2 KORINTHIA 13 - Akthar Trongirhna (BSI)

Achena Chaakna Khatkho Saambaan

¹ Keiin nankuunga kthlengnasam maisoh veithum tihpisa. Maraal mathlaakna tronglavah sakhi innih nohle inthumma achena veitu.

² Matsah ah aleh aktloh miiei mahche aktlei annaamteta kikchaak ei, che keiin veinih tihpi kiamlaina nanga ipek amnoh sanglakho chaaknatu ksonei, mah chuvah keiin veikhat inlenga thleng angle anmahta kalnoh tungei.

³ Khrista in kikuunga trongta sakhi nandit. Khrista in marnop veia nankuunga tlohkhalnoh, chuta nannihtinga tuui amtrangna.

⁴ Alamva marnop in alamveia amahta thingkharh ah amithlupei, chulata Ringpu vaa tuui in amah in ringsa. Jarelna inih in amahninga marnopme, chulata Ringpu vaa tuuia nannihsoh tlokhaljoua kannih in Ringpu soh ringjou ung.

⁵ Nannih in namilot i chetkenga matuh a amchou amnohchou thra minna suive. Nanroua chaang in anve. Jisu Khrista in nankuunga am tih i maromnoh choume? – chunohleva tak a chaang in ankha cheknoh uchou.

⁶ Keiin kamdonva inih in cheknoh manehnoh tanohme tih a nantak in nanromtu.

⁷ Chuta nannih in chimnoh nantlohnoh natu kannih in Ringpu kuung kangen– inih in chaang anna ah indangnatu relna noh, inih in cheknoh manehnoh melakho, nannih in akchimta nantlohnatu.

⁸ Alamva inih in akchimta indah a jakhatkho tlohcheknoh ume, chuta akchimtukhop relnaning.

⁹ Alamva kannih in kancheknoh kanpuhnohlai mahche nannih in nantranglai kanroomthok ung. Kannih in kanngenni thra ahanralnatu relna.

¹⁰ Thritnatu relna noh a seemna turella Akpu in keikuunga amlan aktloh akhal thloui kihuuina laia khalmo thranoh kiveinoh natu nannihsoh kiamnoh laia mah ita kimjihhpei.

¹¹ Achenarem a, unaoeio, ksaampeichou. Nantloh nankhal nanmaa achenatu insuulve, keiin ksonkha nanril maluutve, khatleh khat injave, leh oia ringve, leh oia ril involve, Ringpu in nanimruuitu.

¹² Akseenga inchohsoh inruuia khatleh khat saambaan inpeve.

¹³ Akseeng mii naamtein nannihta saambaan nanimlan.

¹⁴ Akpu Jisu Khrista vaa malungsi mahche Ringpu vaa arilvol khatkho Akseeng Li vaa inboompikhan nannihta nanimruuiso.