2 KORINTHIA 9 - Akthar Trongirhna (BSI)

Thloutlohpi Khristen eita Majoom

¹ Ipek akseengei turella malan relna nankuunga thloia kamjihnatu kanana amnoh,

² alamva nannih in namijoomja nanrilta kroom, mah kharella Mesidonia ah am mii nankuunga nannih turel keiin thoi kphah; mah chuvah akseh kumnata mathronna Akhaia kho inchaangsa, che nanrilhang khanna mii aktamkho kamisohpei.

³ Chuta keiin unao eita kamthlah ei chunna nannih amchouta kanthoinakha sul aveinoh natu, keiin kisonnanga mairelna inchaanga nan amnatu;

⁴ chulata Mesidonia na mii stesoh inruuia kithlenglai inchaangnoh a louam choulehva, lam kanrinchoukha jakhatkho veinohsa ta ansonnoh natu che injakna aveinoh natu.

⁵ Chunna keiin kamdonva keiin kisehnoh maa a unaoei in nankuunga anlousehnatu sonni darkaarsa, mairelna nannih in trongchet nan amche mah kutthol irella matsah a thlouraang loutlohve, chuta irilla malanjahang kutthol veia malannatu.

⁶ Amuveivah maisa: tloompenga akvorh mii in tloompenga aluhtu, mahche klok a akvorh mii in klok a aluhtu.

⁷ Mii khatkhat in amlannatu arilla angirhnachaang nujuih a malanso, malandah nanga chunohle malannoh janoh tihnanga malannohso, alamva aril pella roomthok a amlan miita Ringpu in arilvol.

⁸ Ringpu in huuitanga doi anaamte nanimlan achek, chunna nannih in lai amrel bilam nankhopnatu mahche akthra thlou naamtea huuitang nancheknatu.

⁹ Mah i nga tloh a injih khanangsa, “Amah in apaalla avorhpei, amah in anranriingta amlanpei; amahvaa akchimlamsehvah ache amnoh a am.”

¹⁰ Chi akvorhkuunga chi amlanche nannih turelkho saakphu tol amlannatu khalmo amtamtu, che akchimlamseh ah chi luhna tukho darkaarchu amraltu.

¹¹ Nannih in ril inrolla namilantheih kharelna bilamma kdoon veiuchou, kannih kanpaalla Ringpu kuunga roomthok malanna asuukna veitu;

¹² alamva amahta rou aktloh akseeng miieiva anmah in anvaatna khopta malannoh chuta Ringpu ah roomthok amlan atakchunga khalmo thloiralna veitu.

¹³ Amahta routlohna chaang an inna, Khrista vaa akthratrongta jaa a nannih in atrongson nanjuih mahche anmah turel khatkho aktlei turella ril inrolla namilantheih irella nannih in Ringpu ta paar namithrattu;

¹⁴ alamva nannih nankuunga Ringpu vaa aksoot malungsi kharelna anmah in khalmo nanimdon che anngen.

¹⁵ Isoncheknoh amah akutthol kharelna Ringpu ta mapaakna veiso.