1 JOHN 4 - Akthar Trongirhna (BSI)

Akchim Khatkho Chimnoh Li

¹ Kirilvol eio, li naamteta malotnohve, chuta li eita Ringpu atame chunoh a atanohme nanromnatu chaang anve; alamva tukleiramma chimnoh ringraan khalmo intheksei.

² Ohkhanna Ringpu vaa Li li noh ta nanromtu: Jisu Khrista in ruung veia thlengsa tih a akphoong khavah Ringpu tingnasa,

³ Jisu vah Ringpu tingnanoh tih a akphoong li naamte khavah Ringpu tingnanoh. Mah i Khrista ta andah lisa, che ipektel tukleiramma amsa.

⁴ Indih naoeio, nannihva Ringpu tingnachou, nannih in anmahta nanchekpei; alamva tukleiramma ak am amahkhachunga nankuungah ak am amah in ralla liin.

⁵ Ringpu vaa Asa kupa Jisu khanoh a che Jisu i Ringpu vaa Asa kupa tih a amlot mii khanoh a tukleiramta akchek miikha tume?

⁶ Inihva Ringpu atasame. Ringpu akrom mii tukhat in itrongta arungeih, Ringpu tingnanoh amahkhan itrongta rungainoh; onna akchim linohme tih a irom.

Ringpu vaa Rilvoltheih

⁷ Kirilvol eio, khatleh khat ril involrei; alamva rilvolli Ringpu tingna, rilvol rommii in Ringpu tingnata pok mahche Ringpu ta arom.

⁸ Rilvol amnoh mii in Ringpu romnoh; alamva Ringpu vah rilvol arom.

⁹ Ringpu arilvolta inih ikaara inimmuh, mah chuvah Ringpu in Asa kupa khalekruta tukleiramma amthlahpei, onna inih in amah apaalla ring iphahnatu relnasa.

¹⁰ Amah rilvolchu oisa inih in Ringpu ta irilvol tihtanohme chuta amah in inihta inirilvol che inih ileh turella Asa kupa inkhatruta amthlahpei.

¹¹ Kirilvol unaoeio, Ringpu in inihta vachah inirilvol taningvah, inih inkho khatleh khat ril involtu tlasame.

¹² Tukhat inkho Ringpu ta roumuhnoh; inih inta khatleh khat ril involmele, Ringpu in inihkuungah am, che amah arilvolkha inihkuungah mapung phasa.

¹³ Onna inih in irom mah chuvah inih inta amah kuungah ammele amah inkho inihkuungah am, alamva amah Li ta inimlanpei.

¹⁴ Che tukleiramta akal Akpu veia Apa in Asa kupa amthlah peita inih in imuhpei, che chim tih ta sakhi imlanpei.

¹⁵ Tunangkhat in Jisu i Ringpu vaa Asa kupa tih a phoongleva, Ringpu in amah kuungah am, mahche amah inkho Ringpu kuungah amsa.

¹⁶ Chunna Ringpu in inihta inirilvolli inih in irom che imlot. Ringpu vaa rilvoltheih che amah rilvolkhanna am mii in Ringpu kuungah am; che Ringpu inkho amah kuungah am.

¹⁷ Onna amah rilvolta inihkuungah mapung amphapei, chunna pichaar aknia inih in iriltuia iamnatu, alamva amahnanga inihkho tukleiramma veime.

¹⁸ Rilvol in intritna amnoh, chuta rilvol in intri hangta ammaang. Alamva intriva tandi phahna veitu, che intri mii in rilvolta mapung maphanoh.

¹⁹ Inih in irilvol, alamva amah in matsah a inihta inirilvol.

²⁰ Tukhat in, “Keiva Ringpu kirilvol” atihche amah unao pasata intirhleh, amahvah chinthimii; alamva amah in amuh unaopsata rilvolnoh a amuhnoh Ringpu ta rilvolva cheknohtu.

²¹ Amah ningnata iphah trongthuun chuva maisa, Ringpu ta arilvol amahkhan amah unao pasakho arilvoltu.