1 TIMOTHI 6 - Akthar Trongirhna (BSI)

¹ Naichivaa rukol akroon eiin anmah akpu eita injah i matikcha ta madon eiso, chunna Ringpu akmingta che matheihnata thranoh antrongnoh natu.

² Tunangkhat Akpu in malot eileva, anmahta unao pasa anveirella injanoh tlonoh eisoh; mahchu angut a anmah in thloiralla routloh eiso, alamva anmah routloh akhanna akanana akphah mii eita rilvoltheih anphahpei. Mah thloui matheih eiro che tranga takeiro.

Chimnoh a Matheih Khatkho Akchim Doonkhaal

³ Tukhat inta inhea matheihle inih Akpu Jisu Khrista vaa akchim mahche Ringpu malotna nujuih a matheihta indahleva,

⁴ amahva athoi aliinsoh in orhsa, amahva jakhatkho romnoh, mahche trong rella injanoh amsuuk, mah khanna kallak, inkhon inraan, thranoh a trong, thranoh madon,

⁵ che ril intluunnoh khatkho akchim antak ah amnoh ankaara inna insuul suuk, Ringpu malot i achuungnatu thlouningta anaamte i mainang nata suuk.

⁶ Ipelsoh inruuia Ringpu malotmele khalmo ichuungna;

⁷ alamva inih in tukleiramma jakhtkho thlennohme, che inih in tukleiram nata jakhatkho phurh cheknoh ume;

⁸ chuta inih in saakphu khatkho puunrei sihmele mah khanna inih in pel ume.

⁹ Chuta kdoon akdimii in madoina ah tlasei, chaangah mansei che artha amnoh khatkho lal akdi eiin mah khanna tlasei, mainangin mii maangna ah khatkho inthritna ah ammaang amthangpei.

¹⁰ Alamva inbaobeh ditrangin thranoh naamtetu akjungsa; mah ita dimalla anthrul miilla mii arouva malotnata invaitlamsei che klah knang phah a amilung kuksei insunsei.

Mii khatkhatta Matheih

¹¹ Chuta Ringpu amii nangvah mah naaamte i mahro, akchimlamseh ah, Ringpu mathruunna, malot ah, rilvoltheih ah, douchek ah, ril inneemta masinro.

¹² Malotna ah akthra raalkha tlohro; ache amnoh chaanta thra matuhro, sakhiei i anmaa a nangin akthra niphoonglai nangta nak ongpei.

¹³ Poot naamteta chaan amlan Ringpu kuungah che Pontias Pilat amaikuungah akthra sakhi anthruhta phoongkha Khrista Jisu kuungah keiin nangta kamsil peiche,

¹⁴ Inih Akpu Jisu Khrista in andangnohmiil trongthuun i amchu inpoolnoh mahche amingchat thranoh jonnoh a sihnatu keiin nangta kamsil peiche;

¹⁵ Doi amlantheih mahche khalekru vei akchek amnehrem kurung chungvaa Kurung, akpu chungvaa Akpu in ajapei atihna laikhanna mahkha ammuhtu.

¹⁶ Athih nainoh che kvaar in aphahcheknoh ramma amvah amahkhopning, tukhat inkho amahta tiknikho muhnoh mangei che muhkho cheknoh ei. Injahna khatkho ache amnoh a paalkha amah kuungah veiso. Amen.

¹⁷ Mah tukleiramma akdoonei turella anmah in kei ningsungta isoonnohnatu, inromnoh lal akho amituurnoh natu, chuta inih in itlannatu huuitanga poot naamte inimlan Ringpu ting malot eiso.

¹⁸ Anmah in akthra tloh eiso, akthrathloua doon eiso, ril liin khatkho ril inrolla malantheih vei eiso,

¹⁹ vaknuna turella akthra innmunthol nanga anmah turella lalpei eiso, chunna anmah in ache amnoh chaanta matuh eiso, mah ichaan taktaksa.

²⁰ Timothi, nangta kamsilchekha ngaak a sehro. Ringpu jaonoh trong mahche akanana amnoh trong khatkho chimnohta an ong khiialnata inpelro,

²¹ alamva mah chunangta chim angta ansonna mii arouva malotvaa daaknata inthleia sehsei. Malungsi in nangta nanruuipiso.