2 KORINTHIA 12 - Akthar Trongirhna (BSI)

Paul in Ahamuh Che Amdangna

¹ Mah inna keiin kichuungnatu jakhatkho amnoh slakho, keiva in orhtu tlasang; chuta Akpu vaa ahamuh leh amdangnava keiin kisontu tlasa.

² Khrista ah am mii khata kum somlei manli amaa a inthumtihpi ringramma ahankha keiin kirom mah i ruungname chunoh a ruungnoh name keiin romnohsang Ringpu in arom–

³ Mahche keiin kromva amahta Paradais ah suura ahanpei–mah i ruungname chunoh a ruungna nohme keiin romnohsang, Ringpu in arom–

⁴ che mii in son janoh che tong ancheknoh trongta amah in atheihpei.

⁵ Mahmii angut a keiin orhtung, chuta kei kitakrou turelvah in orhnohtung, jarelna tihva mah akmuh tupot i keiva marnop ang.

⁶ Keiin kin orhja slakho, keiva kmongnohtung, alamva keiin akchimta trongtung. Chuta keiva onnata ingaisang, chunna mii in keiningnata anmuh mahche antheih khannata ralla amidonnoh natu.

⁷ Huuitanga madangnatu keiin ralla kin orh noh natu, Seitan trong akraan kulingkha keikuunga kamlanang, ohchunnata inpella ralla kin orh noh natu.

⁸ Chunna amah in keita keimahnatu, mairella keiin Akputa veithumkhek kingen;

⁹ chuta amah in keita keisonang, “Kei malungsi i nangturelva inkhopnasa, alamva kei tuui in aksoolta mapung amphapei.” Keiin kisoolna ah ralla roomthok a in ortung mah chuvah Khrista atuui in kichunga inngaia am.

¹⁰ Alamva Khrista turel kisoollaia injaknatrong kphahlai, khalmo klah knanglai, kanchutlai mahche trihkhopthlou asuuklai keiin pelsang alamva kisoollaia keiin trangsang.

Korinthia Mii Turel Paul in Aril Amluut

¹¹ Keiin kmong veisang! Nannih in namma namiveiang, alamva nannih in keita namipaak tuphuang. Alamva keiin athlangtla mii vei sanglakho keiva akthloirem raangroi ankaar nata tiknikho tlavanoh ang.

¹² Akchim raangroi andaang jikchasoh, salungkhouna jikchasoh mahche akchek amneh thlousoh inruuia nankaar a amipaangpei.

¹³ Alamva kitakta nankuunga pootrik maron khop noh a khakla aktleitlei tinga nannih in nansolna jangamme? Chimnoh amle kei ipve.

¹⁴ Keiin nankuunga kithlengnatu kanchaangna oisoh veithum tihpisa. Keiin nannihta pootrik namivei nohtung, alamva keiin nanpootta jonnoh ang chuta nannihta kijonchou; alamva asa ei in annu anpa turella malanphunoh, chuta anu apa in ansaturel malanphu.

¹⁵ Nannih nanli turel keiin kiampoot anaam roomthok a kihuuinatu, nannih turel roomthok a kitakho kihuuina umang. Nannih invah steta nanrilvol angme, keiva khalmo kirilvolchou khame?

¹⁶ Mahchu jaslakho kei kitaktal invah nannihta pootrik nanimroon veinoh ang, keita lousingtheih nantih ang, nannih namiraal khanna kisuurpeichou.

¹⁷ Nannih nankuunga kamthlahmii anpaalla keiin nankuungnata kichuungna kphahpeime?

¹⁸ Keiin Taitas ta asehnatu tranga kison, che unaoeisoh inruuia kamthlah. Taitas in nankuungnata achuungna aphahme? Inih in Li khat ah thlou itloh ikhalnohme? Inih in kehkaar khat ah kaarjouva itloh ikhalnohme?

¹⁹ Nanmaikunga kantakta loungaaknatu kantlohta madonna ammang choume? Mah i Ringpu amit anna kannih in Khrista ting trongsung; kirilvol eio, nannihta seem maliinna turelna.

²⁰ Alamva keiin kintritnava nankuunga kithleng laia keiin kamdonnoh rilla nannihta nanituuk angle, mahche nannih in namidonnoh rilla keita keituuk aja; mah chuvah nar a inkharh inkhirh, khatleh khat kallak, malunghaang, anroutukhop insuul, mii loonna trong, apupu trongtlam, thoiliin mahche alam nainoh.

²¹ Keiin veikhatla kithleng laia kei Ringpu in nanmaikunga inruruh kamveitung, che matsah ah anmah akseengnoh, anhoong anchimnoh, anruunga thranoh anhoong nata anril anthlengnoh in keiting sinthruui asuukna veitungta intri hangsang.