Mătti 4 - Tamasheq

Ăžžurrăb Iblis Ɣisa

¹ Oɣăd Unfas Šăddijăn Ɣisa ḍarăt-a-wen s-tenere i-ad-t-ižžurrəbət Iblis.

² Ija dihen əkkoẓăt timərwen n-ehăḍ d-ašăl, ăẓum, wăr-ikša, wăr-iswa. Šămad tokay tăqqăn-ten-dăɣ, ad-ălluẓ.

³ Ălwăqq-wen-dăɣ ad-t-ohăẓ Iblis-i n-ălmužărrib, innʼ-as: «Šămad kăyy a-s Rure-s n-Măssinăɣ, ănn i-tihun-ti-dăɣ ad-umasnăt tijəlwen!»

⁴ Innʼ-as Ɣisa: «Iktab dăɣ-măjrăd n-Măssinăɣ a-s: ‹Tămudre n-ăgg-adəm, wăr təmdă făl tetăte ɣas, iddăret daɣ s-e d t-illăm măjrăd dd-izjarăn emm n-Măssinăɣ.› »

⁵ Iwwăy-t Iblis ḍarăt-a-wen s-aɣrəm wa šăddijăn n-Yărussălam, ijʼ-e făll-afălla n-ehăn n-ămudd wa măqqărăn, innʼ-as:

⁶ «Šămad kăyy a-s Rure-s n-Măssinăɣ, ăyy iman-năk s-ăkall ed iktab dăɣ-măjrăd n-Măssinăɣ a-s: ‹Ad-săr-k dd-amăr Măssinăɣ ănjălosăn-net əkbəlăn-kăy dăɣ-ifassăn-năsăn i-ad-wăr hak-rəssəl wăla-dăɣ tăhunt tiyyăt ɣas.› »

⁷ Innʼ-as Ɣisa: «Iktab daɣ dăɣ-măjrăd n-Măssinăɣ a-s: ‹Wăr-e tarəməd Emăli-năk, Măssinăɣ.› »

⁸ Iwwăy-t daɣ Iblis s-aḍaɣ iyyăn iknan aḍkul, issəknʼ-e əddəwəlăn n-ăddunya iket-net d-ălxurmăt-năsăn, innʼ-as ămăra:

⁹ «Hakkăɣ-kăy a-wa-dăɣ iket-net, afăl dat-i tărkăɣăd, tăɣbădăd-ahi.»

¹⁰ Innʼ-as Ɣisa: «Iblis, ajəj-ahi; iktab dăɣ-măjrăd n-Măssinăɣ a-s: ‹Ăɣbəd Emăli-năk Măssinăɣ, ənta ɣas a fălla-k ilan ălxidmăt.› »

¹¹ Oyyʼ-e Iblis ḍarăt-a-wen, osăn-t-dd ănjălosăn ăssaɣăt-wen-dăɣ, ăxdămăn-as.

Sănto n-ămašal n-Ɣisa dăɣ-taɣrəmt ta n-Qăfărnaxum

¹² Islă Ɣisa atărməs n-Exya wa n-Enəsselmăɣ ɣas, ikkă teje ta n-Galila.

¹³ Izjăr taɣrəmt ta n-Năṣirăt, iglă izzăɣ ta n-Qăfărnaxum, a-wen taɣrəmt hat asălim n-ejănš wa n-Galila dăɣ-attayăn n-teje ta n-Ẓabilun d-ta n-Naftali;

¹⁴ ămoos a-wen a ăssiitbătăn măjrăd wa ija ănnăbi Saya a-s innă:

¹⁵ «Ya kăl-Ẓabilun, ya kăl-Naftali! Kăwăneḍ-i hănen asălim d-ejănš wa n-Galila, Kăwăneḍ-i hin-əllanen i-ejănš wa n-Ɣurdəni, săjdăt! Kăwăneḍ-i n-kăl-teje ta n-Galila əzzăɣăn inəẓẓulam, săjdăt!

¹⁶ Tamətte ta hăt tihay, ămlăwlăw-dd fălla-s ănnur măqqărăn, ăddinăt daɣ wi s-kăla əzzăɣăn tihay ti hănen tamăttant, ašăl-i, ăzzubbăt-dd fălla-săn ănnur.»

¹⁷ Ɣur-dihen-dăɣ ad-issənta Ɣisa ămašal-net, ixaṭṭăb, ijanna i-ăddinăt: «Utabăt făl-a-s Təmmənəya n-Măssinăɣ, tohăẓ-dd.»

Inəṭṭulab n-Ɣisa wi ăzzarnen

¹⁸ Irjaš Ɣisa ašăl iyyăn dăɣ-asălim n-ejănš wa n-Galila a-s inhăy əssin ayətmatăn: Simyon wa s-itawănna Bəṭrus d-ăŋŋa-s Idris, təjjarăn tătart-năsăn dăɣ-aman ed iməhhuyya n-imănan a ămoosăn,

¹⁹ innʼ-asăn: «Ǝlkəmăt-ahi, ad-kăwăn-ăjăɣ meddən săr-i dd-sadawnen ăddinăt i-ad-tăn-ăɣləsăɣ.»

²⁰ Oyyăn titarren-năsăn ălwăqq-wen-dăɣ, əlkămăn-as.

²¹ Illa-hin i-dihen, olăs daɣ Ɣisa ahănay n-əssin ayətmatăn iyyăḍ: Yaqub d-ăŋŋa-s Exya, han turăft n-aman əntăneḍ d-abba-năsăn Zăbdi, samăkrasăn titarren-năsăn; iɣrʼ-en-dd s-iman-net əntăneḍ-dăɣ.

²² Oyyăn abba-năsăn hakd turăft n-aman dihen-dăɣ, əlkămăn-as ălwăqq-wen-dăɣ.

Ăzozăy Ɣisa imarhinăn dăɣ-teje ta n-Galila

²³ Ălliil Ɣisa teje ta n-Galila iket-net, isaɣra ăddinăt dăɣ-ihănan n-ăddin wi n-kăl-Ălyăhud, ixaṭṭăb isălan n-Ălənžil n-Təmmənəya n-Măssinăɣ, izizuy ăddinăt dăɣ-turhənnawen-năsăn d-ălɣibăn-năsăn.

²⁴ Intăj isəm-net dăɣ-ăkall iket-net har ăwwăḍ Surya. Tamawayăn-dd săr-s imarhinăn d-inaɣyabăn d-iməlšan d-wi təjrăw tašăkărkărăt d-inəbdan, izizuy-tăn iket-dăɣ-năsăn.

²⁵ Dăɣ-asikəl-net, təlkam-as tamətte tăjjeet han ăddinăt dd-falnen teje ta n-Galila d-tidbi ti n-mărawăt; iyyăḍ, Yărussălam d-Ălyăhudəyăt d-illa-hin i-Ɣurdəni sihen ad-dd-falăn.