1 TIMOTHI 4 - Akthar Trongirhna (BSI)

Chimnoh Lulokei

¹ Pekva Li in seenga ason mahchuvah vaknu lai avah mii arouva chimnoh li che khousaar in amtheihna khanna anril amiluuttuva amilotnata mah a sehtuei,

² antak ah chim chimnoh romna rilta akthra veisinna miita leemma trongei,

³ changvaangta chimnoh tih a anthing mahche malot mii eita khatkho akchimta akrom eiin mapaaksoh inruuia ansaak an iinta Ringpu in aseempot saakphuta saaknohnatu anthing.

⁴ Alamva Ringpu in aseem naamte thrakir, che mapaakso inruuia rouloumele janohtu jakhatkho amnoh;

⁵ alamva mah i Ringpu atrong mahche ngen apaalla amseengpei.

Jisu Khrista vaa Akthra Roijuih

⁶ Mah matheihna ita unao anrilla thunchouleva, nangva Khrista Jisu vaa akthra routloh mii veiuche, nangin aknu nijuih malotna trongin akthrata matheih a akjok vei uche.

⁷ Ringpu romnoh khatkho kmong veia seemma antong thaminna jakhatkho tlohna amnoh–akthratingah nikroua tamma theihro;

⁸ alamva ruung thratnatu insuulva steta kanananing, mairella pek ringna rella mahche vaknu akthlengsam ringna rella trongchet am.

⁹ Mah i inlitnohtu trong, mahche amahta jaa a roulouve khalmo matikcha.

¹⁰ Alamva mairella inih in thlou itloh che insuulme, alamva Akring Ringpu ta inih in imtuur, amahvah mii naamteta amuveia amlot mii eita akalchek akring Ringpu vah inih in chet a imlot.

¹¹ Soneiro che maita matheih eiro.

¹² Intlangsa khat veia tukhat inkho usitnoh naktlohnoh eiso, chuta nangva amlotmiiei turella nitrong nilaleh nihoong nivaa ah, miirilvolla, malot ah, akseeng punsi ah mii in nangta nantamna veiro.

¹³ Keiin kithleng nohmiil, savaanga ringjih paa ah, akthra trong raanna, mii matheih ah niril maluut a jaro.

¹⁴ Nitak ah am kuttholta thousanoh tlohnohro, mahkha anparuulvaa jama eiin nichungah ankut sihsoh inruuia ringraanei trong anpaalla nikuungah amilanpei.

¹⁵ Maita athloi veia tlohro, anmah ankuungah niril maluut a nitakta malanro, chunna nithlou nimaasehkha miinaam in muh eiso.

¹⁶ Nitakturel mahche mii matheih ah cheksilro. Mah thloukha tloh a amro, alamva maita tloh a amchele nangin nitakho che nitrong arungai mii eikho inkal uchou.