WUNGVA̱-WUNGVĀ 9 - Kathara Bible (BSI)

Abimelech

¹ Jerubbaalwui naomayara Abimelechna Shechemli vāda ava̱va̱wui theisā kala shimkhur katongali hānga,

² “Shechemwui ruichumnao saikorawui miktāli hāngsanglu, ‘Nathumwui vang, Jerubbaalwui nao hangshini katongana khamung phameiraka, akhamāngna khamung phāmeirakhala? Iya nathumwui ashee kala asāna kaji nathumwui ningli haimilu.”

³ Kala ava̱va̱wui theisābingna, awui mahut eina, Shechemwui mibingli hāngkhamiwui vang, athumwui ning Abimelechli leihaoda athumna “A ithumwui achināna” da hānga.

⁴ Kala athumna Baal-berith shimwui eina lupāsā hangshini ngashaimi. Lupāsā chieina Abimelechna, awui thi kashura makānkhana kala maphākakhui mibing phāsanga.

⁵ Kala ana avāva̱wui shim Ophrahli unglaga achināngarā, kaja avāva̱ Jerubbaalwui naomayara athum hangshinili lungtung akhali shaothatserhaowa; kha apaisho Jothamna yāmngathumhaida ali matheithuwa.

⁶ Chieina Shechem kala Beth-millowui mi saikora kaziplaga, athumna vāda Shechemli shirimthing pheili Abimelechli awunga sanghaowa.

⁷ Pao chi Jothamli kahāng eina, ana Gerizim Kaphungli kānganinga, kala panglāk eina vaoda athumli hānga, “Ina kahāng hi nganālu, Shechemwui mibing nathum, chieina Varena nathumlila nganāmira.

⁸ Atam akhali thingrongbingna athumli mungkhavai awunga akhali tharchisinmi khavai kazipngaruma, athumna oliverongli, ‘Ithumwuitungli munglu’ da hānga;

⁹ kha oliverong china athumli hānga, ‘Iwui thaona varebingli kala mili khayāshi khangasak thāhailaga thingrongbingwuitungli suiung-suivā sarala?’ da hānghaowa.

¹⁰ Chieina thingrongbing china khaorārongli, ‘Na rālu, kala ithumwuitungli munglu’ da hānga.

¹¹ Kha khaorārong china, ‘Iwui kashima kala khamathā athei thāhailaga thingrongbingwuitungli suiung-suivā sarala?’ da hānghaowa.

¹² Thingrongbing china drakhārongli hānga, ‘Na rālu, kala ithumwuitungli munglu’

¹³ Kha drakhārong china, ‘Iwui atheina varebingli kala mibingli ningmathān khangasaka athei mamatheila ina thingrongbingwuitungli suiung-suivā sarala?’ da hānghaowa.

¹⁴ Chiwui thili thingrongbing china kashātrongli vāhānga, ‘Na rālu, kala ithumwuitungli rāmunglu.’

¹⁵ Kala kashātrong china thingrongbing chili, ‘Nathumna shitsangda nathumwui awunga sākhavai thao neomira jiakha, rālu kala iwui khaya̱li rāngayinkhuilu, maningakha kashātrongwui eina mei shoklaga Lebanonwui cedarthing eina tangda chuitāserhaoranu’ da hānga.

¹⁶ “Chiwui vang eina nathumna Abimelechli awunga kasang chi shitkasang kala khayakashiwui otsakna jiakha, kala Jerubbaal eina awui shimkhurli mathada yangmida leiakha kala awui otsakwui athishurda ali samikharān chi sākhamina jiakha—

¹⁷ kaja ishāvāna awui mirin chigatlaga nathumwui vang ngararda nathumli Midianaobingwui eina kankhui;

¹⁸ kala nathumna aja ishāvāwui shimkhurli mamayāmada awui naomayara hangshini lungtung akhali shaothatlaga ishāvāwui rao sha̱naona kapharā Abimelech, nathumwui theisā sāthuda ali Shechemwui awunga sāngasakhaira—

¹⁹ chieina nathumna Jerubbaalli kala awui shimkhurli khayāshida mashun eina kasāna jiakha, Abimelechwui vang ringphālu, kala anala nathumwui vang ringphāranu;

²⁰ kha chi maningakha, Abimelechwui eina mei shoklaga Shechem eina Beth-millowui mibing chuitāserhaoranu; kala Shechem mibing kala Beth-millowui eina mei shokta Abimelech chuitāranu.”

²¹ Kala chi hāngphunglaga Jothamna Beerli yāmvāhaowa, kala achinā Abimelechli khangacheewui vang chili apamchanghaowa.

²² Abimelechna Israelwuitungli kum kathum munga.

²³ Kala Varena Abimelech eina Shechemwui mibing ngachaili makathar manglā zangngasakta, athumna Abimelechli zakshilak eina sāhaowa.

²⁴ Jerubbaalwui naomayara hangshinili sakashi kasā kala shaokathatwui ashee Abimelechwuitungli, kala achinā ngarāli sāthat khavai kasatkasanga Shechemnaobingwuitungli tākhavai khangarānna.

²⁵ Kala ali ngathirai sākhavai Shechemnaobingna mi kaikhali phungreitonli rimpam ngasaka, kala athumna khaung-khavabingwui ot ngapaikakhui chi Abimelechli hānghaowa.

²⁶ Kala Ebedwui nao Gaalna, awui theisābingli ngasoda Shechemli vai, kala Shechemwui mina ali shitsanghaowa.

²⁷ Kala athumna luili drakhāthei aphākhuida surlaga morsonga, khorumshimlila akhorumlaga phāshak-phazāda Abimelechwuitungli manganākhangai tui kachungkha matui.

²⁸ Kala Ebedwui nao Gaalna hānga, “Abimelech khipāda, Shechemnaobing ithumna ali khi otram ngatha̱khavai leikhala? Jerubbaal eina awui otshina Zebulna Shechemwui avāva̱ Hamorli otram mangatha̱mala? Chithakha Abimelechli ithum otram ngatha̱ khavai khi leikhala?

²⁹ Mibing hi iwui pāngli khaleina jisi kaje! Ina Abimelechli khuishokhaora. Abimelechli ina, ‘Nawui raimi mataisangkhuilaga shoklu’” da hāngra.

³⁰ Keinungwui khamunga Zebulna Ebedwui nao Gaalwui tui chi kashā eina, a malungvāthaowa.

³¹ Kala ana Arumahli paome chihovāda Abimelechli ahāng ngasaka, “Yanglu, Ebedwui nao Gaalli ngasoda awui theisābing Shechemli rālaga keinung hili nali makhamayā tui kasotta lei.

³² Chieina ara na eina nali ngasoda khaleibing, ngayāshong luili arimhaolu.

³³ Chieina ngathor zimik shokkhaleoda, thaklāk eina keinungli kharomzanglu, chili a eina ali khangayur athum shokkhangarok tharan otsakna khamayā athishurda nathumwui sākapai saulu.”

³⁴ Abimelech eina ali khangaso mi saikora, ngayā ngakarthuida zatlaga, khum mati sāda arimpamhaowa.

³⁵ Kala Ebedwui naomayara Gaalna ayar shokta keinungwui ngavei zangkhavai chili nganinga; kala Abimelech kala ali ngasoda rimpam kasābingna kharomshokrāsai.

³⁶ Kala Gaalna mibing chi kathei eina Zebulli hānga, “Yanglu, phungreitonwui eina mi kachungkha tārāda lei!” kala Zebulna ali ngahānkai, “Kaphungbingwui khaya̱ chi nana mi thāda katheina.”

³⁷ Gaalna hangluiya, “Yanglu, mi kaikhana ngalei chiwui alungthungwui eina tārāda lei, kala kaikhana Meoworbingwui Shirimthingwui eina tārāda lei.”

³⁸ Zebulna hānga, “Ara nana matuishok kahai, Abimelech khipāda, ithumna ali otram ngatha̱miralā da kahāng na maningmala? Nana kachipat mibing chi hi maningmala? Ara shokta athumli angararulu.”

³⁹ Kala Shechemwui mibingli Gaalna thānlaga Abimelechli shokngarara.

⁴⁰ Kala Abimelechna kakharom eina yāmhaowa, kala kachungkhava ngavei zangkhavai ngalemli khamā za̱haowa.

⁴¹ Kala Abimelechna Arumahli pamhaowa, kala Zebulna Gaal kala awui theisābing kashamhaida athum Shechemli mapamluithuwa.

⁴² Akhama kathā mibingna luili vai; kala chi Abimelechli hānghaowa.

⁴³ Ana awui raimi khuirāda khum kathum sālaga luili rimpamhaowa. Kala ana yangkhavā eina mibing keinungwui eina shokkharā chi theida ana shokngararda athumli sāthata.

⁴⁴ Abimelech kala awui raimi khumkhali ngasoda Shechembingwui ngaveili vanganingkhamda leilakha, raimi khum khani china raiphungli vāda chili khaleibingli shaothata.

⁴⁵ Kala Abimelechna keinung makhuiranglakha eina tangda chithang langpongda ngarara, mila kachungkha sāthata; kala ana keinung chi kailaga machi chaimihaowa.

⁴⁶ Shechemwui Raikānphungli khaleibingna pao chi shālaga, El-berithwui raipanli ayāmsangserhaowa.

⁴⁷ Shechem Raikānphungwui mi hupva kazipta lei kaji Abimelechli hānghaowa.

⁴⁸ Abimelech kala awui khangasobingla Zalmon Kaphungli kai; kala Abimelechna ngahā akha singlaga maharthing tankha katatkhui, kala ayartuili ngava̱laga awui mibingli hānga, “Ina kasā nathumna kathei thāda thākta nathumla sakhuiserlu.”

⁴⁹ Chieina mi kachiva̱ kachichāwui maharthing tankharip khuiphunglaga Abimelechli shurda ngaveili akhorhailaga mei thota, chi eina Shechem Raikānphungli khalei mibing thiserhaowa, sha̱naola, mayarnao thingkha sha̱kha thihaowa.

⁵⁰ Chiwui thili Abimelechna Thebezli rairum asālaga khuihaowa.

⁵¹ Kha keinungwui alungli khangazipa dolan akha leisāda mibingna chili ayāmsangserhaowa, sha̱naola mayarnaola chili ayāmsangserhaida athum khalatta khāmong takshānhailaga dolanwui atoli kāpamhaowa.

⁵² Kala Abimelechna dolan chi mei thottā khavai akhanganai eina,

⁵³ sha̱nao akhana Abimelechli chakrikui eina horda akui kaihaowa.

⁵⁴ Ngalangda awui chāngvei phungkhameli hokhuilaga, “Thakta nawui raighai sutshokta ili tothathaolu, chi maningakha mibingna ili, ‘Sha̱naona shaokathatna’ jipaishina” da kasoi.

⁵⁵ Kala Abimelech thihaira kaji kathei eina Israelwui mibing kachichā ramli yāmyik unghaowa.

⁵⁶ Hithāda Abimelechna avāva̱wui naomayara hangshinili shaokathatwui makaphā kasā chi Varena hāngsangmi;

⁵⁷ kala Varenala Shechem mibingwui makhayā otsak saikora chi athum khalattawuitungli tāngasaka kala Jerubbaalwui naomayara Jothamwui khonshāt chila athumwuitungli tai.