2 KORINTHIA 11 - Akthar Trongirhna (BSI)

Paul Khatkho Akchimnoh Raangroiei

¹ Keiin ste kmongangi nandoupi tungta kamdon, keidoupive!

² Nannih turel akseeng kallak suuk ang, alamva amsalkuunga akseeng tharei khat nanga nannihta malannatu Khrista ting trong kimchepei.

³ Chuta keiin kitrihnava murul chorolla Eve ta asimnananga, Khrista kuunga namilan rilseeng khata chimnohtinga naniphurtu.

⁴ Alamva kannih in trong kanraan cheta aktlei Jisu ta akraan mii khat thlenglehva, nohleh mii khat tingnata nanphahche inthlin li phah choulehva, nohle mii khat tingnata nanphahcheta inthlin akthratrongta louchoulehva, nannih in thratea oirella inchaanguchou.

⁵ Keiin kamdonva akthloi raangroi nata inleouangta madonnoh ang.

⁶ Kei kitrong kila ah theinoh singnoh sanglakho, khiialtingva chunangtalva noh ang, bilam naamteva nankuunga kamidangkirpei.

⁷ Nannihta maliin mapaaknatu kitak in antoolhoong loua aleh kitlohpeime, alamva keiin Ringpu vaa akthratrongta nankuunga khangvaalla kiraan peichoume?

⁸ Keiin nannihta rou kitlohnatu rella aktlei khakla ei tingnata nankuunga majoomnatu lou aja kiloh ei.

⁹ Keiin nannihsoh kiamjoulai mahche kivaat kipalaia, tukhat tingkho pootrik maphahnoh ang, alamva Mesidonia ah aktlei unaoei in kei darkaar ah kamijoomang. Chunna bilam keiin nannihta pootrik nanimphahnoh ang, nanimphah nohtung.

¹⁰ Khrista vaa akchim in keiningah amtaningva, mah kithoina i Akhaia aveella ahou suuknoh a rimta amnohtung.

¹¹ Mahchu jarellame? Alamva nannihta keiin kirilvolhnoh relnasame? Ringpu in arom kirilvolchou!

¹² Anmah in orhna thloua inihnanga anveinatu anmah tingnata tanchathra in orhkha mamaangnatu keiin kitlohkha kitloh umang.

¹³ Alamva ohchunang miieiva chimnoh raangroisei, jarelna tihva mainang akchimnoh raangroi miieiva miinamthlou aktlohsei, che antak anroua Khrista vaa raangroi sungta anmeel mathlenga amdangmii khasei.

¹⁴ Salungkhouna amnoh, alamva Seitan atakluung inkho ameel mathleia akvaarvaa ringroi angta thlou atloh.

¹⁵ Chunna amah roijuih ei inkho akchimlamseh ungta anmeel mathlei seilakho saluungkhouna amnoh. Anmahtu achenava anmah anthlou nujuih a veitu.

Paul in Raangroi khat Veia Klah knang Aphah

¹⁶ Veikhatla kisonchou, tukhat inkho keita kmongta kamdonnohve; chuta nannih inkho nga tloh a kamdon chouleva, keikho ste kithoinatu, kmongkhat nanga keilouvesa.

¹⁷ (Keiin kisonnava Akpu in ajata sonnoh ang, chuta kmongkhat veia kithoina khat ah tranga kamlotnata kisonpei;

¹⁸ mii jikcha in tukleiramtu vei pootchei ah anthoirella, keiinkho thoitung.)

¹⁹ Alamva nannihva ksing taningchouva, kmong eita roomthok a nanthochek a!

²⁰ Alamva nannihta tukhat in naichi nanimvei seilakho, nohleh saakphu nanimvei seilakho, tanchathra nanilou seilakho, nohleh inkaanga nanidom seilakho, nohleh nanmaia nanibeeng seilakho nandou.

²¹ Keiin kanjakna veia inih in marnopmal sameta kisonnachou! Chuta aktleikhat ah tukhat in athoinatinga arilhangle keiin kmongnanga trongsang keikho kthoinatinga trangtung.

²² Anmahva Hibru eime? Keikho Hibru noh angme. Anmahva Isarel eime? Keikho Israel noh angme. Anmahva Abraham vaa atute eime? Keikho atutenoh angme.

²³ Anmahva Khrista vaa roijuih eime? Keiva innah nanga trongsang–keiin thloiralla kitloh, thloiralla simma kansih ang, amun puhnoh a kanhaiang, che injomma thihna phah a klah knang kphah.

²⁴ Judi ankut a sungmun soplitu inkhat tla a veirangakhek kamirat ang.

²⁵ Rui in veithumkhek kamirat ang, lunga veikhat kanden ang. Veithumkhek muli inphuumsam ah jaosang, tuiiboom chung muli asehna maromcheknoh a khulou khat leh suunkhat klah jaosang;

²⁶ injomma rapkhei kisehna jikchah ah, avaa ah thihnaringna jikchah, inruraan ankut ah thihnaringna jikchah, kei kimiiei tingna thihnaringna jikchah, Jental ei tingna thihnaringna jikchah, khuuboomma thihnaringna jikchah, rapril chaaramma thihnaringna jikchah, tuiiboom chunga thihnaringna jikchah, chimnoh unaoei ankut ah thihnaringna jikchah;

²⁷ tlohkhalla mahche trihkhopna jikchah, khulouh ain jaal cheknoh a klah knang jikchah, vontraam tuiiraal jikchah, injomma buh an saanoh jikchah, kisik leh nisakaar ah klah knang kaphah jikchah.

²⁸ Che maichunga aktlei jikchahla khakla naamte turella kiril inchoi in keinammang.

²⁹ Tukhat in marnopleva keiva marnopnoh angme? Tukhat in klah knanga atlaklaia keiva tlanoh angme?

³⁰ Keiinta in orh angle, keiin jikchahphah marnop angme tihkha muh a in orhtung.

³¹ Ringpu mahche Akpu Jisu vaa Apa, ache amnoh amahminga doiphah veiso, mah chuvah kimchinthi noh ang.

³² Damaskas ah Kurung Aritas athlanga am rampuui in keisuurnatu Damaskas khuboomta ngaak kemma am,

³³ chuta keita buka khat ah thunna palvaa thongsiinna mathruh a kanthlaak ang, chunna amah akutnata inlitsang.