HIBRU 6 - Akthar Trongirhna (BSI)

¹ Alamchunna Khrista turella matsah matheihnakha mathlahrei che inih in mapungpha tongah sehrei, Ringpu tingah malotnatu rilthlenga veikhat akthithloua innmun linnohrei;

² miichungah kutsih, thii ah inlup matheihna rella, mahche ache amnoh pichaar amunna veikhat inlengna tlohnohrei.

³ Che Ringpu inta mah i jale inih in itlohtu.

⁴ Alamva tukhat in akvaar aphahche veikhat rilthleng tih i veinohtupot. Tukhat in atuui amta, Li Akseengah chuum amjajouche,

⁵ Ringpu vaa akthratrong mahche akthlengsam chupvaa tuuieita amlenche, anmah in antheihchekvah,

⁶ anmahta veikhat inlenga anrilthlenga phah a matharnatu tloh veinohtupot; alamva anmah in Ringpu vaa Asa kupata anmah rella thingkharh a mathlua amahta indanglonga injak amiphah.

⁷ Alamva tukleichunga injoomma khusuura khutuiita a iin, che chi aklin in anmah turella thra anru saru masuuk a tuklei in Ringpu vaa doi aphah.

⁸ Chuta tuklei in kulingta moongle kanana amnoh, phool aphahnatu innaisa, che achena avah mahkha mei inhaal usa.

⁹ Kannih in nga tloh a trong sunglakho, unaoeio, nannih rella akthra mah chuvah chaanringtu veieita kannih in kamilot.

¹⁰ Akseeng mii ankuungah nannih in rilvol mamuh a rou nantlohthlou i romnoh tlohnohve, tloh akho amchou, alamva Ringpu vah akchimnoh khonoh. Mah khanna amahningah rilvol namimuhpei.

¹¹ Nannih in namituurkha achena phah a inlitnoh a nannih in namiveinatu mah i kannih in kandit.

¹² Chunna nannih in nantalnohnatu chuta malot khatkho doutrang apaalla trongchet akphah ei anhoongta amijuih.

Inlitnoh Tupot Ringpu vaa Trongchet

¹³ Alamva Ringpu in Abraham kuungah trongchet amlanlai, ralla akliin tukhatva ming amnohrella, amah ataktal mingta sonna trongchet tloh a,

¹⁴ Ason, “Inlitnoh a keiin nangta doi kimlan uche che kamphorh uche.”

¹⁵ Mahche nga tloh a Abraham in doutrang trongchet aphah.

¹⁶ Alamva mii in tak a anmahchungah akliin tukhat chunga loonna trongchet antloh, anmahchuva trongkharh naamte trongchet in achena vei.

¹⁷ Nga tloh a Ringpu vaa matheihjanoh amdon trongchet akphah lalchun ankuungh ralla khalmo ammuhja hanga amahvaa trongchet in narra amjaphu veisa,

¹⁸ Ringpu in innihtu iluutna phahnatu akjon inih in amah kuungah am matuur khata trong phahnatu inthleng janohthlou inih ipaalla mah chuvah Ringpu in machinthi tih i veinohtrong inih tronga masoh iphahnatu.

¹⁹ Injaarpuun akli a iluutna nanga inihtu inlitnoh mahche incheknoh imtuur am.

²⁰ Melkhijedek aknua mah khanna Jisu in akthloi thiimpu, inih turella matsah a lousehsa.