloukha amthlenglaia, trongsuurkho inthlengtu tlasa.

¹³ Alamva mah irella aktlei jatih ah trongsa, amah jatihna akthleng tukhat inkho thiilkuunga rou tlohnohmang.

¹⁴ Alamva Judah jatih nata inih Akpu in thlengsa tih i taksa, che mah jatihna thiimpu eisoh jangkhatkho sonnoh.

Melkhijedek nang Aktlei Thiimpu

¹⁵ Mah i Melkhijedek nangjim aktlei thiimpu inkhat inthruhleva onna ralla akseeng sakhi veitu,

¹⁶ amahva ruungtu vei trongsuur aknujuih a thiimpu veia thlengnoh chuta ache amnoh maangcheknoh chaanvaa tuui aknujuih a thiimpu hukveisa,

¹⁷ Alamva mah irella sakhisa, “Nangvah Melkhijedek amathanga ache amnoh thiimpu sache.”

¹⁸ Inkhattinga matsahna trongthuunkha marnop che kanana amnohrella amngeihpei; inkhattinga, ralla akthra matuurna inkhat amthruhpei, mahchu apaalla Ringpu ting inih in innaisame

¹⁹ (alamva trongsuur in jakhatkho mapung maphanoh); inkhattinga, ralla akthra matuurna inkhat amthruhpei, mahchu apaalla Ringpu ting inih in innaisame.

²⁰ Che mah i trongchet injaonoh veinoh.

²¹ Amaana thiimpu eiva trongchet lounoh a thlou antloh, chuta amahva trongchet louva thlou atloh, “Akpu in trongchet alohpei, mahche aril inthlengnatu, ‘Nangva ache amnoh thiimpu khache.’ ”

²² Mahchu nujuih a Jisu in ralla akthra trongirhna veisa.

²³ Matsah avah thiimpu anmasing khalmo tammei, alamva kthi in anmahsoh inngainoh a amtaningva thloutloh athing;

²⁴ chuta amah thiimpu thlouta inngainoh a matuh a am, alamva amahva ache amnoh a dongnoh a am.

²⁵ Chunanga amah apaalla Ringpu kuung innaia akluut eita lai amrel amah in kal achek ei, alamva anmah turella lai amrel amah in ngenna am.

²⁶ Alamva oinang akseeng, amraal amnoh, atak amnoh, aleh ak amnata aje, che amahva ringram chunga liin akthloi thiimpu inih turella matikchasa.

²⁷ Aktlei akthloi thiimpu nanga, anirel inthiimna pootkat, matsah anmah alehrella, aktlei mii rella; amahkuunga darkaar amnoh; amah ataktalta ankatlaia amah in miinaante turella inkatsa.

²⁸ Tak a marnop mii eita trongsuur in akthloi thiimpu veia athunpei, chuta trongsuur aknu avah trongchetna trongkhanna ache amnoh mapung akpha Asa kupata akthloi thiimpu veia athunpei.