1 TIMOTHI 3 - Akthar Trongirhna (BSI)

Khakla Akching

¹ Mah isontrongi atataksa: Tukhat in sadamkem thlouta dile amah in akthra thlouta akdit.

² Chuleva sadamkem khat in atak ah thranoh insoi inlaal amnoh tutla, kumei khatvaa amsal, achaangkhat ah am, akromtheih, injahna aja, routloh theih, mii amtheihchek,

³ tuiibuh inruinoh; karaangnoh chuta inneem, miisoh inkherhnoh che inbaobeh dinoh.

⁴ Amah ataploikuungta khalmo thra marella kemtheih, bilamma injahna vei mahche asaeita amah athlangah sih a kemtheih;

⁵ alamva tukhat in amah ataploikuungta khatloh a marel kamtheih umeta maromnohle, amah in Ringpu khakla ta khatloh a akemchek ume?

⁶ Amah in inrangte ah malot mii veinohso, nohle amah in orh a thoiliinle seitan vaa pichaara tla aja.

⁷ Oirella apaalla am mii eiin amahta injah tupotei, chunohleva seitan chaangah manna inriiltu che injak aphahtu.

Khakla Amjoom

⁸ Chunanga Dikan inkho cheksiltu tlasei, trongtlamnoh, tuiibuh ah karaamnoh, anchuungnatu thloua karaamnoh;

⁹ chim chimnoh romna akseeng rilsoh inruuia anthup amdangta malot a amtutu tla.

¹⁰ Anmah in antakta matsah a chaang in anmaan eiso; mahchuche antak in kanchungah malaalna amnohsungta romeile anmah in dikan veia routloh seiso.

¹¹ Mahchunanga kumeiei inkho cheksil eiso, mii loonna trongnoh, chuta achaang naia am, bilamma malot aja kumei veitu tlaei.

¹² Dikan in kupa khatvah amsal, anmah in ansa eita mahche antaploi kuungtah thra a marella amtheih veitu tlasei;

¹³ Dikan veia thra a routloh mii in atakta akthra thlou mahche Khrista Jisu ting am malot khanna khalmo malotna aja veitu tlasa.

Akthuuk Anruk

¹⁴ Keiin nikuungah intha kithlengnatu matuura amah matheihna i kimjihpeiche.

¹⁵ Keiinta thil angleva, Ringpu vaa taploikuungah nangin khatloh a sehtungme niromnatu mah amramita kimjih, mah taploikuung chuva kukcho khatkho innmun akvei akring Ringpu vaa khaklasa.

¹⁶ Amahta ruung veia amdangpei, Li in amchimpei, ringroi in anmuhpei, jatih ankaara trongi inraansa, tukleiram in amlotpei, paarthra ah ahanlohpei.