2 PITAR 3 - Akthar Trongirhna (BSI)

Akpu Athlengnasam Trongchet

¹ Kirilvol eio, pek mah i keiin nankuungah kimjih innih tihpi trongjhthuunsa, che mah trongjihthuun innih tihpi inna nannihta keiin intheihna veia nannih akseeng rilta kimthohnachou;

² tihva akseeng ringraan in anrouphoong trongta mahche nannih raangroi anpaalla inikal Akpu vaa trongthuunta nannih in nantheihnatu.

³ Matsahremma mah i romve, mah chuvah acheni chunna mii manuih samanuih thlengtuei, anmah antaktal in anditta antlohtu

⁴ che ansonlamang, “Amah in athlengnasam trongchetchu ramnasame? Alamva ipa ipuin anthih khannata kutseem amthron lainata louampoot anaamte pekkho amning.”

⁵ Mah aksuuktak i anmah in romrerea indah ei, mah chuvah leithingnata Ringpu atrongah ringramva nga tloh a veisa, thalei i tuiinata mahche tuii apaalla vei,

⁶ mai apaalla louamche tukleiramta tuiiliin in athlumche ammangpei.

⁷ Chuta mah trongtalkhan pek am ringram mahche thaleita meiturella khaak a mahche Ringpu amlotnoh mii eita mamaangnatu pichaar aknikha aphahnohmiil asih ei.

⁸ Chuta Kirilvol unaoeio, mah aksuuk i indah tlohnohve, mah chuvah Akpu kuungah nikhat i kum akpul inkhatnang, che kum akpulkhat i nikhatnang.

⁹ Akpu trongchetta mathlungi tapnoh, mii arouin tap tih a amidon, chuta nannih turella soot adou, tukhatkho amaangnohnatu, chuta miinaam in rilthlenga thlengta akdit.

¹⁰ Chuta Akpu aknikha inruin athlengnanga thlengtu, cheva mahni khanna marvaan in khalmo ahou inringsoh inruuia maangtu, che amuvei aktrang in meia innoiutuei, mahche thalei khatkho asuungah am thlou naamte meia kaangtuei,

¹¹ Mah naamte i nga tloh a tumkir tupot taningva, nannih in seenga ring mahche Ringpu malot a jaknangmii veitungme madonve,

¹² Ringpu vaa akni intha a thlengtu ta ngaakve, alamva mah aknichun ringram in meia kaangtu che amuvei aktrang poot eita meia innoikirtu!

¹³ Chuta amah atrongchet nujuih a akchimlamseh mii in an amna akthar ringram mahche akthar thaleita ingaak.

¹⁴ Alamchunna kirilvol eio, nannih in maita nanngaak taningva, amaraal nohle aleh a daak amnoh aleh oi veia am nanituuknatu insuulve.

¹⁵ Che inih Akpu in soot thoa ammi inih turella amah chaanringta mii naamte amphahnatu relna tih i nantak in romve. Nga tloh a inih in iringvol unao Paul akuungah lousing amlan nujuih a nankuung akho amjihpei,

¹⁶ mah trongjihthuun naamte atlohnanga amah inkho mahtrong irella ason. Mahsuunga amram steva rom klahme, mahchu theihnoh singnoh mahche chet amnoh mii in aktlei ringjihta amithlengtlam nanga antaktal in kmaang kremna phah a amiharhpei.

¹⁷ Alamchunna kirilvol eio, matsah a mah i romma, trongsuur jaonoh inlaal mii in nannihta naniphurh a nantak in chet a nan amnata nanmaangnoh natu cheksilve.

¹⁸ Chuta malungsi ah che inih Akpu chuche Jisu khrista vaa khiialla liinve. Amah kuungah peknata ache amnoh akni phah a paarthra veiso. Amen.