1 PITAR 5 - Akthar Trongirhna (BSI)

Ringpu vaa Sadamlom

¹ Chuuna inihsoh inruuijou anparuul che Khrista in klah knang aphahta sakhi akvei inruuia aphoongsam paarthra khanna chuum jajou keiin nannih nankaara am anparuul eita bung kikthokei.

² Ringpu vaa sadamloomta nankuungah nanimsilli thra kemve seelve, tlohnoh janohthlou tih a nannihta namma nanimtloh veinoh a chuta nantlohja hanga tlohve,

³ nannihta thlou nanimsilkha karaang kanga anchungah paalnanga tlohnohve chuta sadamloom anchungah akthrathlouvah tamna veia kemve.

⁴ Aklok sadamkem in andanglai nannih in ktham amnoh paarthravaa boorpii nanphahtu.

⁵ Chunanga unaoeio, anparuul in anson majuih a anthlanga paalve. Puunrei silhnanga, nannaamte in inruruhsoh inruuia khatleh khat rou intlohve, alamva “Ringpu in in orhta indah, chuta inruruh miita malungsi amlan.”

⁶ Alamchunna akthra laia athlenglai amah in nannihta nanimliinnatu nannih in Ringpu vaa achek amneh athlangah amve.

⁷ Nanril inhal inhil naamte amah kuungah masilve, alamva amah in nannihta thra nanikem nanian.

⁸ Nirilta suurro, jih trangve, alamva nangnihta naknijet rappuin naniksaaknatu saruung nanga inloia tukhatta asaaknatu jonna am.

⁹ Nannih in namilotta machet a rappu ramnaita routhingve, oinang klah knangi anphahpei ta romve.

¹⁰ Mahche nannih in lai kaktu klah knang nanthoche aknua malungsita inimlal Ringpu amah paarthra ah Khrista Jisu apaalla inihta iniong amahkhan, nannihta mapung nanimphaso.

¹¹ Ache amnoh a paalkha amah in veiso. Amen.

Achena Saambaan

¹² Nannih in chet a nanngirhna Ringpu malungsi i atataksa ta louva mahche keiin sakhi malanna sonna kamdang malot aja i inih unao Silvanas apaalla keiin chombeb a kimjih.

¹³ Nannihsoh inruuia incharche Babilon na kumei in nannihta saambaan nanimthlah; che kei kisa Mark inkho saambaan nanimthlah.

¹⁴ Malungsi in inihta inirilvol veia khatleh khat saambaan inpeve. Khrista a am nannaamte kuungah leh oi am veiso.