EPHESIA 5 - Akthar Trongirhna (BSI)

Akvaara Ring

¹ Alamchunna rilvolna naoei nanga Ringpu ahoongta amjuih veive.

² Che Khrista in inihta inirilvol peia Ringpu kuungah amah ataktalta amrimtui malanna che inkatpoot veia inih turella atakta amlannanga rilvolkhanna sehve.

³ Akseeng mii turella matikcha nanveinanga, nannih nankaara changvaangnoh kumei kupain thranoh lamma seh mahche apumtea seengnoh, nohle ralla kidi i nankaar ah akming luungkho sonnohve.

⁴ Akmot miihoongah thranoh a trong, nohle asiimsaam trongi trongnohve, mainangei i matik chanoh sengei mahchungut a mapaakna trong veiso.

⁵ Mah i nannih in thra romve, kumei kupa ah thranoh akseh mii, nohle akseengnoh mii, nohle ralla kidi (mah chuvah leili amthruun mii), tukhat inkho Khrista mahche Ringpu vaa kurung huunna ah anphahtuphu jakhatkho amnoh.

⁶ Tukhat inkho nannihta apupa trongah nanisimna nohso; alamva oirella sonmajuih naoei anchungah Ringpu in trihkhop amlunghaangkha thleng.

⁷ Alamchunna anmahsoh inchunohve,

⁸ alamva nannihvah amaa laikhat avah anthim veichou, chuta pekvah Akpu kurung ningah akvaar veisachou; akvaarvaa asa ei nanga sehve

⁹ (alamva akvaarvaa akrahvah, akchimlamseh mahche akchim ankaara am).

¹⁰ Akpu ta mapelnatu romve.

¹¹ Inthimma akrah amnoh thlou khanna akhol veinohve. Chuta mahchu ngut a anmah kuungah akvaar madangve.

¹² Alamva anmah in inruk a antlohthlouta antrong inkho injakna veiei;

¹³ chuta akvaar ah iphoulaiva bilam naamte muh ichek, alamvah muh ichek naamte akvaarvaa apaalna.

¹⁴ Alamchuna mah i asonpei, “Inthourosa ak in nango, che akthinata inthourosa, che Khrista in nangkuungah akvaar namlantu.”

¹⁵ Nannih in singnoh mii nanga veinohve, chuta aksing mii nanga veive, khatloh a seh ungme tih a cheksilve,

¹⁶ laita thra huuinatheihve, alamva akni i thranoh.

¹⁷ Alamchunna kmong veinohve, chuta Akpu in amdonchu jangme romve,

¹⁸ nannih in tuiibuh inruiinohve, alamva mah khanna thranoh hoinoh asuukna am; chuta Li ah sipve,

¹⁹ nannih in khatleh khat leila, laa, mathruunna laa, litu vei laa naril pumtesoh inruuia rilvolna houa Akpu ting laa tlohve,

²⁰ bilam turella inih Akpu Jisu Khrista mingah Pa Ringpu kuungah lai amrel mapaakve.

Amsal leh Akmei

²¹ Khrista ta injahsoh inruuia nannih inkhatin khat aliah amve.

²² Kumei eio, Akpu aliah nan am nanga, nannih inkho namisal li ah amve.

²³ Alamva Khrista in khaklatu akang aveinangah amsal in akmeitu akangsa. Che ataktal in inikal Akpu sa.

²⁴ Khakla in Khrista aliah ringnanga, akmei inkho mahchunanga bilamma anmah amisal li ah ammeiso.

²⁵ Khrista in khakla ta arilvolla atakta amlannanga, amsal eio, nannih nanmeita rilvolve,

²⁶ mahchuvah trongsoh inruuia tuiia chamma khatlata akseeng aveinatu amah in amseeng,

²⁷ mahchuvah khakla ta antriilnamun daak nohle anhuuinanoh nohle oinang jakhatkho jaonoh a, mahchuvah seenga mahche malaalna jakhtakho amnoh a khalmo akthra maveia khakla ta malanna turelna.

²⁸ Nga tloh a amsallei inkho anmah aruungtak nanga nanmeita rilvolve. Anmah anmeita arilvol mii in amah atakta arilvol.

²⁹ Alamva tukhat inkho tiknikho amah ataksaak aruungta intirhnoh, chuta Khrista inkho khakla ta ajoknatu, amah inkho aruungta masaak ma iinna ajok.

³⁰ Alamvah inihvah amah aruungvaa akholsame.

³¹ “Oirella kupa in anu apa mathlah a amah akmeisoh inthlop tupotei, che anmah innih in ruung khalek vei tupotei.”

³² Mah anthup trongi romna ksi, mah i keiin Khrista khatkho khakla rella trongang,

³³ Chulata miirel in ataktal nanga akmeita arilvolso mahche akmei in amsalta injahso.