HIBRU 5 - Akthar Trongirhna (BSI)

¹ Alamva amah in alehrella kutthol malannatu, che ikattuphu katnatu Ringpu tu vei thloua miingut a miikaarnata charra Akthloi thiimpu rella thlou anthunpei.

² Theihnoh singnoh eita mahche invaia akseh eita amah in rilvoltheih a daikenga am anchek, alamva amah atakluungkho marnop in hiilla asih.

³ Mairella anmah anleh che miivaa anlehrella inthiimna ah inkatpoot vei.

⁴ Che tukhat inkho injahna phommi ataktalin lounoh, chuta Aronta aongnanga Ringpu in amahkho aong.

⁵ Chunna Khrista atak in akliin thiimpu ahukveinata atak akroua inkaanga indomnoh, chuta acharmii in akuungah ason, “Nangi Kisa kupache, mi in nangta kpokpeiche;”

⁶ Aktlei amunkhat asonnanga, Melkhijedek aknua “Nangva ache amnoh thiimpuche.”

⁷ Amah aruung ringnga amlai, Jisu in athihnata amahta akalchek amah kuungah ahousuuk a traptuuia mahche akthli suuksoh inruuia angen khatkho anool, che amah in trih a Akputa amlot taningva amah in angenkha atheihpei.

⁸ Amah in Asa kupa veislakho, klah knang atho apaalla trongson majuih theihsa.

⁹ Che amah in mapuungpha veia, asonta amjuih mii naamte turella amah in ache amnoh chaanringvaa anthruhna veisa,

¹⁰ Melkhijedek nata amahta Ringpu in akliin thiimpu amveipei.

Malotta Mathlahnoh natu Mathrit

¹¹ Mairella kannih in klukanga anvui kansontu tam am, chuta nannih in rungai mahche aklou theihnohchou.

¹² Alamva pekpek nannih i lulok veiphu sachou, chuta Ringpu trong matsahrem amuveikha tunangkhat in nankuunga veikhat inlenga nannihta nanimtheihnatu darkaarmang. Nannih in aktrang saakphunoh a, siilchuh darkaar mangchou.

¹³ Alamva siilchuh ruta saa a akring mii in akchimlamseh relna tronga rom taknohmang, alamva amahva naomang.

¹⁴ Chuta aktrang saakphuvah mapungpha mii turelna, alamva akthra thranoh alamma amtheihchek miiturelvah thra thranoh threknatu akroua insuul.