Biblia Todo Logo
Bìoball air-loidhne

- Sanasan -

1 JOHN 5 - Akthar Trongirhna (BSI)


Tukleiramta Raalchek

1 Jisu i Christa sa tih a amlot miinaam in Ringpu vaa asasa, che amah Apakho rilvol mii in Asakho arilvolpei.

2 Onna inih in Ringpu ta rilvolla amah trongthuun eita imjuihlai khanna Ringpu asaeikho iringvolsei tih a irommang.

3 Ringpu ta rilvolli maire, mah chuvah inih in amah trongthuunta ingaak. Amah trongthuunvah pootriknoh.

4 Alamva Ringpu nata akpokmii in tukleiramta achekpei; tukleiramta ichek i inih in imlot apaalla raal ichek.

5 Tukleiramta akchek chuche Jisu i Ringpu vaa Asa kupa tih a amlot miichu tunangme?


Jisu Khrista Rella Sakhi Malan

6 Tuiisoh mahche thiisoh akthlengkha mah khasa, Jisu Khrista, tuii khop noh chuta tuiisoh thiisoh inruuia thlengsa.

7 Che Li in sakhisa alamva Li vah akchimkhasa.

8 Sakhi inthum am, ohchuva Li, tuii, mahche thii, mah inthummi injaei.

9 Inih in miivaa sakhita loumele, Ringpu vaa sakhi in ralla liin; alamva Asa kupa rella amlan sakhikha Ringpu tingna sakhisa.

10 Ringpu Asa kupata amlot mii in ataktalla sakhikha amsa. Ringpu ta amlotnoh miikhan amahta amchinthi amthlaak, alamva Ringpu Asa kupa rella amlan sakhikhata amah in malotnohsa.

11 Sakhi chuva Ringpu in ache amnoh chaan inimlanpei, mah chaanni Asa kupa ah am.

12 Tukhat in Asa kupata amah kuungah amle akring punsikha amah kuungah amsa; tukhat in Ringpu vaa Asa kupata atak kuungah amnohleh akuungah chaankha amnoh.


Ache Amnoh Chaan

13 Ringpu Asa kupa minga amlot mii in ache amnoh a ringa am tih i nanromnatu mah i nankuungah kimjihpeichou.

14 Che amah kuungah iril imthrumnavah oire, mah chuvah amah in amdon nujuih a jangmekhat darkaar amchu nihmele amah in atheih.

15 Inih in inihkhata amah in atheih tih a inih in irom, inih in amah kuungah inihkha akuungnata iphahtuta irom.

16 Tukhat unaopasa in thihna vanoh tupot a aleh atlohta muhleh nangin ngenro, che Ringpu in chaan amahta amlantu, alamva anmah alehkho am; mah kharella amah in ngensota keiin tihnoh ang.

17 Chimnoh thlou anaam aleh, chuta athih nainoh aleh am.

18 Tukhat in Ringpu tingah pokle aleh tlohnohsa tih a irom chuta Ringpu ah akpokmii in akroua inkem inseel, che thranoh in amahta mamaangnoh.

19 Inihvah Ringpu atame mahche tukleiram apumte thranoh tuuikhat athlangah amme tih a irom.

20 Che Ringpu Asa kupa thlengsa, akchim amahta romma roulou itheihnatu rilta inimlanpei tih a irom; che inihvah amah Asa kupa Jisu Khrista akchimkuungah amsame. Amahvah akchim Ringpu, che ache amnoh chaan khasa.

21 Indih naoeio, leili mathruunnata nanroua inseel inkemve.

Tarao New Testament - Akthar Trongirhna

Copyright © 2017 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan