ZECHARIAH 10 - Kathara Bible (BSI)

Ngatangkhui khavai Proho wui Khangashit

¹ Kazing romi khavai Proholi polu, mayo kachāngwui zingrot atamli, zingrot muiyā ngakhuikhame Prohowui eina, miwui vang kazing rokhame, mi saikorali luiwui theishirai khameli.

² Kaja Teraphimna makakachanga tui matui, kameo khangasobing kapika, mang katheibingna kakapikmāng hānga, ninglum khavai hangphāphai. Chiwui vang eina mibingna yao thāda ma̱zata, yaokahoma maleithuda athumna khananga.

³ “Yaokahomabingli I malungvātshunhaira, kathānabingli ina tandi mira; kaja saikorawui Prohona awui yaonaobing, Judahwui shimkhurli saklāk eina yangmi, kala athumli maikhayā raiphungwui sigui kathā sāngasakra.

⁴ Athumwui eina pakra̱ akhoka, athumwui eina kachonshimwui karhui, athumwui eina raiwui malā, athumwui eina awunga shokra.

⁵ Athum ngarumlaga raili kapingabing thāda; yangkashebingli chānrei khangavāttungli nairorra; Prohona ngasokhamiwui vang athumna ngararra, kala athumna sigui katongbingli pa̱ngapā ngasakra.”

⁶ “Kala Ina Judahwui shimkhur pang ngasakra, kala ina Josephwui shimkhurli huimira. Athumli ina khuiungluishitra kaja ina athumli lumashana, kala athum ina mahorhailakrang kajebing thāra; kaja I athumwui Proho Varena, kala ina athumli ngahānkāmira.

⁷ Chieina Ephraim raikhoka kathā ngasāra, kala drakhāra̱ khamang thāda ringphāra. Anaongarāna thuitheida mathānra, athumwui wuklungna Proholi mathānkhailakra.

⁸ “Ina athumli machut eina hokhuilaga kazipkhuira, aja ina athumli ngatangkhui kahaina, kala achālakhawui kachung chiyākha kāshungra.

⁹ Athumli yurbingwui ngachaili chaivāhailala, ngalei katātāva̱wui eina athumna ili phaningungra, athumwui naongarāli ngasoda ringra kala latungra.

¹⁰ Ina Egypt ngaleiwui eina athumli shimli thānungra, kala athumli Assyriawui eina kazipkhuira; kala athumli ina Gilead kala Lebanonli khuiungra, apam mangaziranglakha eina tangda.

¹¹ Athumna Egyptwui shamadru kānkāra, shamadru mangaphao ngasakmara; Nilewui kathuthuk thenghaora. Kala Assyriawui lāngkaso chi nemngasakra; Egyptwui khānthing shimānhaora.

¹² Prohowui mangāli ina athumli pingngasakra, kala athumna awui mingli tekmatei ngasakra” da Prohona hānga.