EPHESIA 3 - Akthar Trongirhna (BSI)

Jental Turelna Paul Athlou

¹ Oirella nannih Jental nanngut ah Khrista Jisu trongta raanna turel simma am Paul keiin–

² nannih turella keikuungah amlan Ringpu vaa malungsi thlouta marelnatu kikuungah kamsil angkha mairella nannih in tak a nantheihpei,

³ khatloh a anthup trongta keikuungah madanga kamrom angme tihrella keiin chombeb a kamjihnanga.

⁴ Maita nanpaalai keiin Khrista vaa anthup trongta kirom tih a nannih in room nanchektu,

⁵ mah anthup trongi aktlei ringnatluun miisa eitingvah roumaromnoh, pekvah Li vaa apaalla amah raangroi ankuungah mahche ringraanei ankuungah amdangpei;

⁶ mahchuvah akthratrong apaalla Jental eiin lalchun veijousei, che ruungah inkhat veijousei, mahche Khrista Jisu vaa trongchet khanna intrim akhol veijousei.

⁷ Ringpu atuuia thlou tlohnatu keikuungah amlan amah malungsi nujuih a keita amahvaa akthratrong aksil amrel kamvei peiang.

⁸ Jon icheknoh Khrista vaa adoon akhaalta Jental ankuungah raannatu, akseeng ankaara keiin khalmo antoolrem vei sanglakho, amah malungsita keikuungah kamlanang,

⁹ poot naamte akseem Ringpu kuungah chup chupnata mathup a asih anthuptrong amchaangkhata jangme tihchu mii naamteta mamuhnatu.

¹⁰ Khakla apaalla Ringpu vaa alam tam lousing khata ringram amun jikchah ah tuuileh akchek amnehkuungah pekva amrom usa.

¹¹ Inihtu Akpu Jisu Khrista kuungah ache amnoh athlouraang aknujuih a,

¹² inih in amahta imlot apaalla iril liin che iril lumma amah kuungah am iphah.

¹³ Chunna nannih turella keiin klah knang kiphah in nannih in nanril inlengnoh natu kisonchou, mah i nannih paarthratna.

Khrista vaa Rilvol

¹⁴ Mairelna Pa kuungah kikhuk makamma kimthruun,

¹⁵ ringram mahche thaleiah am taploikuung naamte amah ningnata ming intholsei,

¹⁶ mahchuvah amah adoon akhaal paarthra nujuih a asuungtong miivaa Li apaalla akchek amnehsoh inruuia nanimtrangso.

¹⁷ Chunna malot apaalla Khrista in nanrilsuungah amnatu; che nannih in ril involkhanna akjung thlaak mahche chet a nan anmatu.

¹⁸ Jisu Khrista in inihta inirilvolna alaak adung aphei ankaang mahche akthuukta jangmeta romma, akseeng mii annaamtesoh nanromchek natu tuui amve,

¹⁹ mahche khiialnata akral Khrista vaa rilvolta nanromnatu che Ringpu vaa aksip apumtein nannihta nanimsipso.

²⁰ Pek inih isuunga thlou aktloh tuui in angen alamva inih in imdonchungah khalmo ralla thloutloh chekvah amahkuungna,

²¹ khakla ah mahche Khrista Jisu kuungah khatkho ringnatluun naamte ah ache amnoh paarthra amahkuunga am veiso. Amen.