ZECHARIAH 2 - Kathara Bible (BSI)

Tamkhavai Khara̱ Rākhamahā

¹ Kala ina mik yangkakā eina, yanglu, mi akha awui pāngli tamkhavai khara̱ singkasā thei!

² Chieina ina hānga, “Na kali vanikhala?” Kala ana ili hānga, “Jerusalem hi asān-aret kayākhakhala kaji tamkhui khavaina.”

³ Kala yanglu, ili khangazeka kazingrao chi mangāli rānganaiya, kala khangatei kazingrao akhala ali samphang khavai rai

⁴ kala ali hānga, “Yaronnaopā chili yongvāda ahānglu, ‘Jerusalemli mila, sha̱keila chungnā kahaiwui vang phākho makhalei kha̱nao thāda pānra.

⁵ Khikhalajila ina kuimareida meiwui phākho ngasāmira, kala ina awui alungli tekhamatei ngasāra’ da Prohona hānga.”

Shimli Hanung khavai Raikathāli Khuithui kahaibingli Kaho

⁶ Ah! ha! Atungshongwui ngalei eina yāmthulu, da Prohona hānga; kaja “Ina kazingram achikun matiwui masi thāda apam saikorali nathumli yaoyāngmi kahaina, da Prohona hānga.

⁷ Ho! Babylonwui naongalāva̱li ngasoda kapambing, nathum Zionli yāmvaulu.

⁸ Kaja saikorawui Proho china hithāda hānga, kaja awui tekhamatei china ili nathumli khangapona yurbingli chihokhavāwui thili hānga, kaja nathumli sākaza̱ a chi awui miktāli lumzailāk kahaiali sākaza̱na.”

⁹ “Yanglu, ina athumwuitungli ipāng khāngkāra kala athum athumwui rao sākasābingwui vang ngapon khavai ngasāra.” Chieina saikorawui Prohona ili kachihona kaji nathumna theira.

¹⁰ “Laa sāda mathānlu, O Zionwui naongalāva̱; khikhalajila yanglu, ina nathumli ngasopamra,” da Prohona hānga.

¹¹ Kala chithang yur kachungkhana Proholi rāngarumra kala iwui miyur ngasāra; kala ina nathumli ngasopamra, kala saikorawui Prohona nathumli ili chihokharāna kaji nathumna theira.

¹² Kala kathara ngaleili Prohona Judah hi awui shimluikatwui yar thāda khuira, kala Jerusalemli kapangkhuiluira.

¹³ Phasā khavai saikora, Prohowui mangāli chingri eina pamlu, kaja katharapamwui eina ana rāmihaira.