1 TIMOTHI 5 - Akthar Trongirhna (BSI)

Amlotmiiei Tingah Tlohnoh Janoh Ithlou

¹ Aktar kupa eita saalnoh eiro chuta anmahta nipa nanga bungthok eiro; naolon eita niuh ninaonanga madoneiro,

² aktar kumei eita ninu nanga madoneiro.

³ Taktak a trulmeinu eita injah eiro.

⁴ Trulmeinu khat inta asa ei nohle atuei amle, anmah in matsah a antaploi kuunga Ringpu amilot tihkha andangnatu annu anpakuungah anleimanta siineiso, alamva mah i Ringpu mit anna ajathlou.

⁵ Tukhat in taktak a trulmei vei mahche amahturel tukhatkho amnoh a akroua ringle, amah in Ringpu kuungah matuur khatkho khulouhthlang che suuntla inruruh a nih khatkho ngen inngainohso;

⁶ chunohleva aril mapelnatu ansuul trulmeinu in kiringbenga thisa.

⁷ Anmah antak ah anming athinohnatu trongthuun i matheih eive.

⁸ Tukhat in amah unao pasata che amuveia amah ataploi kuungkho jok cheknohleva, atak in malotthlouta indahsa che malotnoh miichunga amah in ralla thranoh veisa.

⁹ Kum sopruk akphahnoh trulmeinuva trulmeinu mingah majaonohve, kupakhatvaa akmei veithrol aja,

¹⁰ anmahva akthrathloua isoolna trulmeinule, asa ataploikuungta akjok theihle, rapkheina miita routloh theih madangle, akseeng mii eita ankeh chaamle, klah aknangeita majoomle, che bilamma akthra thlou tlohnatu atakta inkatsale, amahta trulmeinu ankaara majaovesa.

¹¹ Chuta nao akvei trulmeinuva trulmeinu kaara majaonohve, alamva anmah anruungah thranoh ril luut tueia Khrista jekna anraltu chunna inn anpaaljatu.

¹² Matsahna trongchetta ankhoih rella antakta malaalnatu thleng.

¹³ Mah chukhopnoh a anmah in ktalla thlou antlohnoh natu, inn inna inloia che miirilh miisonna thlou aminok che sonphunoh sonna ammei.

¹⁴ Chunna nao veia trulmeinuin, changvaanga ansa pok a, antaploi kuungta kemma am kikdit, che jekna mii in inihta inimlaalnatu anmahta tancha penohve.

¹⁵ Alamva trulmeinu arouva invaia Seitan aknujuih a lousehsei.

¹⁶ Tukhat malot kumei in nao trulmeinu doonle, anmahta majoomso; anmahrelvah khakla ta pootrik maveinoh eiso, mah i trulmeinu takta majoomnatu kisonchou.

¹⁷ Khakla ta thra chinga kem amtheih anparuul eita saruk innih injahve, amuveia trong akraanei che miita amtheih ansuul eita,

¹⁸ alamva ringjih in asonva, “Nannih in thlou namitloh siilchalta abao siinnoh tupotchou” khatkho “Thloutloh mii in atlohkhaan aphahtupot.”

¹⁹ Mii innih nohle inthumva sakhi amnoh a tukhat inkho anparuul chunga malaalna trong lounohve.

²⁰ Tukhat inkho alehthlou tlohnohnatu inthingta aktloh miiva miinaam maikuunga saalve, chunna aktlei mii in antritnatu.

²¹ Ringpu khatkho Khrista Jisu mahche acharpot ringroi anmaikuungah keiin tranga kisonchou, mah chuvah keimii miimii annoh a thlou nitlohnatu kamsilche.

²² Tukhatchungah innot a nikut sihnohro, aktlei mii in antlohthlou aleh akhanna jaonohro; nohle nitak nikroua seengro.

²³ Tuii khopta iinnohro; chuta nivonpii rella mahche niruungin injomma knatrang rella ngangli atuii ste ste huuinaro.

²⁴ Mii arouva alehta pichaar antlohnoh maa a chuta aktlei anlehva tap a indangtu.

²⁵ Mahchunanga akthra thlouva seenga indangsa; mahche seenga inphoongnoh slakho inthup a am cheknoh.