1 TIMOTHI 2 - Akthar Trongirhna (BSI)

Khakla ah Mathruunjou Rella Matheihna

¹ Chunna matsahremma, keiin tranga kisonchou mah chuvah inruruh a noolpi, ngenpi, aktleiturel nihpi mahche roomthok malani mii naamte turelna,

² kurungei turella khatkho inkaang phomma ammi turella nihpive, mah i inih in daia mahche leh oia, ringdamma paal punsi veinatu Ringpu in akdit che bilamma injahna veia iringnatu.

³ Mah i inikal Ringpu amit anna akthra che ajapot.

⁴ Amah in mii naamteta kalnatu khatkho akchimta marommii amah in akdit.

⁵ Alamva Ringpu inkhat am, che Ringpu leh mii akaara amnai matuuknatu inkhat am, mahchuvah Jisu Khrista,

⁶ alaitalla sakhi veinatu mii naamteta thlokna turella ataktalta inimlanpei.

⁷ Mairella keita akthratrong akraan mahche raangroi (keiin akchimta kison, simnanoh ang), malot ah mahche akchimma Jental eitu lulok veia keita thlou keithunpei.

⁸ Chunna kupa eiin malunghaang mahche injanoh a inkharhkhirh amnoh a akseengkut domma aphomrel ngenta keivah kikdit;

⁹ Kumei inkho in orh noh natu mahche injahna puunrei ah inseem inliing eiso, sam pinna amanchaal puunrei ah inliingnoh tupotchou

¹⁰ chuta akthrathloua keiva heikoh ammangta akson kumei in akthra thlou turella inliing eiso.

¹¹ Kumei in daikenga kupa lia ring tameiso.

¹² Kumei in matheih nohle kupachungah akpu vei keiin majanoh ang, kumei in rimta ameiso.

¹³ Alamva Adamta matsah aseem, chuche Ipta aseem.

¹⁴ Alamva Adamta masimnanoh, chuta kumeita amsimna a aiilkhoi hukveisa.

¹⁵ Kumei in malot ah, rilvolah akseengah, mahche ril inneemsoh inruuia am eile naopok ah kumeita akaltuei.