2 KORINTHIA 5 - Akthar Trongirhna (BSI)

¹ Alamva inih in irom mah chuvah inih in iringna thaleina khlupuun thlaamta maangsleva, inihturel kut ah iseemnoh, Ringpu tingna inn khat ringramma ache amnoh a am.

² Onva tak a traptruuime, chunna ringramtingna inih in ngaaklipnoh a amme.

³ Chunna puun isilh in athlaia inituuknoh natu.

⁴ Alamva inih in mah khlupuun thlaamma iamsuung insuk inhalme, inihta puunrei inimsilhnoh vanoh, chuta puun nimsilh, chunna akringin kthi ajata amduulnatu relna.

⁵ Mahchuta inihturel amchaang amahkhavah Ringpu sa, che amah in ikuunga Li veia inimlan.

⁶ Chunna lai amrella iril inrol; inih in irom mah chuvah inih in ruungvaa inna iamlai, Akpu kuungnata inlame,

⁷ alamva inih in malot apaalla sehme, imuh apaalnanoh.

⁸ Inih irilta marolla mahche iruungta imthlahche Akpu soh amjouin ralla thra.

⁹ Chunna inih in inna amsamelakho nohleh mathlah a seh samelakho, inih in imsinnava amahta mapel khasa.

¹⁰ Alamva inaamte Khrista vaa pichaar phompii amaa a ngirume, chunna amah mah aruungin atlohthlou nujuih a thra slakho thranoh slakho miirel in iphahtu.

Khrista Apaalla Ringpu soh Ruul Veijou

¹¹ Churella Akpu ta trih a romma tranga kanson; chuta inih i jaknangmii veimeme tihchuva Ringpu in inirom, che chim chimnoh akrom nanril inkho aromtuta kamlot.

¹² Kanroua nankuunga inlenga nanimpaak tanoh ung chuta kannihrel nanthoinoh natu kamilanchou, chunna mahmii arilla ak am khanoh akthloi ankuunga masang nancheknatu.

¹³ Kannih in klah knang phah sunglakho mah i Ringpu turelna, inih in chimma madon melakho, mah i nannih turelna.

¹⁴ Alamva Khrista in inirilvol khanna inihta inimtuhpei, jarelna tihva kannih in chimma kanrom mah chuvah mii khat in mii naamte turel thisa; alamchunna mii naamte thisei.

¹⁵ Che amah in mii naamte turel thisa, mah chuvah akringin anmah turelkhop ringnoh a anmah turel kthi inkhatveia ringnatu akring amahturel ringso.

¹⁶ Chunna peknata kannih in miita anna injahnoh ung; laikhat avah miita anna Khrista ta injah sunglakho, ipekva mahchunanga amahta injahnoh ung.

¹⁷ Alamchunna tunangkhat in Khrista ah amleva amahvah akthar kutseemsa; amluiva sehsa, anve akthar thlengsa.

¹⁸ Mah naamte i Ringpu tingna, Khrista apaalla ataksoh inimchampei mahche inchamnatu routlohta inimlanpei;

¹⁹ chunna, Ringpu in Khrista ah tukleiramna miita ataksoh inimchampei, anmah anlehta teenpinohsa; mahche inchamnavaa trongraanta amah in inihkuunga inimsilpei.

²⁰ Churella inihvah Khrista vaa ankutseem same, Ringpu in kannihta kanihuina a amah atrongta kansonchou, Khrista angut a kannih in kannoolchou, Ringpu soh inchamve.

²¹ Alamva aleh akromnoh amahta inih ileh rella alehroon amveipei, chunna amahkuunga inih in Ringpu vaa akchimlamseh iveinatu.