2 PITAR 2 - Akthar Trongirhna (BSI)

Chimnoh Lulok

¹ Chuta miikaara ringraan akveisin inthruhsei, mahchunanga nannih nankaar akho lulok akveisin amtuei, anmah in maangnatu vei chimnohta matheihnatu inruk a anthlentu, anmahta akthlen akpu rounakho indahtuei, anmah antakchungh intha a maangna thlengtu.

² Che mii jikcha in maangnatu kochanoh amilanchuta anjuihtu, che anmah rella akchimlamta thranoh veia trongtuei.

³ Anmah in salok anveirella chimnoh trongsoh inruuia nannihta anmah anchuungna thlouva nanihuuinatu; anmahvaa amlui amiraalkha ktalnanga sihnoh mahche anmahta mamaang samkha inthrolla am khonoh.

⁴ Alamva ringroiin aleh antlohlai anmahta Ringpu in kalnoh ei, chuta anmahta repnanga thlaak a pichaar atlohnohmiil adong amnoh inthimkhura anmahta sihle;

⁵ amah in leithingna tukleiramta kalnohle, chuta Akpu mathruunnoh tukleiram achungah tuiiliin amsuuklai, akchimlamseh vaa trongta akraan Noah ta aktlei mii sirihso maangnoh natu kemma sihle;

⁶ Sodom mahche Komorah na khuuboom meita meivut maol phah ah amahta amlotnoh ankuungah tamna veile,

⁷ mahche khalmo thranoh mii anlamchat intirhsa trihkhop klah amiphah akchimlamseh Lot ta kalleva,

⁸ (alamva akchimlamseh miikhan anmah ankaara amma anmah aiilta amjuihnoh thloukhata muh a che aknirel amahvaa akchim lita amilah),

⁹ Akpu amlot eita chaang an jikchanata khatloh a akalume mahche Akchimlamsehnoh eita tandi malannatu pichaar tlohnatu pichaarnikha phah a khatloh mangaak a asih tueime Akpu in arom.

¹⁰ Amuveia akmot kdi ruung in akdit nujuih a akseh mii mahche akchek amneh eita usitnoh a aktloh mii. Anmah in karaang kanga, anmah in amidonta antloh, anmahva akchek amnehsei, antak ah thranoh a trong intrinoh ei.

¹¹ Chulata ringroi eiin akchek amneh a mahche tuuia ralla liin seilakho, Akpu maikuunga thranoh pichaartalva trongnoh ei;

¹² chuta mahmii ei in, suurnatu mahche mamaangnatu anpoklaia sa nanga pok ei, tuur amsa nanga suura thatna turella poksei, che antakva anmah in anromnoh khanna khatleh khat inhuui tuei.

¹³ Anmah in chimnoh antlohrella chimnoh anphah. Anmah in suunna sa iin tlan roomthokta andit. Anmah in nannihsoh tuiibuh inruia sajou iinjou nantlohlai anmah antakva chimnoh khanna hou masuuk anphah.

¹⁴ Anmah anmitvah miimei miimasal laal che aleh tlohjahang khanna anril sipsa, anmah in marnop eita amidoi, anmah anrilta salok anromnatu amitheih. Anmahvah phool akphah asasei!

¹⁵ Akchimlamta mathlah a anmah in invaia sehsei; chimnoh tlohta akdi Beor asa kupa Balaam asehnata anjuihpei,

¹⁶ chuta amah in chimnoh lamma asehrella insaal aphahpei; atrong suuknoh smong in miihou ah tronga ringraan anhoongta akhaarpei.

¹⁷ Amah miiei i tuii amnoh dopsei mahche khusuur thliraang in araan sumphai nangsei, alamva kdong amnoh inthimva khurkha anmah anta veisa.

¹⁸ Alamva kanana amnoh in orh trongsonna, chimnoh akringnata aktlaan mii che thranoh ruunga akdimii eita chaang doh a suurnatu amisoh.

¹⁹ Anmah in ankuungah ningtanmatu trongchet antloh, chuta antaktalva chimnohtu naichisei; alamva jangmekhat in miikhatta chekle, miikha mahkhavaa naichisa.

²⁰ Alamva inihta inikal Akpu Jisu Khrista vaa khiialta room apaalla anmah in tukleiramna akbuur jikchanata anlitche, veikhat inlenga anmahta ansuurche chek seileva, anmah turella juktoolla aringna anhoongkha matsah anringnahoong khannata ralla thranoh eia.

²¹ Alamva anmah in akchimlamsehna lam anromche ankuungah inpe akseeng trongthuun khannata inheia ansehngut ah mahchu romma indomin anmah turella ralla thrauta.

²² Akchim tronglam nujuih a mah i ankuungah suuksa, uii in amluuknatal amunkhanna veikhat inleng, mahche insilche vok in philchop ah veikhat inbuul.