2 TIMOTHI 4 - Akthar Trongirhna (BSI)

¹ Kthi mahche kiringta pichaar aktlohsam Ringpu khatkho Khrista Jisu hanmah in andangsam che amah kurung huunna mingah keiin kamsilche.

² Trongkha raanro, manjangnuram akho manjangnuramnoh akho tlohkhalro, soot doutrang mahche mii matheih ah masoinoh a anril mathlaak eive, chaak eive che bungthok eive.

³ Alamva akchim matheihna khannata soot doua am ancheknoh natu laikha thlengtu. Chuta amikuur inthakrella antaksaak in andit lamtingah inheisei,

⁴ anmah in inhea sehtuei mahche seemma anson thaminna invaia sehtuei.

⁵ Nangva lai amrel chetro, klah knang thoro, evengelis thlou tlohro, nangin nitlohthlou mapung mapharo.

⁶ Alamva keivah inkattuphu veia inkatchesang; keiin kisehnatu lai thlengsa.

⁷ Akthra raalkha ktlohpei, tlaan insinkho kimchepei, keiin kamlotta ngaak a sehsang.

⁸ Peknata akchimlamseh miitu boorpiikha keiturel keisihpei, amahkha akchimlamseh pichaar Akpu in mahnichunna keiin kitlohkhaan kamlantung, mahkha keikuung khop noh chuta amah in indangsamta rilvolsoh inruuia aloungaak mii naamte akho amlantu.

Anroutu Trong

⁹ Keikuungah intha a nithlengnatu nichek makhei tranga insuulro.

¹⁰ Alamva Demas in pekna tukleiramta arilvolla keita keimah a Thesalonika ah sehsa, Kresken in Kalatia ah Titas in Dalmatia ah sehsei.

¹¹ Luke in anroua keisoh inruui. Mark ta jonna thlengpiro; alamva routlohna turel amahta keikuunga khalmo kana.

¹² Tikhikas ta Ephesia ah kamthlapei.

¹³ Nathlenglai Troas ta Karpas kuungah kmah inluut insuul leh nirik eita, amuveia savunna injih nirik eikho thlenro.

¹⁴ Kuri akseem Alekjendar in kikuungah khalmo thranoh keitlohpei; amah n atlohthlou nujuih a Akpu in athung alohtu.

¹⁵ Nangin amahrella cheksilso, alamva akthratrong iraanta amah in tranga indah.

¹⁶ Matsah a kitak kankalnatu kitlohlai tukhat inkho keiturel ngirnoh ei, annaam in keita kanmah ang. Anmahta andah a antakchunga thranoh tlohnoh eiro.

¹⁷ Chuta akthratrongta mapungpha a raan kicheknatu Akpu in kikomma ngirra li kamlanang, mah chuvah Jental annaam in amah trong ita antheihnatu. Nga tloh a saraang abaonata keita keikalang.

¹⁸ Thranoh naamte nata Akpu in keikalla mahche amahvaa ringram kurung huunna rella keikaltu. Amah kuungah ache amnohluung paarthra veiso.

Achena Saambaan

¹⁹ Priska leh Akuila khatkho Onisiphoras innsuungta saambaan kamlanei.

²⁰ Erastas in Korinthia ah inmahsei, Trophimas vah kna a Miletas ah kmahpei.

²¹ Phalbi athlengnoh maa a nithlengnatu tranga insuulro. Pudens, Linas, Klaudia mahche unao naamtein nangta saambaan namlannei.

²² Akpu in nang niklita inruuipiso. Malungsi in nanruuipiso.