WUNGVA̱-WUNGVĀ 6 - Kathara Bible (BSI)

Gideonli Hokakhui

¹ Israelwui mibingna Prohowui mangāli makhayā ot sai; chiwui vang Prohona athumli Midianaobingwui pāngli kum shini horsangmihaowa.

² Kala Midianaobingwui pāngna Israelli yuikahaiwui vang, Israelwui mibingna kaphungphungli khalei lungkhurkhur ngaveiveili shim asāpama.

³ Kaja Israelwui mibingna lui vāsang kajida Midianaobing kala Amaleknaobing kala zingshoshongwui mibingna athumli rai rāsai;

⁴ athumna Gaza luinganai vāshungda rairum sālaga lamwui luivāt eina samkaphang sākazamihaida kashakazāla, sha̱keila, Israelli akhanida mataimimana.

⁵ Kaja athum sorkhangasai khaohli ngayāda kachonshim phunglaga sha̱keila thānrai; mila, utla shānla makhuimana; athumna rāzang ngasha̱da lam saikora ngapha̱mihaowa.

⁶ Kala Midianaobingwui vang eina Israel mibingwui mirin ngazanlakhaowa; kala Israelwui mibingna Proholi ngachonmi khavai ngakaowa.

⁷ Midianaobingli ngacheeda Israelwui mibingna Proholi khangakao tharan,

⁸ Prohona Israelwui mibingli marān akha chihovai, kala ana athumli hānga, “Proho, Israelwui Varena hithāda hānga: Ina nathumli Egyptwui eina thānshokmi, kala nathumli raopamwui eina thānshokmi;

⁹ kala ina nathumli Egyptnaobingwui eina, kala nathumli rekakhareka pāngwui eina kankhuimi, kala nathumwui mangāli athumli kashamshokmi, kala athumwui ngalei nathumli mi,

¹⁰ kala ina nathumli hānga, ‘I Proho nathumwui Varena; nathumna pamda khalei ngalei, Amornaobingwui varebingli makhorumpaimara.’ Kha nathumna iwui tui makhuisangthuwa.”

¹¹ Chitharan Prohowui kazingrao china Ophrahwui shirimthingpheili rāpamzanga, chi Abiezpa Joashwui lui sāthuihaoda anaomayara Gideonna drakhāra̱ surkhavaili, Midianaobingna mathei khavai ngathumda zaisai.

¹² Kala Prohowui kazingrao china ali samphangda hānga, “Rai kapinga mi, nali Prohona ngasomida lei.”

¹³ Chieina Gideonna ali hānga, “Amei, malung mavātmialu, kha Prohona ithumli ngasomiya jiakha kathāda hikathā saikora hi ithumwuitungli rāshokhao? Ishāvā ngarāna awui matakhak kahai saikora ithumli hāngkahai, ‘Egyptwui eina ithumli Prohona mathānshokmimala?’ da hāngchithei. Kha ara Prohona ithumli horhaida Midianaobingwui pāngli sangmihaira.”

¹⁴ Kala Prohona ali ngareivāda hānga, “Nawui yang hieina ngasoda vālu; Midianaobingwui eina Israelwui mibingli akankhuilu; ina nali kachiho maningmala?”

¹⁵ Ana ngahānkai, “Proho, ina Israelli kathāda ngatangkhuirakhala? Yanglu, Manasseh shang alungli iwui shangna teomeikapa, kala iwui shimkhurlila ina ngazanmeikapa.”

¹⁶ Kala Prohona ali hānga, “Ina nali ngasomida lei, Midianaobing chili nana mi akha shaokathat thāda shaothatshapra.”

¹⁷ Ana hānga, “Nana ili lumashanmiakha ili khamachut akha chitheimilu, chieina nana kahāngna kaji ina theikhuira.

¹⁸ Ina ot akha ungkhuilaga nali makhuirāmiranglakha eina tangda makathuimihaifalu.” Ana hānga, “Nana malatrāranglakha eina tangda ina ngaraisāra.”

¹⁹ Chieina Gideonna ashiwui shimli unglaga yaonao akha taithata, kala mathir khawok makazang khamuila sākhui. Sā chi luk akhali khuiphunga, kala hanra̱ ham akhali khuiphungda chibing chi shirimthingpheili ali khuivāmi.

²⁰ Varewui kazingrao china ali hānga, “Sāla, khawok makazang khamuila ngalungtung chili hailu, kala ara̱ chi heirorlu.” Kala ana chithāda sai.

