ZECHARIAH 7 - Kathara Bible (BSI)

Ningmakathar Kakhum

¹ Awunga Dariusna mungda zingkum khamate, kachāng kachiko kaja Chislev kachāng, zimiksho khamatethang, Prohowui tui Zechariahli rāhānga.

² Kaja Bethelwui mibingna Sharezer eina Regem-melechli ngasoda mi kachungkha Prohowui lukhamashan pokhavai chihoi,

³ kala saikorawui Prohowui shimli khalei pāngmonbing eina marānbingli ngahān khavai chihovāda hānga, “Zingkum hirankha ina sākharā hithāda, kachāng kaphangāli chapta khumluirala?”

⁴ Chieina saikorawui Prohona ili rāhānga;

⁵ “Ngalei chiwui mi saikora kala pāngmon saikorali hānglu, Nathumna kachāng kaphangā eina kashineli zingkum hangshini khumda kachap chi, iwui vangla?

⁶ Kala nathumna kazā tharan kala khamang tharan, nathum khalattawui vang kazā kala khamang maningmala?”

⁷ Jerusalemli kala kuimareida khalei keinung kachiva̱ kashakazā mavātlakla okthuikasā azingshongla, tampāklila pānkasa chi Prohowui tui, paokazatbingna hāngmihaikasā maningmala?

Raikathā, Kahāng Makhanganāwui Athei

⁸ Kala Prohowui tui chi Zechariahli rāhānga,

⁹ “Saikorawui Prohona kahāngna: Khamashung bichar sāmilu, lumashantheilu kala kachichāwui achināli ningshi ngaroklu,

¹⁰ ra̱meinaoli, avāva̱ makhaleibingli, kha̱mili, lah kachāmali marekhareklu; kala nathumwui alungli mi khipākhana achināwuitungli makaphā ning maphumhaialu.

¹¹ “Kha athumna manganāsanglakla hiksor nātengseng eina thuihaowa.

¹² Saikorawui Prohona awui Manglā eina achālakhawui marānbingli chihoda rākahāng tui kala ain chi shāpaishina da athumwui wuklung lunggui thāda makang ngasaka. Chiwui vang eina ashangva̱ Prohowui eina malungkhavāt rai.

¹³ Ina vaolaga athumna makashā thāda, athumna vaolala ina mashāmimana, da saikorawui Prohona hānga.

¹⁴ Kala sur kakhaning eina athumna matheikasā yur saikorawui ngachaili chaiyāngmi kahaina. Hithāda sāda athumna chiho kahai ngalei chi ramchohaoda khipākha zatung zatvā masāmana, kala ringkaphā apam chi ngaleikhamor sāngasak kahaina.”