Kăl-Roma 9 - Tamasheq

Tisnant n-iman ta ija Buləs dăɣ-təssəba n-kăl-Iṣrayil-i ăsɣărnen ulhawăn-năsăn i-Măssinăɣ

¹ Năkk-i s-ašăl-i-dăɣ osaɣăɣ d-Ɣisa Ălmasex, tidət a hawăn-janneɣ wădden bahu, Unfas Šăddijăn iman-net a hi-oɣadăn dăɣ-ənniyăt-in dăɣ-a-wa s-ărheɣ ad-hawăn-tăn-ănnăɣ.

² Ărɣan iman-in, ărɣan; jan tisnant wărăt kəttəl.

³ Ăsniinăn daɣ hullan dăɣ-isălan n-a-wa dd-iqqălăn ayətma wi n-kăl-Iṣrayil. Diha t-əlleɣ, kud irha făw təwăr-ahi tilɣant, ənməjjəjăɣet făw d-Ălmasex i-ad-dăr-s ənmihəẓăn əntăneḍ, əjrəwăn əlɣəllas.

⁴ Kăl-Iṣrayil, Măssinăɣ a tăn-dd-ijăn s-iman-net, ăswăr-tăn ănnur-net, ănmăjjaš dăr-săn ărkăwălăn n-tassaɣt, ăzzăbbăt fălla-săn alămăr wa n-Mosa, issəlmăd-tăn ălɣibadăt n-Măssinăɣ wa n-tidət, ijjăš-asăn ărkăwălăn ăjjootnen.

⁵ Ǝntăneḍ a lănen imărawăn-nănăɣ wi n-ibda dd-izjăr Ălmasex s-eɣăs-net ənta-i n-Măssinăɣ-i t-illan jənnəj-hărăt iket-net. Naməlet-t, amin!

Măssinăɣ, a-wa s-ijjăš ărkăwăl-net, ad-t-ăj

⁶ A-wa hawăn-jănneɣ, wădden i n-a-s innin ărkăwăl wa hasăn-ijjăš Măssinăɣ, ăbboṭṭăl-in. Ăbo, ănn-ak, wădden ăddinăt iket-năsăn wi-dd-əzjărnen Iṣrayil a ămoosnen dăgg-Iṣrayil wi n-tidət.

⁷ Wădden daɣ ăddinăt iket-năsăn wi dd-əzjărnen Ibrahim a-s ihăyawăn-net wi n-tidət, əktəwăt-dd a-s Măssinăɣ iman-net a innăn i-Ibrahim: «Isxaqq a hak dd-e-əzjărăn ihăyawăn.»

⁸ A-wen ălmăɣna-net a-s wădden aratăn wi s-dd-issəbăb ăgg-adəm, a-s wi n-Măssinăɣ, ănn-ak, aratăn-net a tăn-ămoosăn, wi s-dd-issəbăb ărkăwăl wa ijjăš i-Ibrahim.

⁹ Ărkăwăl-en, ənta da a-wa dăɣ-s innă Măssinăɣ i-Ibrahim: «Ad-kăy-dd-ăqqəlăɣ dăɣ-ăzzăman šund wa-dăɣ, a-s kăy-dd-e-ăqqəlăɣ s-ăzzăman-en, təkraš-ak Sarăta alyaḍ.»

¹⁰ A-wa has-innă Măssinăɣ, wădden Sarăta ɣas a ɣur-dd-imdă, innʼ-en daɣ i-Răbka ta n-hănne-s n-Isxaqq-i n-abba-nănăɣ iket-nănăɣ ed təkrăš-as eknewăn s-əmmək-wen-dăɣ.

¹¹ Hărwa wăr-əwen eknewăn-en-dăɣ, hărwa wăr-ămešălăn a olăɣăn wăla a lăbasăn a-s imməjrăd Măssinăɣ i-Răbka, issəlmăd-tăt s-wa ăsnăfrăn jere-săn; ămoos a-wen erhet n-Măssinăɣ wădden făl təssəba n-emărked jan i-ad-dd-iɣăr s-iman-net wa s-irha.

¹² A-s ităjj a-wen, innă Măssinăɣ i-Răbka: «Ad-ăkkălăt wa n-amăqqar i-wa n-amăḍray.»

¹³ Ǝnta-den-dăɣ a-wa ijăn ed innă Măssinăɣ iman-net: «Ăssofăɣ Yaqub uhən Iso.»

Măssinăɣ, enəsdebbăr n-iman-net

¹⁴ Ak ajăn a-wa ija Măssinăɣ, ajăn ad-hanăɣ-isəwwənn a-s Măssinăɣ, wăr-oɣed? Aa făw, wădden a ijan a-wen

¹⁵ ed Măssinăɣ iman-net a innăn i-Mosa: «Sanseɣ ărrăxmăt-in făll-ere wa s-ărheɣ, naqqʼ-ahi tăhanint n-ere wa s-ărheɣ.»

¹⁶ A-wen wădden a dd-izjarăn erhet n-ăgg-adəm wăla ăṣṣahăt-net, tăhanint n-Măssinăɣ a dd-ifal.

¹⁷ Iktab dăɣ-əlkəttab a-s innă Măssinăɣ i-Firɣăwna: «Jeɣ-kăy əssəbab i-ad-səlmədăɣ s-tărna-nin i-ad-itwăxṭəb isəm-in făll-ărori n-ăkall iket-net.»

