2 TIMOTHI 2 - Akthar Trongirhna (BSI)

Jisu Khrista tu Malot aja Akthra Raalmii

¹ Chunna kisakupa, nangin Khrista Jisu kuungah am malungsi khanna trang veiro,

² amaa a keiningnata nitheih sakhi chahkha nanginla aktlei ankuungah masil eiro.

³ Jisu Khrista vaa akthra raalmii khat nanga klah knangah chuum jajouro.

⁴ Raalmi khat veia thloutloh tukhat inkho amah alanai thlouva manoknoh, chuta amah in amsinnava amahta thlou akpe akpukhata aril mapel khasa.

⁵ Akleeng khat in kleeng insinlai aiil nujuih a leengnohle amah in boorpii phahnoh.

⁶ Thlou tranga aktlohmii in chiluh khanna amah achuum matsah a aphahtu tlasa.

⁷ Keiin jangkisonme madonro, alamva bilam naamte room nicheknatu Akpu in namlantu.

⁸ Keiin akthratrong kiraan nujuih a, akthinata ring, Devit nata thleng Jisu Khrista ta intheihro,

⁹ Mairella keiin aiil akhoih miinang veia thirhang inluk a che klah knang douva amsang. Chuta Ringpu atrongvah thirhang inluknoh.

¹⁰ Alamchunna incharmiiei turella bilam keiin kitho, mah chuvah Khrista Jisu kuungah ache amnoh paarthrasoh am chaanringta anmah inkho anphahnatu.

¹¹ Mah isonni taktak: Inih inta Amahsoh thijou meleva, inih inkho Amahsoh ringjou ume;

¹² inih inta dou meleva, inih inkho Amahsoh paaljou ume; inih in Amahta indah mele Amah inkho inihta inindahtu;

¹³ inih in Amahta malotnoh mele, Amahvah malotphu veia am–alamva Amah atak akrouta indah tlohnoh.

Ringpu in Roulou Aja Routloh mii

¹⁴ Trongla rella inkharhkhirh athratnanoh suuksamkha amah in anpeelnatu Akpu maikuungah soneiro mahche chaak eiro, mah chunangin arungai miita ammaang.

¹⁵ Ringpu in aja mii khat veia nitakta Amakuungah namlannatu nichek makhei suulro, thloutloh mii khat in athloua injakna amnoh, akchim trongta chimma huuinaro.

¹⁶ Ringpu malotnoh mahchunang apupu trongnata inpeelro, alamva mainangin thloithloita mii in Ringpu malotnoh anraltu.

¹⁷ Anmah antrong khanna ruungta aksaa in arik asaakanga anmahta asaaktuei, Anmah ankaara Himenas khatkho Philetas jaosei,

¹⁸ veikhat inlenga ringva chesa ta malot a amtuh mii in akchilhnata anlam inthlenga sehsei. Mii arouva malot khannata amihepei.

¹⁹ Chuta Ringpu vaa akchet innmunva ngirra am, amah chummi am, “Akpu ming akson mii in alehnata mah a seh eiso.”

²⁰ Inn inrol khatsuungah ra–ao leh harngou beelkhopta amnoh, chuta thing mahche philbeelkho ammei, che arou eiva injahna aja thlou turel inhuuina, arouinla injahnanoh mii turel inhuuina.

²¹ Tukhat in injahnanoh akbuurnata anrouva inseengeile, chuleva amahvah akthra thlou naamte turel inchaanga mahche seenga huuina ajapei, Akpu turella huuina aja beel veitu tla.

²² Chunna naolon in andit antlohjahang tal rilkhata mahro, akseeng rilla Akputa ak ong mii eisoh inruuia akchimlamseh, malot, rilvol mahche leh–oita masinro.

²³ Kmongei tronga injanoh a injet artha amnohmii in innah insuul amisuuk ta romma insengro.

²⁴ Che Akpu roijuih mii invah innah insuultrang, veinohtupot, tlohphunoh, chuta mii naamte kuunga ril tap, mii matheih ah kthieh, akdouchek,

²⁵ amahsoh injanoh miita inneemma seemma machim. Anmah in akchimta anromnatu che anril thlengnatu Ringpu in thlou atloh ei,

²⁶ anmahta asuureiche amah in amdon tlohnatu, khousaar achaangnata inlit a tlaan ajaei.