2 PITAR 1 - Akthar Trongirhna (BSI)

¹ Jisu Khrista vaa roijuih mahche raangroi Simeon Pitar in inih Ringpu mahche inikal Akpu Jisu Khrista vaa akchimlamseh ah inihsoh inruuia malot ah intrimma akphahjou ankuunga:

² Ringpu mahche Akpu Jisu vaa khiialla malungsi khatkho leh oi nankuungah maral veiso.

Ringpu in Aong Khatkho Achar

³ Amah atakvaa paarthra ah khatkho akthrarem kulvaa apaalla inihta iniong amahta irompeia ringramtingna tuuia ring mahche amahta malot a akluutsam naamte inimlanpei.

⁴ Mah naamte i apaalla amah in inihta khalmo liin mahche amanchaal trongchetta inimlanpei, mah trongchet apaalla tukleiramma thranoh nata suuk akmaangsam nata inpella, ringramting amringna khanna chuum jajourei.

⁵ Mairella nannih in namilotta seenga thra ahanralnatu, mahche akseeng khiialsoh inruuia rom,

⁶ che romsoh inruuia nantak mathrat, khiialkho ralla mathrat, nanroua kut inchalsoh inruuia chet adoutrang,

⁷ malot ah unao pasata ringvol, unaopasa ringvolla mapungpha mavei.

⁸ Alamva maita nantak ah amma hanralle, inih Akpu Jisu Khrista akhiialla anmah in kanana amnoh chunohle akrah amnohva veinohtu.

⁹ Alamva tukhat in maita vaatle amahva mitchosa mahche inlaa a muh cheknohsa, che amah amlui alehta maseengkha ampolhpei.

¹⁰ Alamchunna unaoeio, nannihta naniong nanicharta namichetnatu ralla nanril maluutve, alamva nannih in oita tlohchoule tiknikho inriilnoh uchou;

¹¹ Chuunna inih Akpu mahche inikal Jisu Khrista vaa ache amnoh kurungkuung luutnatu nannih turel huuitanga nanimlanpei.

¹² Alamchunna nannih in mah ita rom choulakho mahche nantak ah am akchimkhanna chet a amchoulakho, mairella nannih in nantheihnatu lai amrella nanisonna ammang.

¹³ Keiin mah i chimta madonna ruunga kiamsot nannih in injomma nantheihnatu chimta kimdon,

¹⁴ alamva inih Akpu Jisu Khrista in keikuungah kammuh anga, keiin intha a kiruung kmahsampei tih a kirom.

¹⁵ Mahche keiin kisehnua nannih in bilamma lai amrel intheih nancheknatu keiin insuultung.

Khrista vaa Paarthrata Mit ah Muh a Sakhi Vei

¹⁶ Alamva inih Akpu Jisu Khrista atuui mahche amah in athlengna rella nankuungah kamiromchou i, mii in theihsinga anseem thaminta majuihnoh ung, chuta kannihvah amah amtik akliinta kanmittal in akmuh veisung.

¹⁷ Alamva amah in Apa Ringpu tingnata injah mahche paarthra aphahlaia, Amtik Liin Paarthra tingnata amah kuungah houkhat amthleng, “Mah i keiin kirilvol Kisakupa, mahkuungah keiin khalmo pelsang.”

¹⁸ Kannih in akseeng muulla amahsoh kan amlai, mahou i ringramnata thleng kantheihpei.

¹⁹ Ringraan in ansontrongkha seenga kankuungah am. Ram avaarnohmiil che nannih nanrilla arsi thlavaarnuin anthruh nohmiil inthimma vaar intle meiser nanga maita nanril maluut a thra nantloh.

²⁰ Matsahremma maita bahab tlamanve, mahchuvah ringjh in anphoongtrong tukhat inkho akroua amah arilnata maleng cheknoh ei,

²¹ alamva trongphoongi mii in masoh a antrongnata thlengnoh, chuta Li Akseeng in anchungah chuunga Ringpu tingnata trongei.