1 JOHN 2 - Akthar Trongirhna (BSI)

Inimjoom Khrista

¹ Indih naoeio, nannih in aleh nantlohnoh natu maita nankuungah kimjih, chuta tukhat in aleh tlohle, Pa kuungah inihngut a trongtloh akchimlamseh Jisu Khrista am;

² inih ileh rella inithloknatu inkatpot veisa, inih ikroukhoptu relna noh chuta tukleiram apumtevaa anleh turelna.

³ Che inih in amah trongthuun eita ngaakmele onna amahta irompei ta seengsa.

⁴ Tukhat in, “Keiva amahta kirom” atihche chuta amah trongthuunta majuihnoh lehvah amahva amchinthi che akchimkha akuunga amnoh,

⁵ chuta atrongta akngaak tukhat in atak a Ringpu arilvolta amah in mapung amphapei. Onna inih in amah kuungah amme tih i seengme:

⁶ tukhat in akuungah ammang tihle amah in aseh alonnasoh intrimma amah inkho sehtutla.

Akthar Trongthuun

⁷ Kirilvol eio, akthar trongthuunta keiin nankuungah majihnoh ang, chuta kulkung nata nanninga amche amlui trongthuun khare, amlui trongthuun chuva nannih in nantheihchepei.

⁸ Chulata veikhatla keiin nankuungah akthar trongthuunta kimjih mah i amahtingkho che nannihtingkho akchim alam inthimta amvaarpei mahche akchim kvaarkha intlesa.

⁹ Tukhat in amahvah akvaara ammang atihche amah unao pasata intirhleh amahva pekphah a inthimmah ammang.

¹⁰ Amah unao pasata rilvol mii khanna akvaara am, che mah khanna keh masuihnatu amnoh.

¹¹ Chuta amah unao pasata intirh tukhat in inthimmah ammangche amah in inthimma sehmang, chuche amah in ramma seh angme tihkho romnoh, alamva inthim in amah amitta amchohpei.

¹² Indih naoeio, keiin nankuungah kimjih, alamva amah alehta a ippei.

¹³ Pa eio, keiin nankuungah kimjihchou, alamva kulkung nata am amahta nannih in nanrom. Intlangeio, keiin nankuungah kimjihchou, alamva nannih in thranoh khata nanchekpei. Naoeio, keiin nankuungah kimjihchou, alamva nannih in Pa ta nanrom.

¹⁴ Apa eio, keiin nankuungah kimjihchou, alamva kulkung nata louam amahta nannih in nanrom. Intlangeio, keiin nankuungah kimjihchou, alamva nannihvah trongchou, mahche Ringpu trongkha nankuungah am mahche nannih in thranohta nanchekpei.

¹⁵ Tukleiram nohleh tukleiram asuunga am poot eita nanrilvolnohve. Tukhat in tukleiramta aril involle, Pa ta rilvolkha atak a amnoh.

¹⁶ Alamva tukeiramma am anaamte, ruung in akdit che mit in akdit chaanta in orh i Pa ningnanoh chuta tukleiramna.

¹⁷ Tukleiram mahche tukleiramta kdikha maang umang; chuta Ringpu in amdon aktlohmii in ache amnoh a ringa amtu.

Khrista ta Jekna

¹⁸ Naoeio, mah i achena pungsa; nannih inkho nantheih khananga, mah chuvah Khrista akjanoh eikha thlengsei, pekkho Khrista ta indah tam thlengsei; alamchunna inih in iromva mah i achenava pungsa.

¹⁹ Anmah in inihkuungnata inthruhsei; chuta anmahva inih itanoh ei; alamva anmah inta inih mii vei eileva, anmah in inihsoh amjou tuei; chuta annaamteva inih imiinohsei tih i aseengnatu anmahva sehsei.

²⁰ Chuta nannihva Akseeng khat in thao naniteipei, che nannaamte in nanrom.

²¹ Nannih in akchimta romnohchou tihrella keiin mah i majih tanoh ang, chuta nannih in akchim nanromrella, che masimna trongi tikniakho akchimnata thlengnoh tih a romve.

²² Jisu vah Khrista sa ta andah mii khanoh a amchinthikha Apata mahche Asa kupata indah miikhan Khrista ta jekna vei.

²³ Asa kupata indah miikhan Apata indahsa. Asa kupa kuungah amah alehta phoonga akluut miikhan Apakho aphah.

²⁴ Nannih in kulkung nata nantheihkha nantak a amso. Nannih in kulkung nata nantheihkha nantak ata amleh, chuleva nannih inkho Asa kupa kuungah che Apakuungah incheknoh a am muchou.

²⁵ Amah in inihkuungah trongchet amlanchuva maire, mah chuvah ache amnoh chaan khasa.

²⁶ Nannihta nanisimnasam miiei kharella mah ita kimjihchou;

²⁷ chuta akuungnata nanphah thao naniteikha nantak ah am, mahche tunangkhat in nannihta nanimtheihnatu nankuungah darkaar amnoh; amah in thao naniteikhanna bilam nannihta nanimtheih, mah i chim, mii masimnanoh, oh inna nannihta nanimtheih khananga, amah kuungah chet a amve.

²⁸ Che naoeio, ipek amah kuungah amve, mah chuvah atak andanglai inih in iril matui mahche amah in athlenglai inih in injak a inlengnoh natu.

²⁹ Amah i akchim tih a romchoule, akchim aktloh miirel in amahkuungnata pok ta nantak a seenga nanromnatu.