1 KORINTHIA 8 - Akthar Trongirhna (BSI)

Leili ah Inkat Saakphu Relna Ruina

¹ Ipek saakphuta leili ah katrella inaamtein khiial ammeta kamdon. “Khiial” in in orh, chuta rilvol in aseem.

² Tukhat in keiva jangmekhat kromta madonle chuta aromphu pekphah romnoh mang.

³ Chuta tukhat in Ringpu ta arilvolle Ringpu inkho amahta arom.

⁴ Nga tloh a leili ah inkatpoot aksaa kuunga, “Leilivah inih in irom mah chuvah akchim anthohna amnoh,” mahche “Ringpu inkhatnoh a aktlei Ringpu amnoh” ta irom.

⁵ Alamva ringram nohle thaleia rappu an ong khalmo amslakho tak a “rappu” khalmo am mahche “akpu” khalmo am.

⁶ Chuta inihtu vei Ringpu khat mah chuvah inihva Ipa am, poot naamte amahkuung nata veikirning, che inih i amah turella veime, mahche Akpu khat am, mah chuvah Jisu Khrista, amah apaalla poot naamte mahche amah apaalla inihkho ringme.

⁷ Chuta miinaam in amah akhiialta doonnoh ei. Chuta mii arouva pekphah leili mathruun rilla ammeia, leili ah ankat pootta ansaakmang; che anmah in chim chimnoh romna rilkha marnopseia akbuur veisei.

⁸ Saakphuin inih Ringpu kuunga luut janoh; inih in isaak i iinni ralla athratna khonoh; chuche inih in saanoh iinnoh melakho ralla thranohkho maveinoh.

⁹ Nannihvaa thlaang thlaangkha nanhuuina laia malot ah marnop miitinga keh masuihnoh natu cheksilve.

¹⁰ Alamva khiial am nangin leili mathruunna thlaamma nisaaknatu tebor a nanboklai mii khat in nangta nakmuhle, chim chimnoh rommah marnop amahta leili ah ankat pootta asaaknatu namsoh nohme?

¹¹ Khrista in amah turella marnop niuh ninaota nang khiial in nammaangpei.

¹² Nga tloh a nannih nan uh nannao chunga aleh tloh a che chim chimnoh akrom anmah anrilta namisoh i Khrista kuunga alehthlouta nantlohpei.

¹³ Alamchunna Saakphuin kiuh knaota thranoh ting mathlaak sangle, keiin kiuh knaota thranoh a kamthlaak angutva tiknikho stak saanohtung.