²¹ Chiwui thili Prohowui kazingrao china apāngli kasing khāmshuiton chieina sā kala khamui chili saza̱khaleoda ngalungwui eina mei shoklaga saikora chi chuikhup tāhaowa, kala Prohowui kazingrao chi awui mikyanwui eina shimānhaowa.

²² Prohowui kazingraona kaji kathei samphanghaoda Gideonna hānga, “Iyavo, O Proho VARIVARA! Ara ina Prohowui kazingraoli mai eina mai yangngasungda kathei samphanghaira.”

²³ Kha Prohona ali hānga, “Nali chingrihairanu, mangacheealu; na mathimara.”

²⁴ Apam chili Gideonna Proho wui vang hanphut akha sākhuida, “Proho hi chingri kahaiana” da phokmi. Aja eina tangda Abiez ngalei Ophrahli leichingda lei.

²⁵ Chithang ngayā Prohona ali hānga, “Navāwui sei, mukkā kakhane, kum shini kākahaiya chi khuilaga, navāwui Baalli pha̱khavai hanphut chi ngakhuntekhaolu; kala chiwui ngalemli khalei Asherahwui chila sātekmihaolu;

²⁶ kala nawui Vare Prohowui vang ngalei kajuitungli hanphut akha sakālu, kala ngalung akhawuitungli ngalung akha khorlaga mukkā chi rikkatā kachigat sāda pha̱lu; laga nana ta̱tekki kaji Asherah tarung chi eina thing sālu.”

²⁷ Chieina Gideonna awui rao tharā hokhuilaga Prohona kakaso chi tākam eina sai; kha ashili, kala keinung chiwui yaruili ngacheenahaida ngashun masālengmada ana ngayāshong sai.

²⁸ Keinungwui mibing ngathorthakva̱ kathui tharan, yanglu, Baalwui hanphut sākhaihairasai, Asherah tarungla ta̱tekmihairasai; kala mukkā kakhane chi kadhara sākahai hanphutli pha̱hairasai.

²⁹ Kala athum akha eina akha, “Hi khipāna kasākhala?” da ngathing ngaroka. Naoda ngathingthingda kaphā eina “Hi Joashwui naomayara Gideonna” da athumna hānga.

³⁰ Chieina keinungwui mibingna Joashli hānga, “Nanaoli khuishoklu, a thira, kaja Baalwui hanphut sakhaimihailaga chiwui ngalemli khalei Asherah tarungla ta̱tekmihaira.”

³¹ Kha rāngaherda ali makhamayā saikora chili Joashna hānga, “Nathumna Baalwui vang nganingrala? Maningakha awui vang ngararmirala? Awui vang khanganingbing chili ngathorma shaothatra. A vareakha, awui hanphut sakhaimi kahaiwui vang ana ngararranu,”.

³² Chiwui vang chithang eina thuida Gideonli Jerubbaal hohaowa; chiya, “Baalna ali ngararranu” da kahāngna, kaja ana Baalwui hanphut ngakhuntekmihaowa.

³³ Chiwui thili Midianaobing, Amaleknaobing kala zingshoshongwui mibing Jordan kānlaga Jezreel tampākli rairum rāsai.

³⁴ Kha Prohowui manglāna Gideonli ngasomida ana talla̱ khonglaga ali shurkhavai Abieznaobingli hokhui.

³⁵ Kala Manasseh hupva̱li ana paomebing chiholaga ali shurkhavai ahokhuiser ngasaka. Kala Asherli, Zebulunli, Naphtalili ana paomebing chihovāserda athumna ali kāsamphanga.

³⁶ Chieina Gideonna Vareli hānga, “Nana hāngkahai thāda ipāng eina nana Israelli huikhuira jiakha,

³⁷ yanglu, vatpom akha ina lanpumli haihaira; vatpom himāngli ikra̱ tarorlaga apam khangatei thengcheng haiakha, nana hāngkahai thāda ipāng eina nana Israelli kankhuishapra da theira.”

³⁸ Ana ngathor kathui eina chithāda leisai; kala ana chi surkhayang eina tara̱ kokluikha khui.

³⁹ Chiwui thili Gideonna Vareli hānga, “Malung mavātmialu, akhashidamāng pohaoga; vatpom hi akha shida machutkhuiluiga, khangatei saikorali ikra̱ tāserlaga vatpom himangli matā ngasaklu, da kapona.”

⁴⁰ Kala awui kapo athishurda chithang ngayā Varena sāmi, kaja vatpom chimāng thengchenghailaga ngaleitung saikora ikra̱ tākmithaisai.