2 KORINTHIA 2 - Akthar Trongirhna (BSI)

¹ Alamva keiin kiril klahsoh inruuia veikhat nanian kithlengnoh natu veikhat ngirsang.

² Alamva keiin nannihta nanimlah anglehva, tunang in keita room kamthok tungme?

³ Keiin kitlohkhata kamjihning, chunna keita room kamthok ankuunga keiin malahnohtung, keiin kiroomthok i nannih turellakho kiroomthokna veisa. Mah i kitak ah kamlotna amrelna.

⁴ Alamva khalmo klah knang mahche rilsok ruithlisoh inruuia mah i nankuunga kamjih, nannihta malah masuukna turelna noh chuta keininga am khalmo ralthloia huuitang rilvolkhata nankuunga kammuhjachou.

Thranoh Amsuuk eita Ip

⁵ Chuta tukhat in klah masuuklehva, amah in pootrik aveinoh natu kei kirilta manatnoh chuta akirrua khalmo klua madonleva nannaamte rella klah aveinoh natu kison.

⁶ Mahkhanang miiturelvah, mii aktam in tandi nantlohkha ajapei.

⁷ Chunna mahkhanang miikha nannih in ip a nanloh in thratu, chunohleva aril lahmalla maang aja.

⁸ Churella amahta tak a kanringvolche ta namiromnatu kinoolchou.

⁹ Alamva oirella keiin kamjih mah chuvah bilam son namijuihmeta chaang kiannachou.

¹⁰ Nannih in tunangkhatta nan ipkha, keiinkho ki ippei. Keiinta ipsangleva, mah ki ipkha nannih rella Khrista amaikuunga ki ippei,

¹¹ seitan in inih tingnata ralla kanana tancha alohtu, alamva mah aksil amchaangi inih in kmong relna khonohme.

Paul in Troas ah Asehja Arilhang

¹² Keiin Khrista va akthratrongta kraannatu Troas ah kithlenglai, Akpu in keikuunga thong amhoongpei;

¹³ chuta kei kirilva inngaicheknoh, alamva ohkhanna unao Titas ta tuuknohsang. Churella anmahta mathlah a sehnatu kisonche Mesidonia ting sehsang.

Khrista Apaalla Raalchek

¹⁴ Chuta Ringpu mapaakrei, Khrista apaalla lai amrella inihta raalchek a inisehpi, mahche inih ipaalla amahta romma amrimtui lousingkha amun naamtea akthekpei.

¹⁵ Alamva Ringpu in akalche mii ankaar a che akmaang miiei ankaar a inihva Ringpu kuunga Khrista vaa amrimtui veisame.

¹⁶ Akthi in akthi kuunga anrim vei. Mairella mapungphava tunangsame?

¹⁷ Alamva kannihva mii jikchain antlohnanga Ringpu atrongta inbaobeh thrulhna veia tlohnoh ung; chuta rilseeng veia, Ringpu in thlou tlohnatu inimthlah veia, Ringpu in kanitirhna ah Khrista ta trongsung.