ZECHARIAH 14 - Kathara Bible (BSI)

Jerusalem eina Yurbing

¹ Yanglu, nawui eina ngaponkakhui ot chi nawui miktāli ngayarki kaji Prohowui zimiksho rārāli.

² Kaja Jerusalemli rai sākhavai yur saikorali ina kazipkhuira, kala keinung chi khuithuihaida, shimla ngaponkhuira, sha̱naobingla sākhamāngmihaora; keinung tangkhai raikathāli vāhaora, kha taikahaibing chili keinungwui eina makatatmara.

³ Chiwui thili rai sāthang khangarar thāda Prohona yurbingwuitungli ngarar khavai vāra.

⁴ Chithanghon awui phei Jerusalemwui mangāli zingshoshong khalei Olive Kaphungli nganingra; kala Olive Kaphung chi khani sāda zingsho eina zingtun ngachaili tampāk kahakva akhana ngakaipakhaora; chieina Phungrei chiwui tangkhai atungshong ngakhunshanghaora, kala tangkhai azingshong ngakhuntāhaora.

⁵ Nathumna phungrei khani sāda ngakai khavai tampāk eina yāmshokra; nathumna navā ngarāna Judahwui awunga Uzziahwui thotli neina̱ kakhanukli khayām thāda yāmra. Chiwui thili Proho nawui Vare rāra, kala katharabing ali ngasoda rāra.

⁶ Chithang kasik maleimara, phāmla matāmara.

⁷ Khangayā mavaimara (chi Prohona katheina), ngashun ngayā maleimara, ngazinla kahor leira.

⁸ Chithanghon kharinga tara̱ Jerusalemwui eina urshokra, tangkhaina zingshowui shamadruli, kala tangkhaina zingtungwui shamadruli longvāra; sikachāngwui thāda lumkachāngla chithāchingra.

⁹ Kala Prohona okathuiwuitungli awunga sāra; chithanghon Proho akhamāngra kala amingla akhamāngra.

¹⁰ Jerusalemwui azevāk khalei Geba eina thuilaga Rimmon eina tangda ngalei katonga chi tampāk akha onhaora. Kha Jerusalema, Benjaminwui Ngavei eina thuilaga kharewui ngavei vāshung, Achithek Ngavei vāpeida, kala Hananelwui Raikānphung eina thuilaga awungawui drakhāra̱ surkhavaipam vāshungda, awui apamli ngakheikhang eina leipapamra.

¹¹ Kala chili mi pānra, kaja chili khonkashi maleiluimara; Jerusalem mirai-sārai mavailuimara.

¹² Jerusalemli rai rākatā yurbing saikorali Prohona mimao rāngasaki kaji chi hina; athumna phei eina nganingda leilakha aphi shuihaora, mikla alungli kala athumwui malela khamorlungli shuihaora.

¹³ Kala chithang hakkhamahā khangachee akha Prohowui eina athumwuitungli tāra, ngasotnao eina ngasotnao pāng kāngarokra, akhana akhali ngasungra,

¹⁴ Judah eina tangda Jerusalemli ngararra. Kala kuimareida khalei yur saikorawui lan, sinā, lupāsāla kala kashankachon yāng eina kazipkhuira.

¹⁵ Kala hikathā mimao hi sigui kahaka yur, kateowa yur, ut, gadhā, kala apam chili khalei sāyur saikorawuitungli tāra.

¹⁶ Chiwui thili Jerusalemli ngarar khavai kharā yur saikora chiwui eina ringkasā mi kachiva̱na kum kachida saikorawui Proho, Awungali khorum khavai kāra, kala chumpha̱ phanit chi mayonra.

¹⁷ Kala okathuiwui shimkhur kachikathāna saikorawui Proho Awungali khorum khavai Jerusalemli makaakha athumli kazing marotāmimara.

¹⁸ Egyptwui shimkhurna athum khalatta marākaakha, chumpha̱ phanit makhamayon yurbingli rekakhareka mimao chi athumwuitungli tāra.

¹⁹ Chumpha̱ phanit mayon khavai makharā Egypt kala yur saikorawui tandi chi hina.

²⁰ Kala chithanghon siguiwui mareochungtheili “Proholi Kathara ngasāranu” da kapisangserra. Kala Prohowui shimli khalei hambing chi hanphut mangāli khalei tengkotbing thāserhaora;

²¹ Kala Jerusalem eina Judahwui ham kachiva̱ saikorawui Prohowui mangāli kathara ngasāda pha̱kaphayā mi saikorana rāda chieina pha̱kaphayā sā chi hangpaira. Kala chithanghon saikorawui Prohowui shimli leihkhalona mi akhala maleiluimara.