¹⁸ A-wen-dăɣ a făl ere wa s-oḍăn Măssinăɣ tăhanint, oḍăn-as-tăt, wa s-ăsɣăr ulh-net daɣ, ad-iɣar.

Măssinăɣ a-s ămaxlak d-ămănokal

¹⁹ Ămmukkăn a-s afăl əslăn iyyăḍ dăɣ-wăn i-măjrăd-wen-dăɣ, ad-dd-əggədăn, ənnən: Măssinăɣ adiš, ma s-isawar dăgg-adəm uḍlem? Ajăn mi ăddooben aẓəẓẓəwi n-iman-net data-s? Wădden a-wa s-irha ɣas a itajj.

²⁰ Uhən kăyy-i n-ăgg-adəm dd-tajjăšăn inəzjam šund-win-dăɣ, mi tămoosăd făw tamăzaɣăd d-Măssinăɣ? Kăla tənhăyăd aɣăsis isastan ere wa t-iknăn d-ăddălil wa făl t-dd-ikna.

²¹ Wădden ere wa ikannăn iɣsas, a-wa s-irha ɣas a itajj, tălaɣt a iḍarrăẓ təzzar ikən săr-s jer-aɣăsis ilan ălqim d-i t-wărăn ila. Tălaɣt-en-dăɣ a-s ikann a-wen-dăɣ iket-net.

Derhan n-Măssinăɣ i-kăl-Iṣrayil

²² Măssinăɣ daɣ, isakna aḍkăr-net i-ad-isəlməd s-tărna-net. Ăhoja ăẓiẓăydăr i-wi ăniihăjjănen d-aḍkăr-net wăren ănhăjja ar d-əlhəllak

²³ măšan wi s-oḍăn tăhanint s-irha ad-t-səmɣărăn, irha daɣ ad-tăn-isənnəfləy dăɣ-ălxurmăt-net.

²⁴ Teɣăre ta hanăɣ-dd-ija Măssinăɣ s-iman-net năkkăneḍ-i n-kăl-Ălyăhud, ənta daɣ a dd-ija i-tiwsaten ti iyyăḍnen n-inəẓẓulam

²⁵ s-əmmək wa s-tăn-innă ănnăbi Ozi dăɣ-əlkəttab-net a-s innă, innă Măssinăɣ: «Tamətte ta s-ibda wăr tămoos ta-nin, ənta ămăra a he-ăjăɣ tamətte-nin. Tamətte ta s-ibda tătiwăksăn, ənta a he-tumasăt ta əkneɣ tărha.»

²⁶ Edăgg daɣ wa-dăɣ hasăn-ătwănnă: «Wăr tămoosăm tamətte n-Măssinăɣ», edăgg-wen-dăɣ iman-net a dăɣ-e-ətwăɣrən s-isəm: «Aratăn n-Măssinăɣ wa iddarăn.»

²⁷ Ănnăbi Saya ənta, innă: «kăl-Ălyăhud, kud-ărhan əjən əjut wa wăr jenăt timətwen n-ăkall dăɣ-asălim n-ejărew wa səmmăn tasəkkemt dăɣ-săn ɣas a he-ijrəwăn əlɣəllas»

²⁸ Emăli daɣ a-wa s-innă, ad-t-ăj, ăššăreɣa wa s-innă ilkam ad-t-dd-izəzzubbət făll-ăddunya, ad-t-ăj šik šik.

²⁹ Olăs daɣ ănnăbi Saya innă: «Ǝnnăr wăr hanăɣ-dd-oyya Măssinăɣ-i n-Măssi-s n-ajhanăn hărăt dăɣ-əzzurəyăt-nănăɣ, ašăl-i-dăɣ, noolăh ɣas d-iɣărman wi n-Sodoma d-Gomora-i ihlăk.»

Ăddălil wa făll-innăḍ Măssinăɣ făll-kăl-Iṣrayil

³⁰ Ma săl a-wen? Inəẓẓulam-i wăren təmmăɣ i-iqqud dat-Măssinăɣ, ijʼ-en immun-năsăn s-Măssinăɣ imaɣdalăn data-s lanen idəm. Immun-năsăn s-Măssinăɣ a săr-săn dd-orăwăn a-wen.

³¹ A-s ija a-wen kăl-Iṣrayil əntăneḍ, amišəl n-a-wa innă alămăr a-s tattărăn ad-tăn-ăkf idəm dat-Măssinăɣ măšan, indăr-asăn ad-dd-săɣsəlăn a-wen.

³² A-wen-š ma t-ijăn? Adiš əttărăn ad-əjrəwăn iqqud išlayăn i-wa ihakk immun s-Măssinăɣ. Ǝttărăn ajăraw n-a-wen s-a-wa tamašalăn, ămoosăn ɣas šund ăddinăt s-tărsal tăhunt har išwar oḍan.

³³ Ija a-wen s-əmmək-wa-dăɣ s-ătwănnă, innă Măssinăɣ dăɣ-isălan n-Ɣisa: «Ǝnhəywăt! Sanseɣ tăhunt rassălăt i-ăddinăt dăɣ-aɣrəm wa n-Sayon. Ad-tumas əssəbab n-ejăḍăl i-iyyăḍ măšan, ere fălla-s ăshătălăn-dăɣ, wăr-ilkem ad-ămmujrăẓ.»