EPHESIA 2 - Akthar Trongirhna (BSI)

Thinata Ring

¹ Nannih in chimnoh lamma seh a nanthihlai talla amah in nannihta nanimringpei,

² nannih in matsah avah mah tukleiramna sehnahoong nujuih a marvaanna kurung atuuita majuih a sehchou, mah aklikhan pek asonta amjuihnoh asa anchungah thloutloh a am.

³ Anmah ankaara inih inaamtekho matsah avah itak in akdit tloh a ringme, ruung leh iril in akditta tloh a mahche aktlei mii nanga inih in anono a rouam malunghaangei ansa veime.

⁴ Chuta Ringpu in mii rilvolthieh adoon khanna amah rilvoltheih akliinthlou khanna inihta inirilvolpei,

⁵ inih in chimnoh lamma seh a thia iamlaitalla Khrista soh inruuia inihta inimringjoupei (malungsi in nannihta nanikalpei),

⁶ inihta amahsoh inruuia inimringpei, mahche Khrista Jisu kuungah ringram amun jikchah ah inihta amahsoh inimbokjoupei,

⁷ mah i Khrista Jisu apaalla inihta inimchaal son icheknohchah amahvaa adoon malungsita akthlengsam kumtingah inihtingah inimmuhnatu relnasa.

⁸ Alamva malungsita malot apaalla nannihta nanikalpei; mah i nannih nanrouin nantloh thlounanoh, mah i Ringpu vaa kutthol maivah nannih in nansuulthlou khannanoh

⁹ alamva tukhat inkho in orhna veinohso.

¹⁰ Inihvah amahsoh thloutlohjou miisame, alamva Ringpu in matsah a amchaang akthra thlou turella Khrista kuungah amtlohpei mahchu inih in itloh ikhalnata veinoh.

Khrista Kuungah Inkhat Vei

¹¹ Alamchunna nannih in intheihve mahchuvah amaa leithing lai inkhat avah nannih nanruungah Jental veia amchou, ruungah avuntan mii tih a in ong nanphahkha pekvah avun tannoh mii tih a in ong nanphahpei –

¹² nannih in intheihve mahchuvah mahlai khanvah nannihvah Khrista kuungnata inthreksachou, Israel nata rapkheimii veisachou, nannih in trongchet navaa trongirhna khannata rapkheimii veisachou.

¹³ Chuta amaa laikhat ah inlaa a am nannihta pekva Khrista vaa athii khanna Jisu Khrista ningah nanimnaipei.

¹⁴ Alamva mah i inihtu leh–oisa, amah in nannihta khalek nanimveipeia jekna aveina inthrekna bangta akhoihpei.

¹⁵ Amah in Judiei trongthuun, trongsuur che mahsuungah am aniom jikchata ammaangpeia, ataktal in inih ingut a

¹⁶ thingkharh apaalla akthar mii khat veia iniseemma nga tloh aleh oi akseem Ringpu kuungah inihta ruung inkhatveia inimchampei, chunna Akpu soh in andah a ammekha achena avah inchamna athlenpei.

¹⁷ Che amah in thlenga inlaa a rouam nannihtingkho mahche innaia am anmahtingkho leh–oita araanpei;

¹⁸ alamvah amah apaalla inih in Li inkhat athlangah Pa kuungah luut iphahpei.

¹⁹ Chunnavah nannih in veikhat inlenga ram aktlei mii mahche rapkheitla veinohsachou, chuta nannihvah akseeng mii inruuia iramna mii mahche Ringpu vaa ataploikuung veisachou,

²⁰ nannihva raangroi leh ringraanei innmun tholna achungah inn aktlohsachou, Jisu Khrista ataktal in innkiingtu kukchosa,

²¹ amah kuungah inn ahoong apumte khek khekta chaljoua Akpu kuungah akseeng mathruunna thlaamma nannih in liinsachou;

²² Li vaa apaalla Ringpu in nankuunga amnatu nannihta naniseempei.