1 JOHN 3 - Akthar Trongirhna (BSI)

Ringpu Asa ei

¹ Anve inihta Ringpu asachouta inionga inih Ipa in jikcha phah a inirilvolta inimlanme; che inih in mahtal chuta veisame. Mairella jarella tukleiram in inihta iniromnohme tih i tukleiramin amahta romnoh relna.

² Kirilvol eio, ipek inih i Ringpu asame; inih in jangvei umeme mah chuvah inihkuungah madangnohmang, chuta amah in andanglaia inih in amahnang vei umeta irom, alamva amah atakta amahnanga imuhtu.

³ Che amah kuungah matuur ak am mii naamte in Akpu vah akseeng taningva, ataktalkho amseeng.

⁴ Aleh aktloh miinaam in trongsuur majuihnoh rella amraal amsa; alehvah trongsuur amnoh.

⁵ Nannih in nanrom mah chuvah alehta alohnatu atak indangsa, che amahningva aleh amnoh.

⁶ Amah kuungah chet a am mii in aleh tlohnoh; aleh aktlohmii in amahta muhkho muhnoei che romkho romnoh ei.

⁷ Indih naoeio, tukhat inkho nannihta nanisimnanoh eiso. Akpu va akchim, akchim aktlohmii in akchimlamseh veitu.

⁸ Aleh aktloh miiva rapputasa; alamva rappuva kulkuung nata aleh tloh a thlengsa. Jarelna tihva rappu athloueita mamaangnatu Ringpu Asa kupata amdangpei.

⁹ Ringpu nata akpokmii in aleh tloh a amnoh; alamva Ringpu ningah louam akringkha amahningkho chet a am, che amahva aleh tlohcheknoh alamva amahva Ringpu kuungnata pok.

¹⁰ Onna tunang in Ringpu asanohme che tunang in rappu asame tihchu imuhnatu tukhat akchim aktlohnoh miikho nohle amah unao pasata rilvolnoh miikha Ringpu tingnanoh.

Khatleh Khat Ril Involve

¹¹ Alamva kulkung nata nannih in nantheih trongraanva, inih in khatleh khat ril involtu tlame,

¹² che Ken in thranohkhat veia anaokupata athat khananga veinohrei. Jarella anaota athatme? Alamva amah athloukha thranoh che anaovah chim.

¹³ Unaoeio, tukleiram in nannihta nantirh eileh salungkhou nohve.

¹⁴ Inih in thinata chaantingah ikvanpei tih a irom, alamva unao pasata iringvol. Tukhat in rilvolta dinohle mahmii khavah akthi veia ammang.

¹⁵ Tukhat in amah unao pasata intirhleh amahvah miithat mii, che miithat mii in ache amnoh chaan akuungah amnoh tih a nanrom.

¹⁶ Mairella innih in ringvol irom, mah chuvah inihrella amah chaan amthlahpei; che inih in unaopasa turella chaan imthlatutla.

¹⁷ Chuta tukhat in tukleiramna lal adoonche chuta amah unaopasa andarkaar amta amuhche ringvolril atak a amnohleh, khatloh a Ringpu rilvol akuungah ammume?

¹⁸ Indih naoeio, inih in trongah nohleh nar ah ril involnohrei chuta athlouin khatkho akchimmah ril involrei.

Ringpu Amaikuungah Iril Matrang

¹⁹ Mairella inihvah akchim atasame, che amah amaikuungah iril lumme tih a iromtutla.

²⁰ Iril in inihta inimlaal laia; Ringpu in inih irilchungah ralla liin, che bilam naamte aromkir.

²¹ Unaoeio, iril inta inimlaal nohle, Ringpu amaikuungah iril lumme;

²² che inih in ingennaamte amahkuungnata iphahkir, alamva amah trongthuun eita inih in ingaak amahta mapelnatu itloh.

²³ Che oh i amah trongthuunsa, mah chuvah amah trongthuun in asonta inihkuungah inimlan nanga Asa kupa Jisu Khrista vaa akminga inih in imlottutla che khatleh khat ril involtu tlame.

²⁴ Amah trongthuunta amjuih akngaak miinaamtea che amah inkho ankuungah am. Che mairella inih in irom, amah in inimlan livaa apaalla mah in inikuungah am.