WUNGVA̱-WUNGVĀ 4 - Kathara Bible (BSI)

Deborah eina Barak

¹ Kala Ehud thikahaiwui thili Israelwui mibingna Prohowui mangāli makhayā otsak sāluishita.

² Kala Prohona athumli Hazorli mungkasā Canaanwui awunga Jabinwui pāngli horsangmihaowa; awui raimiwui raithānali Sisera hoi, a Harosheth-ha-goiimli pānsai.

³ Chiwui thili Israelwui mibingna Proholi ngachon khavai ngakaowa; kaja awui mari eina kasā siguigari shāchiko leisai kala Israelwui mibingli sāshilak eina kum maga̱ rekhareksai.

⁴ Chitharan Lappidothwui preiva̱, Deborah, marānva̱na Israelli bichar sāmisai.

⁵ Ana Ephraimwui kaphungram Ramah eina Bethel ngachaili khalei Deborahwui khaneirong azingli pamda bichar sāmi khavai Israelwui mibingna awuili rāsera.

⁶ Ana Naphtaliwui Kedeshli khalei Abino-amwui naomayara Barakli chihaovai, kala ali hānga, “Proho, Israelwui Varena nali kasoli, ‘Vālu Naphtali shang eina Zebulun shangwui mi thingtharā Tabor Kaphungli kazipkhuilu.

⁷ Kala Jabinwui raimiwui raithāna Siserali, awui siguigari kala raimi thānda ina khuishokmira, kala Kishon kongli nali rāngarok ngasakra; kala nawui pāngli ina horsangmira.’ ”

⁸ Barakna ali hānga, “Na ili ngasovara jiakha ila vāra; kha nana ili mangasovaakha ila mavāmara.”

⁹ Chieina ana hānga, “Ina nali ngasovālakra; chithalala nana vāki kaji shongfa chili na mai makāmara, kaja Prohona Siserali sha̱nao akhawui pāngli horsangmira.” Chieina Deborahna Barakli ngasoda Kadeshli vai.

¹⁰ Barakna Naphtali eina Zebulunwui mi thingtharā hokhuida Kadeshli ali shurvai, kala Deborahla ali ngasokai.

¹¹ Chitharan Moseswui awova̱ Hobabwui ara̱-azā Ken shangwui Heberna amāng ngateida Za-anannimwui alung Kadesh ngalemli khalei shimrimthing pamli awui kachonshim sāpamsai.

¹² Abino-amwui naomayara Barakna Tabor Kaphungli kāhaira kaji Siserali rākahāng eina,

¹³ Siserana awui mari eina kasā siguigari shāchiko, kala raimi saikora hokhuilaga Harosheth-ha-goiimwui eina Kishon kongli vai.

¹⁴ Kala Deborahna Barakli hānga, “Vaulu, kaja, aja Prohona Siserali nawui pāngli horsangmi kahaina. Prohona nawui mangāli rizatta khalei maningmala?” Chieina Barakna thānda raimi thingtharā awui thi shurphungda Tabor Kaphungwui eina tunga.

¹⁵ Kala Prohona Barakwui mangāli Sisera kala awui siguigari saikora, raimi saikorali yuichao ngasakhaida raighai eina sāthatserhaowa; kala Siserana siguigariwui eina tungda phei eina yāmhaowa.

¹⁶ Kala Barakna siguigaribing eina raimibingli Harosheth-ha-goiim eina tangda kharomvāda Siserawui raimi saikora sāthatserhaowa; mi akha eina tangda mataimimana.

¹⁷ Kha Siserava phei eina yāmhaowa, kala Kenpa Heber preiva̱ Jaelwui shimli ayāmsanga; kaja Hazorwui awunga Jabin eina Kenwui Heber ani chingri eina pānsai.

¹⁸ Kala Jaelna Siserali shokngarokta hānga, “Ngareirālu, iwui amei, iwuishong rālu, mangacheealu.” Chieina ana awui kachonshimli ayāmsanga, kala ana ali chonham eina farormihaowa.

¹⁹ Kala ana ali hānga, “Tara̱ khamimanglu, I ra̱changhaowa.” Chieina ana seina̱ sāhuiham shoda ali shimana, kala ali farorhaowa.

²⁰ Kala Siserana ali hānga, “Kachonshimwui khāmongli nganinglu, laga kalikha kachikathā mi rāda nali, ‘Khipākha leila?’ jiakha, maleimana jihaolu.”

²¹ Kha, chothaida piphup kahai chitharan, Heber preiva̱̱ Jaelna kachonshimwui thinghun khamarik akha kala yāmkarnao khuilaga awui najeeli thāshāna, kala ngaleili ngaruiut ngasakta chieina a thihaowa.

²² Kala yanglu, Barakna Siserali kharomkharā eina, Jaelna ali shokngaroka, kala “Ralu, nana kapha mi chili ina chitheira” da hānga. Chieina ana awui kachonshimli zangkhayang eina, chili najeeli thingshun khamarik eina ngaphitshanlaga Sisera chili thihaisai.

²³ Chithāda chithang, Varena Israel mibingwui mangāli Canaanwui awunga Jabinli maishi ngasaka.

²⁴ Kala Israelwui mibingna Canaanwui awunga Jabinwuitungli sāshikhangai sāshida sai, kala Canaanwui awunga Jabinli mashimānranglakha eina tangda athumna chithada sai.