Kăl-Roma 10 - Tamasheq

¹ Ayətma-ɣ, derhan n-ulh-in d-a-wa tattărăɣ hak ašăl dăɣ-Măssinăɣ da: ăɣləsnet kăl-Iṣrayil.

² Ăddoobeɣ tajuhe n-a-s kăl-Iṣrayil, ədgaẓăn hullan dăɣ-isălan wi n-Măssinăɣ măšan, wăr jen a-wen s-ənniyăt ijrahăn hărăt.

³ Ǝžhalăn hărwa dăɣ-isălan n-a-s Măssinăɣ a isaɣdalăn ăgg-adəm i-ad-ɣur-s ikrəš idəm wădden imărkedăn-net, a-wen, unjăyăn săr-s.

⁴ Ălmasex, a ɣur-dd-imdă a-wa innă alămăr, ere săr-s omănăn-dăɣ, ad-ikrəš idəm dat-Măssinăɣ.

Ere omănăn s-Ɣisa Ălmasex, ad-iɣləs

⁵ Dăɣ-isălan n-a-wa ihakkăn ăgg-adəm idəm dat-Măssinăɣ, innă Mosa: «Ere ămešălăn fărəḍăn wi əktăbnen dăɣ-alămăr, ad-has-umas a-wen-dăɣ əssəbab n-əlɣəllas.»

⁶ Măšan ašăl-i, immun-nănăɣ s-Măssinăɣ, issəlmăd-anăɣ a-wa hanăɣ-ihakkăn idəm dat-Măssinăɣ, innʼ-anăɣ: «Wăr tənned dăɣ-iman-năk: mi he-ikkən išənnawăn?» A-wen, azəzzəbbu n-Ălmasex dăɣ-săn;

⁷ wăr tənned daɣ: «Mi he-ikkən ider n-ăkall?» Ajăn wădden Ălmasex, ăru dd-inkăr jer-inəmmuttan.

⁸ Isălan n-a-wen-dăɣ, a dăɣ-hanăɣ-innă măjrăd n-Măssinăɣ: «Ašăl-i, măjrăd n-Măssinăɣ, ohaẓ-kăy, ihʼ-emm-năk, ihʼ-ulh-năk.» Isălan-win-dăɣ a hin-nəsasawaḍ dăgg-adəm i-ad-amənăn s-Ɣisa.

⁹ Ere iṭṭăfăn dăɣ-tămudre-net tənna n-a-s Ɣisa, Emăli, iflăs dăɣ-ulh-net a-s issənkăr-t-dd Măssinăɣ jer-inəmmuttan, ad-iɣləs

¹⁰ făl-a-s immun wa dd-ifălăn ulh n-ăwadəm a t-ihakkăn idəm ɣur-Măssinăɣ, wa iṭṭăfăn tənna n-a-wen s-emm-net, ad-t-iɣləs Măssinăɣ.

¹¹ Ǝnta-den-dăɣ a-wa innă əlkəttab n-Măssinăɣ a-s innă: «Ere omănăn s-Emăli-dăɣ, wăr-ilkem ad-ămmujrăẓ.»

¹² A-wen ămăra, wăr săr-s iẓley ăgg-Ălyăhud wăla wa t-wărăn ămoos ed iket-năsăn, iyyăn n-Emăli ihakkăn a olaɣăn s-əjut a oharăn, ere t-iɣrăn-dăɣ, ad-has-ăkawən.

¹³ Iktab a-s: «Ere iɣrăn isəm n-Emăli, omăn săr-s dăɣ, ad-iɣləs.»

Tăɣart n-ulhawăn n-kăl-Ălyăhud

¹⁴ Măšan, ăddinăt ya, əndek əmmək wa s-mad-əɣrən isəm n-Emăli a-s wăr săr-s omenăn? Ǝndek daɣ əmmək wa s-mad-săr-s amənăn a-s wăr kăla əslăn i-isălan-net? Ǝndek əmmək wa s-mad-əslən i-isălan-net a-s wăr t-illa ere hasăn-tăn-ixṭăbăn?

¹⁵ Ǝndek əmmək wa s-mad-hasăn-ətwăxṭəbăn a-s wăr t-illa ere săr-săn ămešălăn? Təssəba n-a-wen-dăɣ a făl innă əlkəttab n-Măssinăɣ: «Tihusay ija ass n-imawayăn n-isălan n-Ălənžil, edăgg ăkokălăn iḍarăn-năsăn dăɣ, ălxer a săr-s dd-tirəwăn.»

¹⁶ Ălwăxla a-s a ăjjeen dăɣ-ăddinăt, unjay s-Ălənžil. A-wen-dăɣ a ăswănnăn ănnăbi Saya: «Emăli, a ija a-wa-dăɣ năssewăl, mi omănăn s-a-wa nəxattăb?»

¹⁷ Immun wa iɣallăsăn, a-wa s-isăl ăwadəm ihăn Ălənžil-wa-dăɣ nəxaṭṭăb dd-ifălăn Ălmasex, a iha.

¹⁸ Ak ajăn a-wen ălmăɣna-net a-s har ămăra-dăɣ, wăr-əslen kăl-Ălyăhud i-isălan-win-dăɣ? Ǝslan-asăn lab ed a-wen-dăɣ făw a dăɣ-innă əlkəttab n-Măssinăɣ: «Ăssewălăn imawayăn n-isălan făll-ărori n-ăkall iket-net, wăr t-təlla tamdujt dăɣ-ăddunya s-wădden təslʼ-asăn.»

¹⁹ Ad-kăwăn-səstənăɣ: «Tordam a-s isălan-wi-dăɣ, wăr tăn-əjrehăn kăl-Iṣrayil?» Ǝjrahăn-tăn lab. Ǝntăneḍ-en-dăɣ făw a-s innă ănnăbi Mosa s-tizarăt, innă Măssinăɣ: «Ad-dăɣ-wăn ăjăɣ tismiten făll-tamətte wărăt tămoos ta-nin, ẓəẓẓəkənẓărăɣ-kăwăn făll-tawset jam tawset n-ălžuhal.»

²⁰ Olăs daɣ ănnăbi Saya, iglă har innă: «Ăddinăt wi s-ibda, əkfan-ahi iroriyawăn-năsăn, əqqălăn-ahi-dd; wi s-ihənnin, wăr dăɣ-i ăkkulăn, ăsnăfalălăɣ-asăn-dd iman-in.»

²¹ Dăɣ-a-wa dd-iqqălăn kăl-Iṣrayil, ənta da a-wa dăɣ-săn innă Măssinăɣ: «Ǝẓẓalăɣ ăfuss-in har ăqqur i-tawset hi-tənkarăt, oseɣ-tăt a-wa tawset hi-tăsiɣărăt ulh-net, tawset săr-i tunjayăt.»