2 KORINTHIA 8 - Akthar Trongirhna (BSI)

Khristen khat Veia Malan

¹ Unaoeio, Mesidonia ah am khakla tinga Ringpu vaa malungsita ammuh rella nankuunga kamiromja hangchou,

² alamva trihkhop klah knang chaang an asuuksuunga anmah in thloia anroomthok che anmah in kdongkrella inran seilakho anril liinna amilantheihkha aral.

³ Alamva amah in ral ralla anmilankha keiin sakhisang, mahche anmah in amidonchunga thloiralla amilan,

⁴ akseeng mii turel majoomnatu anmah in inruruh a kninih ung,

⁵ mah i kannih in kamidonthlou vanohsa, chuta anmah in matsah a antakta Akpu ninga amilanpei mahche Ringpu in amdon nujuih a kankuung kanipekpei.

⁶ Mahchu nujuih a mah thloui Taitas in amthron taningva mah malungsitheih thloui nankaar akho amah in tloh a amchenatu kanson.

⁷ Ipek bilamma mah chuvah nannih in malot ah, trongla ah, khiiallah, ril maluut ah mahche nannih in kannihta nanrilvol thlouvah nanral romve mah chuvah malungsitheih thlouvah nannih in nanrilluut aral.

⁸ Mah i keiin jathang veia sonnoh ang, chuta nannih rilvoltheih thloui akchim akseeng tihchu aktleitingkho chimta mamuhnatu kison.

⁹ Alamva inih Akpu Jisu Khrista vaa malungsi i nanrom, mah chuvah amah in doonslakho nannih turella amah in inran hukveisa, chunna amah anranriing khanna nannih in kdoon nanveinatu.

¹⁰ Mairella keiin kamrelchou: mah chuvah kumkhat amaa a nannih in dia nantlohnatu namithron thloukha ipek machenatu nantloh in nannihtu akthraremtu,

¹¹ chunna nannih in dia nanchek nanchek nantlohja nujuih a mapung namiphahnatu tlohve.

¹² Alamva nannih in nantlohja hangle amah in adoon nujuih a tlohso, chuta amah in adoonnoh nujuih vanoh a.

¹³ Keiin aktlei mii tingva malaia nannihtinga pootrik maronnatu tihnoh ang,

¹⁴ chuta ipek nannih in huuitanga nan amlai anmahting akvaatkha namilantupot, chela anmah in huuitanga an amlaia nannih in nanvaat nanpaakha anmah in nanipektu, chuleva khatleh khat intrimma amkha veisa.

¹⁵ Mah i nga tloh a injih khananga, “Tam amtlon inkho anlei amnoh, che tloom amtlon inkho avaat amnoh.”

Titas leh Amah in Anruuipi Miiei

¹⁶ Chuta Titas arilla akthra thlou amsuuk Ringpu ta mapaakna veiso.

¹⁷ Alamva kannih in kannool khopta amah in louja tlohnoh a, chuta khalmo aril luut a ataksak in ja a nankuunga sehsa.

¹⁸ Amahsoh inruuia khakla naamte suunga akthratrong akraantinga akmingseh unao khatsoh kamithlahjoupei;

¹⁹ Mah chukhopnoh a mah malungsitheih thlou irella kannihsoh sehjounatu amahta khakla ei in thlou anthunpei. Akpu vaa paarthra turella che inih akthrathlouta mamuhnatu kannih in thloukha kantloh.

²⁰ Ril liin kutthol malanthloua kantakchunga tukhat inkho maraal kanimthlaknoh natu insuulsung,

²¹ alamva Akpu amaikuunga injahnaphu veikhop noh a miimaikuung akho injahnaphu aveinatu kannih in kamisin.

²² Anmahsoh inruuia inih iuhnaota kamithlahpei, mahmii i thlou jikcha ah minna chaang kan an in aril luut miisa ta kantuukpei, chuta pekva amah in matsah nata ralla aril luut alamva amah in nannihta khalmo nanimlot.

²³ Taitas relnava, amah i keiin kisehpijou kiruul mahche kan uh kannao turelvah anmahva khakla ah akthratrong akraan miisei, Khrista ta paar amthrat miisei.

²⁴ Chunna nannih rilvoltheih mahche nannih turella kanthoinavah khakla anmaikuunga chimta anmahta madangve.