ZEPHANIAH 1 - Kathara Bible (BSI)

¹ Hezekiahwui naomayara Amariah, Amariahwui naomayara Gedaliah, Gedaliahwui naomayara Cushi, Cushiwui naomayara Zephaniahli, Judahwui awunga Amonwui naomayara Josiahwui thotli, Prohona kahāng tuina.

Proho wui Bichar Zimiksho

² “Okathuili khalei ot saikora ina sāshimitserhaora” da Prohona hānga.

³ Ina mila sāyurla sāthatserhaora; Ina yongkazata vānaobingla shamadruwui khaihla mashākmilakmara. Ina makaphā makhayā chi sākazamhaora; ina mikumoli okathuiwui eina katathaora, da Prohona hānga.

⁴ “Ina Judah kala Jerusalemli khalei saikorali pāng parra; kala ina Baal varebingli khokharuma shākkahaibing eina meoma̱li khokharuma pāngmonbingwui amingla;

⁵ shimtungli kānganinglaga zimik kachāng sirāli khokharumbing; Prohowui mingli mingzailala Milcomwui ming eina shākhi kasābing;

⁶ Prohowui thi kashurwui eina sana̱thui kahaibing, Proholi makaphābing kala awui pongli makhangathingbing katatserhaora.”

⁷ Proho VAREwui mangāli kasaikha pamlu; kaja Prohowui zimiksho nganaihaira; Prohona pha̱kaphayā akha ngarānhaira, kala awui mibingli tharchikathaira.

⁸ Kala Prohowui pha̱kaphayā zimiksholi— “Ina otva̱bing kala wungnaobingli, kala miyur khangateiwui kashankachon khangavaibinglila tandi mira.

⁹ Chithanghon khāmongpheili ngawokkakābing, kala akhavāwui shimli khangashao kala kateikazā eina kachipembing athumli ina tandi mira.”

¹⁰ Chithanghon Khaih Ngaveiwui eina akhon akha shāra, kakhane shimwui eina ringkhangā, panglāk kahai akhon phungrāwui eina shāra.

¹¹ Chaplu, O keinungwui thukkhameishong kapamabing! Kaja leihkhalon mi akhala maleiluimana; lupāsā khān katama mi saikorali katathaira.

¹² “Chitharan ina thaomei singlaga Jerusalemli phāra, khalatta ningyāngkhaung kala ningnganungda Prohona kaphā otla zakkashi otla masāmara, da kaphaninga athumli tandi mira.

¹³ Athumwui otbing ngaponkhuihaora, kala athumwui shimla khikha masā khavai ngasāhaora. Athumna shim sālala chili athumna mapamara; athumna drakhā yāmgui vālala drakhāra̱ khamang masamphangmara.”

¹⁴ Prohowui kahaka zimiksho chi nganaihaira, nganaihaira, thaklāk eina rārāli; Prohowui zimikshowui akhon chi khāshihai, pangshapa mi chi chili ngavao tarangra.

¹⁵ Malungkathurwui zimiksho chi chithangna, sipkasā eina reokharangwui zimikshona, sākakazam eina sākashimān zimikshona; muiyā eina tangmangting kahaiwui zimikshona,

¹⁶ raipan ngaveiphin kahai keinung kala hakkhamahā ngararphungli talla̱ kakhong eina raikhon khangavao zimikshona.

¹⁷ Ina mibingwuitungli sipkasā khuirāra, chithāda athumna mik khangapeo thāda zatra, khikhalajila athumna Proholi morei sāhaira; athumwui ashee chifa thāda heitha̱ra, kala asā seipaih thāra.

¹⁸ Prohowui malungkathui zimiksholi, athumwui lupāsānala, sinānala mangatangkhuirarmara, awui yuishātwui malungkhavāt alungli okathui saikora shimān ngasakra. Okathuili khalei saikora kashuirak hunkhawui alungli shimān ngasakra.