1 JOHN 1 - Akthar Trongirhna (BSI)

Chaanvaa Trong

¹ Kulkung nata louam, inih in itheihche, imit in imuhche, mahkhata inih in ianche iku in ipal, chaanvaa trong turella.

² Chaanta amdangpei, che mahkhata inih in imuhpei, che amahkharella inih in chimta sakhi imlan, che Pasoh amjouta inihting inimdang ache amnoh chaanta nankuungah kanson peichou.

³ Kannih in kanmuhche khatkho kantheihcheta nankuung akho sonna kamidangchou, chunna nannih in kannihsoh nanruuijounatu; che inih in inruuijoume i Pa leh Asa kupa Jisu Khrista in ninruuipi.

⁴ Chuche inih in iroomthokta mapung imphanatu mah i nankuunga kamjihpei.

Ringpu vaa Akvaar

⁵ Kannih in amahkuung nata kantheihche chuche nankuungah kamidang trongva maisa, mah chuvah Ringpu i akvaar che akuungah inthim amnohluung.

⁶ Inih in inthimkaar isehlaia amahsoh inruuijoume tihmele, inihvah imchinthime, che akchim nujuih a ringnohme;

⁷ chuta amah in kvaarah amnanga inih inkho akvaara sehmele, inih in khatleh khat inruuijoume, che amah Asa kupa Jisu athii in inih ileh naamte nata inimseeng.

⁸ Inih inta kannihvah aleh amnoh ung tihmele, inih ikroua insimna same, che akchim itak ah amnoh.

⁹ Itak in inih ilehta phoongmele, inih ilehta ipnatu mahchu chimnoh lamseh anaamte nata inimseengnatu amahva malot aja mahche akchim.

¹⁰ Inih inta aleh tlohnohluungang tihmele, inih in amahta machinthi imthlakpei, che amah trongta itak a amnoh.