1 PITAR 3 - Akthar Trongirhna (BSI)

Amsal Khatkho Akmei

¹ Mahchunanga akmei eio, namisal aliah amve, tunangkhat amisal arou invah trongkhata majuihnoh seilakho, trong janoh a anmah anmei anhoong anva ah amisalta ancheknatu.

² Anmah in nannih nanhoong nanvaa akseeng khata anmuhnatu.

³ Nannih in inseem insaam sampin, ra–aoton, mahche akthra puunrei silh a apaaltonga nannih in inliingkha veinohve,

⁴ chuta aril anthupmii in amaang amnoh, ril tap, che ril dai in inseem inliingve, mah i Ringpu amit anna khalmo amanlu.

⁵ Chunna amaa akho Ringpu ta matuura am akseeng kumei inkho amisal in anson majuih a amisal li ah amma antaktalkho inseem inliingei.

⁶ Mainanga Sarah in Abraham atrongson amjuih a, amahta akpu tih a aong. Nannih in akthra nantlohsotva mahche nannihta nanimtrit laia intrinoh choule, nannih talkho amah asasachou.

⁷ Oinanga amsalleio, nannih nanmeita marnop eita nanromsoh inruuia rilvolla inkhatveia ringjouve mahche nannih in inchunna nanringjou natu Ringpu tingna malungsi kanphahpei madonna nannih nanmeita rilvolve. Mah i nannih in nanngenlai khatleh khat nandahnoh natu.

Akchim Tlohrella Klah Knang Phah

⁸ Achena a, nannaamte li ah ril inchunve, miilah miisam romve, unao pasananga ril involve, miita ringvoltheih a ril inneem veive.

⁹ Thranoh ah thranoh nohle phoolla phool maleng tlohnohve; chuta mahchungut adoi malanve, alamva nannih in doi nanphahnatu mairella naniongpei.

¹⁰ Alamva “Punsita ringvol mahche akthra aknita akmuhja, amah amlei i thranoh nata kemso mahche anar in masimnatheih a trongnohso;

¹¹ amah in thranoh nata inheia akthra tlohso; amah leh oi jonslaia mahkhata phahnatu thrulhsoh.

¹² Alamva Akpu amitvah akchimchungah am, che amah amkuurvah anmah in anngenna ah mahoonga asih.”

¹³ Chuta Akpu vah thranoh aktloh eita andah.

¹⁴ Chuta akchimlamseh rella nannih in klah knang thochoule, nannihta doi nanimlantu. Anmahta trihnoh eive, nanril insuk inhalkho tlohnohve,

¹⁵ chuta nannih nanrilsuungah Khrista ta Akpu tih a injahve. Nannih nantaksuungah am matuur kharella tukhat in naniongle masang nanroucheknatu lai amrella inchaanga amve, chuslakho ril tap a khatkho injahsoh tloh khalve;

¹⁶ che chim chimnoh romna ah seenga romve, chunna Khrista tinga akthra nanhoong nanlata usitnoh a aktrong eita antak ah injak nanpekcheknatu.

¹⁷ Alamva Ringpu in amdon veile, nannih in thranoh nantloh rella klah knang nanthochunga akthra nantloh rella klah knang nantho in ralla thra.

¹⁸ Alamva Khrista inkho alehrella miinaam turel veikhat thisa, akchim in chimnoh mii turella, amah in inihta Ringpu tingah inithlennatu, ruungkha thisa, chuta li ah amringpei;

¹⁹ simma am li ankuungah seh a akthratrong araan,

²⁰ leithingah Noah in apaallai mulipii aseemlai Ringpu in soot thoa li in asonta anmah in majuihnoh ei, mulipii suungah mii steta mahchuvah mii kiritruta tuii apaalla akallei.

²¹ Tuii in amah ahoongta loua, mahchuvah inlup a inkalsachou, nanikalpei, ruungna akbuurta lonna turelna noh, chuta Jisu Khrista ring apaalla Ringpu tinga chim chimnohta seenga romma,

²² amahva ringramma kalla Ringpu akchangtonga amsa, ringroi eikho, akchek amneh eikho, mahche tuui am eikho amah athlanga asih ei.