HIBRU 10 - Akthar Trongirhna (BSI)

¹ Alamva trongsuurvah akthlengsam akthra pootvaa aniim taningva, che poot khavah aksuuk tupotvaa akchim hoongvanoh, anmah in injomma kumrel ankatpoot akhanna, amah kuungah annaieita tiknikho mapung mapha cheknoh.

² Mah inta chekleva anmah in inthiimna poot ankatkho inngaihnoh tueime? Ringpu amthruun eita veikhat ah masseengkhem sleva anmah in anleh kharella klukanga madonnoh tuei ta.

³ Chuleva inthiimna inkatpoot khan a kumrel anmah anlehta intheihtuei.

⁴ Alamva siilchal khatkho kel athii in aleh alohcheknatu veinohtu thlou.

⁵ Mairella Khrista in tukleiramma athlenglai amah in ason, “Inthiimna poot mahche inkatpoot eita nangin dinohsache, chuta kei turella nangin ruungkhat nimchaangpei;

⁶ mei inhaalla inkatpoot mahche alehrella inkatpoot ah nangin pelnohsache.

⁷ Chunna, keiin kisonpei, ‘Anve, nirik injuulkhanna kei turella injih khananga Ringpu o, nangin nimdonta kitlohnatu kei thlengsang.’ ”

⁸ Achungah mah in asonla i, “Inthiimna poot khatkho inkatpoot, mei haalla inkatpoot mahche alehrella inkatpoot nangin dinohsache che amah khanna nangin niril pelnohsache.” (Mahchu trongsuur in asonta majuih a ankatning),

⁹ chunna amah in daak a ason, “Anve, nangin nimdonta kitloknatu keiin thlengsang.” Amah in innih tihpita amthruhnatu matsah nata amdongpei.

¹⁰ Jisu Khrista vaa aruungta ache amnohtu veia veikhat ruta akat apaalla inihta iniimseengi amah in akdit talsa.

¹¹ Mahche thiimpurel in anirel ngirra rou antloh, che intrimbeng inkat pootta inleng inlenga ankat, amah inkatpoot invah tiknikho alehta louvah cheknoh.

¹² Chuta Khrista invah ache amnohtu veia alehrella inthiimna poot veikhat ruta inkal phah a, Ringpu akchangtonga inboksa,

¹³ chunna amah jeknaeita akehmaja a akchilnatu ngaak a am.

¹⁴ Alamva amah in veikhat ruta kat a amseengei khanna ache amnohtu veia mapung amphapei.

¹⁵ Che Akseeng Li inkho inihta sakhi inimlan; mah i asonpei,

¹⁶ “Mah aknieichu aknua Akpu in ason: ‘Anmahsoh kiseemsam trongirhnakha maisa, kei trongsuurta anmah amilunga mahche anrilla kimjihtu.’ ”

¹⁷ Chela amah in daak a ason, “Keiin anmah anleh eita mahche anmah in chimnoh antlohthlouta veikhat intheih tlohnoh usang.”

¹⁸ Amah inta in ip eileva, alehrella veikhat inlenga katnatu amnohsa.

Ringpu Kuung Innairasei

¹⁹ Alamchunna unaoeio, Jisu vaa athii apaalla akseengmun akhanna inih in iluutna amtaningvah,

²⁰ injaarpuun apaalla mah chuvah amah aruung apaalla inih turella akthar khatkho akringlam amhoongpei,

²¹ che Ringpu vaa inn achungah inihtu akthloi thiimpu doontaning meva,

²² inihvaa ithratnoh chim chimnoh maromna imlungta thii thinna tlen mahche inih iruungta akseeng tuiia chaam, malottrang veia ril chimsoh inruuia amahting innai reio.

²³ Inih in amah kuungah matuura iphoongta incheknoh a chet a matuhrei, alamva trongchet inimlan amahvah malot aja;

²⁴ che rilvolla mahche akthra thlou a inih in khatleh khat inthoknatu madonrei,

²⁵ mii arouin anchangna khananga inih in intuukjoua inchunjouvah, thousanoh tlohnohrei, chuta Aknikha knaisa ta nannih in nanmuhnanga inih in khatleh khat iril insohjourei.

²⁶ Alamva inih in akchim khiialta iphahnua rom romma aleh tlohmele, aleh turella veikhat inkattuphu amnoh.

²⁷ Chuta pichaarturel intritna, mahche jeknaeita ramkhemma ahaalnatu malunghaangkha am.

²⁸ Moses trongsuurta akkhoi mii in mii innih nohle inthumvaa sakhi a rilvolna phahnoh a thi.

²⁹ Ringpu Asa kupata keh a chiil, amahta maseengna trongirhna thiita mabuur khatkho malungsi inimlan Li ta injak mapha miikhan khalmo salsina pichaar tandi phah i matikcha ta nannih in madonnoh choume?

³⁰ Alamva ngata akson mii i inih in irom, “Athunglou keita, keiin athung kilohtu.” Che khatla ason, “Akpuin amah amiita pichaar atlohtu.”

³¹ Akring Ringpu akut a tla i trihkhop nasa.

³² Chuta nannihta nanimvaarche aknua nannih in nantloh matsahna aknieikha intheihve,

³³ nannihta akaar akaara miimai kuungah injak nanimphah mahche klah knang nanimphah che akaar akaara oinanga nanichut mii eisoh nannih in chuum nanjajoula.

³⁴ Alamva nannih in simma ammeita nanringvol, alamva nannih in ralla akthra amtu nanrom, che ache amnoh a incheknoh a am,

³⁵ Alamchunna khalmo inroolkhaan nanphahsamkha nannih in namilotkha lonnohve.

³⁶ Alamva nannih in Ringpu amdonta tloh a, trongchet khata nanphahnatu nannih in doutrangve.

³⁷ “Alamva kak amche akthlengsam amah in thlengtu, che thilnohtu.

³⁸ Chuta akchimmii in amilot apaalla ringtu chuta tukhat inta aknung inlengle, kei kikli in amah atakchunga pelnohtung.”

³⁹ Chuta inihvah maangna ah tla iknungtingah inleng miinohme, chuta inih in imlot apaalla inkal akphah miime.