1 PITAR 4 - Akthar Trongirhna (BSI)

Punsita Mathleng

¹ Alamchunna Khrista in ruungta inih turella klah athotaningvah nannih nantakkho mahkhasoh intrimma nanril sihchoulaia machaangve; alamva ruungah klah aktho amah in veikhat inlenga alehnata inngaiso,

² chunna akthlengsam amah chaanvaa laikha ruungah mii in anditta tloh a amnohtu, chuta Ringpu in amdonta amah in tloh a amtu.

³ Akcheche chaanna Jental in anditta antlohjata inih in majuih a tloh a ammekha chanasa, intirhsa hoonga akring ruung in akdit, tuiibuh inruii, derder tih, tuiibuh inruiia houtam mahche trongsuur amnoh a leili mathruunna ammei.

⁴ Kochanoh hoongah anmah in ansehna khanna nannih in nanjaunoh rella anmah in salungkhousei, che anmah in nannihta thikak a nanisaalpei;

⁵ Chuta akring mahche akthi eita pichaar tlohnatu inchaanga am amah kuungah anmah in amram amilantu tla.

⁶ Mairella akthiche ankuungphao akthratrong inraansa, alamva anmah in Ringpu nanga li ah anringnatu.

Ringpu Akuttholta Akthra Aksil Amrel

⁷ Anaamtetu achena innaisa; alamchunna nannih cheksilve mahche nanngenna turella nanrilta kemtheihve.

⁸ Anaamte chunga amuveia khat in khat turella chet a ril involve, alamva rilvol in aleh tamkhaakta abah.

⁹ Insonoh a khatleh khat ril involve, khatleh khat rou intlohve.

¹⁰ Mii khatkhat in amah in kutthol aphah nujuih a Ringpu vaa alam tam malungsivaa akthra aksil amreltheih nanga khatleh khat rou intlohve.

¹¹ Tukhat in trongle, amah in Ringpu trongta akson mii khat nanga trongso; tunangkhat routlohle, Ringpu in amlan aktrang khanna routlohso; chunna bilam Jisu Khrista apaalla Ringpu ta paar mathratnatu tlohve. Amah kuungah paarthra mahche ache amnoh a paal veiso.

Khristen khat Veia Klah Knang Tho

¹² Kirilvol eio, nannihta chaang naniannatu nanchunga trihkhopna chaang an thlengsa tit a salungkhou nohve, chuta lousuuk nohkha nankuungah suuktu.

¹³ Chuta Khrista in klah knang aphahkhan chuum nanjajoupei ta roomthokve, mahchunna amah paarthrata aphoonglaia nannihkho nanroomthoknatu mahche nantlannatu.

¹⁴ Khrista akmingrella nannihta nanisaal eile, nannihvah doiphah veisachou, alamva paarthravaa Li in mahche Ringpu in nanchungah am.

¹⁵ Chuta nannihva tunangkhat inkho miithat, nohle inru, nohle chimnoh tloh, nohle mii maangnatu thlouva jao mii khat nanga klah knanga tho tlohnohve;

¹⁶ chuta tunangkhat Khristen khat veia klah knang thole, amah in injaknohso, chuta amahmingah Ringpu ta paar mathratso.

¹⁷ Alamva Ringpu vaa taploikuung nata pichaartloh mathronnatu likha thlengsa; che mah i inih tingnata mathronle, Ringpu vaa akthratrongta amjuihnoh mii eikhavah khavei tueime?

¹⁸ Mahche “Akchimlamseh miita khalmo chaalla inkalna suukleva, Ringpu malotnoh mahche alehchel miieiva khache useime?”

¹⁹ Alamchunna Ringpu in amdon nujuih a klah knang akphahmii anmah anlita malot aja akseem Akpu kuungah masilla akchimthlou tloh a amtuei.