2 KORINTHIA 6 - Akthar Trongirhna (BSI)

¹ Amahsoh tlohkhaljou, che, Ringpu vaa malungsita sulla nanlohnoh natu klukanga kannoolchou.

² Alamva amah in ason, “Loulou aja laia keiin minna kirungeih mahche, che chaanring aknia nangta kamjoomche.” Anve, ipektalli inihta inilou inijaanatu pungsa; anve, ipektalli chaanringvaa aknisa.

³ Kannih in tunangkhat anlamta vatnoh ung, chunna inih in routloh a jakhatkho insoi inlaal iktuuknoh natu,

⁴ chuta, Ringpu vaa roijuihkhat veia bilamma kanroua kamidang: doutrangah, insuk inhalah, klah tho ah, ivaat ipa ah, trihkhop thihnaringna jikcha ah,

⁵ inikhon laia, simma inisih laia, anhaang laia, klah thlouvah, innoh jaalnoh a idoulaiah, itraamlaiah;

⁶ akseeng khiiallah, lousing doutrangah, rilvoltheih ah, Li Akseengah, akchim rilvollah,

⁷ akchim trongah, Ringpu atuui ah, kavei kchang akchim lamsehtu kutlai turellah;

⁸ injah mingseh ah, injanoh ah, thranoh mingseh ah mahche akthra mingseh ah, kannihta mananga kanichut ung, chuta akchimva,

⁹ romnoh ei nanga, chuta thratea anrom, thinanga, chuta anve ringung; tanti phahnanga, chuta kanithatnoh;

¹⁰ rilsok a klah nang, chuta lai amrelva roomthok a; inranriing nanga, chuta khalmoa amdoon; jakhatkho doonnoh nanga, chuta bilamva doonkir.

¹¹ Korinthia a ameijo, kanril seenga kansonkchou;

¹² kannihta knivatnoh chou, chuta nanroua invatchou,

¹³ chuta nanlah nansam in nannihta vat a nanisih. Inlengveia naoei ankuunga kisonnanga nanril maliinve.

Rappu Amthruunsoh Inkhat Veijounoh Natu Matrit

¹⁴ Amlotnoh mii eisoh inchunnohve. Alamva akchimlamseh in akchimnohsoh inpaijou tueime? Nohleh akvaar leh anthimchu pul ajame?

¹⁵ Khrista leh Belial in injana jangamme? Nohleh amlot mii leh amlotnoh mii eisoh anpulna thlou jangamme?

¹⁶ Ringpu mathruunna thlaamleh leilisoh injana jangamme? Alamva inihva akring Ringu vaa mathruunna thlaam same; Ringpu in asonnanga, “Keiin ankuunga amtung, che ankaar a sehtung, keiin anmahvaa Ringpu veitung.

¹⁷ Alamchunna anmah ningnata inthruhve, che anmah ningnata inthrekve, Akpu in ason, akseengnoh jakhatkho palnohve, mahchuche keiin nannihta kison uchou,

¹⁸ mahche keiin nannih nanta veitung, mahchuche nannih in kisakupa khatkho kisakumei veiuchou. Akchekrem Akpu in ason.”