1 Timoti 3 - Tamasheq

Tumas n-emănnăhăḍ n-ălkănisăt

¹ A-wa măjrăd ănihăjjăn: ere irhăn tumast n-ărrabex-i n-emănnăhăḍ n-ălkănisăt, ilmədet a-s ăsidărhăn ămašal ăllullen.

² A-wen-dăɣ a făl, emănnăhăḍ n-ălkănisăt, ilzam ad-: Wăr t-iwer uḍlem, umaset ăhaləs n-iyyăt tamăḍt, ere ilan ălxal d-esăwe, inhəjjet d-semɣar, ijjəšet-t amăjaru, umaset ere ăddoben asəɣər n-ăddinăt,

³ wăr-itumaset emăsăw n-asməd wăla ere ihʼ ăjaḍ; umaset ere ăẓedăn, ăgg-ălxer, wăr-itumaset emărh n-aẓrəf.

⁴ Umaset ere ănnihăḍăn hullan dăɣ-ehăn-net d-ere s-ăsijădăn aratăn-net, ăssiimɣărăn-t dăɣ-hărăt iket-net

⁵ făl-a-s ere s-indar ad-ănnăhăḍ dăɣ-ejădăš-net, əndek əmmək wa s-mad-udabăt tăzert i-ălkănisăt n-Măssinăɣ?

⁶ Wăr-itumaset ere s-iket omăn i-ad-wăr t-irəmməs əttəkəbru, isəddărɣəl-t, iḍəw dăɣ-uḍlem wa dăɣ-oḍa Iblis iman-net.

⁷ Umaset ere ilan tajuhe tăhusket dat-ăddinăt wi n-ajăma wăren ămoos ălmăssexităn, dihen, wăr mad-itwəlkăh, wăr mad-iḍəw dăɣ-tănḍărbaten n-Iblis.

Imadhalăn n-ărrabexăn

⁸ Imadhalăn n-ărrabexăn-i n-imănnăhăḍăn n-ălkănisăt, ilzam-tăn ad-: Tăn-iwar sărho, wăr tumasnet ăddinăt n-əssin ilsawăn, əkrəšnet tənna tətbatăt, wăr săsakaynet tesăse n-asməd, wăr tămmăɣnet i-terše n-aẓrəf s-taxărbənit, ăsikărakăḍ a-wen.

⁹ Ǝddăraj n-immun wa tăn-issəlmăd Măssinăɣ dăɣ-măjrăd-net, əṭṭəfnet-t dăɣ-a-s wăr t-illa a dăɣ-əššakăn iman-năsăn.

¹⁰ Zəjjəzzənet-tăn ăddinăt, itwəlməd a-s wăr t-illa uḍlem tăn-iwarăn təzzar, əjjəšăn ămašal-wen-dăɣ.

¹¹ Tiḍeḍen daɣ, iwaret-tănăt sărho, wăr tănăt-ităjjăšet ănnămima, əkrəšnet ălxal ăhuusken, ăɣdəlnet dăɣ-hărăt iket-net.

¹² Imadhalăn n-emănnăhăḍ n-ălkănisăt, hak iyyăn, iyyăt tamăḍt, năhăḍnet dăɣ-aratăn-năsăn d-ijədšan-năsăn.

¹³ Ăddinăt-win-dăɣ, wi išla ămašal-năsăn s-iqqud, ad-ətwəsəmɣărăn, ad-ăbas tăn-ha tasăja dăɣ-təssəba n-immun-năsăn d-tassaɣt ta jăn d-Ɣisa Ălmasex.

Ǝddăraj wa dd-ănfalălăn

¹⁴ Timoti, tăkarḍe-ta-dăɣ, kattăbăɣ-ak-tăt-in dăɣ-a-s jarăɣ ăṭṭăma n-ad-kăy-in-asăɣ šik

¹⁵ măšan, kunta wăr-otes Măssinăɣ a-wen har hin-ăhojăɣ fălla-k, ărheɣ ad-hak-tilal tăkarḍe-ta-dăɣ i-ad-təlmədăd ălxal wa s-led s-ad-t-təṭṭəfăd, səssiɣədăd săr-s tamətte ta n-imumənăn n-Măssinăɣ, a-wen a t-ămoosăn ălkănisăt n-Măssinăɣ-i iddărăn, ənta a-s tămankayt ta təbnăt făll tidət, wăr t-illa daɣ a dăɣ-s tăt-madăn-ikkəs.

¹⁶ Tidət n-Măssinăɣ ta s-ărḍăn ăddinăt dăɣ-isălan n-əddăraj wa n-immun, ti-măqqărăt, a-wen a t-ămoosăn a-s: Ɣisa Ălmasex, ănfalăl-dd dăɣ-ăddunya, ămoos-dd ăgg-adəm, ənhăyăn-t daɣ dăgg-adəm, illăɣăt Unfas Šăddijăn s-idəm wa ikrăš dat-Măssinăɣ, ăjjunfăn dăɣ-s ănjălosăn, ătwăjjăn isălan-net i-inəẓẓulam, omănăn săr-s ăddinăt iyyăḍ, imməḍkăl s-išənnawăn s-edăgg wa n-ălxurmăt.