HIBRU 12 - Akthar Trongirhna (BSI)

Inih Ipa Ringpu

¹ Alamchunna vachah inrol sakhivaa sumphai in inihta inikooi taningva, inih inkho akriknata mahche inihsoh akmaar alehnata inlitrei, mahche inih in insuul tranga inih imaa a tlaan insinkhanna tlaanrei,

² inih in imlotta lam amhoong che maita mapung ampha Jisu ta anna, ameel amaikuungah asih roomthok kharella thingkharhta thoa, injakta usitnoh a Ringpu vaa phompii akchangtonga inboksa.

³ Aleh ammei tingnata oinanga amahta andah a nannih in kmon nohle ril inlengnoh uchou.

⁴ Nannih in alehta indenpia tranga insuulpi i, nanthii tlakna phah avah nannih in indenpinoh mangchou.

⁵ Che Asa kupa ankuungah atrongnanga nankuungah bungthokna trongkha namilot peime? – “Kisakupa, Akpu in nanichaakha inleouva lounohro, che amah in nangta tandi naktloh, niril malengnohro.

⁶ Alamva Akpu in aril amvol miita amtheih, che amah in aja mii Asa kupa relta saalla akchaak.”

⁷ Nannihta matheih a nanichaakha Ringpu in amah asa kupaei nanga nanimdon relna; alamva apa in amtheihnoh tunang amme?

⁸ Nannih in amjou nanphahche, nannihta matheihnoh a nanimahle nannihva asa kupa noh sachou, slam asasachou.

⁹ Oichunga inihta inimtheih thaleitu Ipa louamei che anmahta inih in injahme, inih in ralla livaa ipaeita anthlanga ringnoh umeme?

¹⁰ Alamva anmah in anpelna tih a kakturel inihta inimtheih inichaak; chuta inihtu athratnatu ta amah in inimtheih, chunna inih in amah akseeng chuumma ijaonatu.

¹¹ Inimtheih inichaak naamte kaktu apelnanoh ohchungut a lahna vei; aknua mah i apaalla tamma romma theih akphah ankuunga akchim lamsehevaa leh oi akrah amvei.

Matheihna Khatkho Chaakna

¹² Alamchunna nikutkhamta domro che marnop nikutta matrangro,

¹³ Nannih nankeh turella lam intrimma seemve, chunna kehtlik in lamma ankeh threinohtuei chuta athratnatu.

¹⁴ Leh oi mahche akseeng turella mii naamtesoh insuulve, che akseeng injanoh tukhat inkho Akputa muhnohtu.

¹⁵ Tukhat inkho Ringpu vaa malungsita phahnoh aveinoh natu mah i romve; mahchuva, “Inkhah akjung” asuunnoh natu che nannihta nanivot nanohtu, mah in mii chah chahta ambuur;

¹⁶ tunangkhat inkho ahoong chimnoh nohle heikoh chelnoh charra inkhatru turella apoklai pipatu aphahtuphuta akjuur Esau nanga amlotnoh veinohve.

¹⁷ Alamva aknua nannih in nanrom amah in doipha anditta anmah in indahsa, alamva, amah in ruithli luunga jonsalakho aril thlengnatu tancha phahnohsa.

¹⁸ Alamva pal aja antruung mei, inthim, indum, khur, thli, inthimma indum khu thli,

¹⁹ ipekva ahou mahche tukhatva tronghou khata aktheih mii in ankuunga trongraannoh natu.

²⁰ Alamva, “Sa luungin muulkhata palle mahkha lunga denve,” tih a jathang inpekha anmah in doucheknoh ei.

²¹ Amuhkha maichah phah intritna vei, mah chuvah Moses in ason, “Keiin trih a inchuunsang.”

²² Chuta nannih in Jion muulla mahche akring Ringpu vaa khuuboomma, ringramna Jerusalem, teen icheknoh ringroiei ujouhoong inboomna ah thlengsachou,

²³ ringramma ming inthun matsah akpok annaam inboomna, che anaamteta pichaar akthloh Ringpu kuungah, mahche mapung amphache li a,

²⁴ akthar trongjih nata amtuuk Jisu che Abel athiichunga thloia malungsi atrong inthinna thii thlengsa.

²⁵ Romve aktrong amahta nannih in indahnohchou. Alamva ringramma inichaak amahta indah a itlaanchunga thaleia inichaak amahta indah a tlaannoh in ralla inleusa.

²⁶ Amah ahouin thalei inloksa, chuta pekva amah in trongchet athlenpei, “Keiin veikhatla thalei khopta loknoh a ringramkho kiklok.”

²⁷ Mahtrongin “Veikhatla” seenga amtheihnava, inlok aja aseempot naamteva alohjoktu, onna inlokcheknoh pot in incheknoh a amtu.

²⁸ Alamchunna inlokcheknoh kurung huunnata inih in iphahtaningvah inih inn turella atlokhaan roomthok a mahkuungah malanrei, chunna inih in Ringpu in lou aja thloukha katrei nga tloh a injahsoh intrihsoh inruui athloua Ringpu kuung inkatrei;

²⁹ Alamva inih Ringpu va matumkhem akchek intruung mei.