1 KORINTHIA 16 - Akthar Trongirhna (BSI)

Amlot Kulsaei Relna Baobeh Malan

¹ Ipek akseeng miiei turella baobeh malanjou relna: Kalatia na khakla in maita antlohnatu keiin nankuunga kamtheih choukha mah khananga, nannihkho tlohve,

² Kouhrel matsah aknia, nannih khatkhat in nanphah chaanga matlon choulaia sihve chunna keiin kithlenglai namilan tuphu inthrainatu.

³ Mahche keiin kitlunglai, nannih in nanjamiita trongjihthuun soh nankuttholta phurh a Jerusalem a kamthlahtuei.

⁴ Keikho seh aja tupotle, anmah in keisoh inruuia sehtuei.

Paul in Anchaangna

⁵ Mesidonia vanna kisehlai nankuunga thlengtung, alamva Mesidonia ta vanna kisehjahang,

⁶ keiin nannihsoh amjouta jaleva nohle phalbi akho nannihsoh amjouta jaleva, mahchunna ramram ame keita miiramma namiseh natung.

⁷ Keiin pek aphom khatnata khat ah kisehlaiva nannihsoh inmuhdah ang; Ringpu in keijaleva lai kakva nannihsoh kiamjahang.

⁸ Chuta keiin Pentikos ni phah Ephesia ah amtung,

⁹ alamva kanana thlou tlohnatu inn khat laakta inhoonga amsa, mahkhata akjetmii tammei.

¹⁰ Timothi in athlenglai, arillumma anmah ankaar a amnatu anve, alamva keiin kitlohnanga Akpu thlouta amah inkho atloh.

¹¹ Tukhat inkho amahta usitnoh tlohnoh eiso. Intha a lamma leh oia thulve chunna amah in keikuunga anlengnatu, unaoeisoh anthlengjou natu keiin ramrinna amsang.

¹² Unao Appolos relna, amahta keiin unaoeisoh inruuia nanian asehnatu tranga kiktak, chuta pek nankuunga athlengnatu amah in amdon veinoh inaisa, chuta akthra tancha athlenglai amah in thleng uningsa.

Achena Trong

¹³ Cheksilve, namilotna khanna tranga ngirve, rilvol amma nantloh nankhal veiso.

¹⁴ Thlou naamte rilvol amma tloh khalve.

¹⁵ Unaoeio, pek nannih in nanrom mah chuvah Stephanas in Akhaia ramtu veia matsahrem Khristen in ol taploikuung veisa, che anmah in akseeng mii eita routlohnatu anril amluut,

¹⁶ mahkhanang miisoh tlohkhal jouva akchek amneh ei anthlanga nan amnatu tranga kisonchou.

¹⁷ Keiin Stephanas, Phorkhunatas che Akhaikas anthleng in kiroomthoksa, alamva nannih nan amnohlai intlohtuphu thlou anmah in antlohpei;

¹⁸ alamva anmah in inih irilta amithrappei. Mah khanang mii eita ansak maromve.

¹⁹ Asia ah am khakla ei in nankuunga saambaan nanimthlah. Akuila leh Priska in an inna anboompi khakla soh inruuia nannihta Akpu ninga saambaan nanimthlah.

²⁰ Unao pasa annaam in nannihta saambaan nanimthlah. Akseenga inchoh a khatleh khat saambaan inpeve.

²¹ Paul keiin mah saambaan i kikuttak in kamjih.

²² Tunangkhat in Akputa rilvolnohle, atakchunga phooltlung veitu.

²³ Inih Akpu Jisu va malungsi in nanimruui veiso.

²⁴ Nannihta kirilvolchou i ralthloia Jisu Khrista in nantakchunga am veiso.