WUNGVA̱-WUNGVĀ 20 - Kathara Bible (BSI)

Israelna Rai Sākhavai Khangarān

¹ Chiwui thili Israelwui mi saikora, Dan eina thuilaga Beer-sheba vāshungda, Gileadwui lam zanglaga, mi ashang akha sāda Prohowui mangāli Mizpahli kazipa.

² Israel shang kachiva̱wui wungnaobing Varewui mibingli ngasoda kazip chili azanga, chāngvei kazei kaphunga raimi lakh mati rai.

³ (Israel mibing Mizpahli kazip khavai kāhaira kaji Benjaminnaobingna shāhaowa). kala Israelwui mibingna hānga, “Ithumli hānglu, makhayā ot hi kathāda rāshokhaokhala?”

⁴ Kala Leviwui mi, shaothat kahaia preiva̱wui gahara china hānga, “Benjaminli khalei Gibe-ahli iwui angashirva̱ ini ngayā apisang khavai vai.

⁵ Kala Gibe-ahwui mibingna ngayāshong shim chi rākuinamhailaga ili shaothat khavai sai, kala iwui angashirva̱li rātukkhuilaga makhangatun ot sāda thihaowa.

⁶ Chiwui vang ina asā rimkazamlaga Israelli khalei shimkhur kachida yaokharāna; kaja Israelwui alungli athumna ningkakachai mitun makhangatun ot sāhaira.

⁷ Yanglu, Israelwui mibing, nathum saikorana, machuklaga nathumwui kaphaning hānglu.”

⁸ Chieina athum saikora ngakarthuida ningkha sāda hānga, “Ithum khipākha kachonshimli, kala shimli maungpaimana,

⁹ kha Gibe-ahli hithāda sāra: kalā yanglaga vāngararra,

¹⁰ kala ithum Israel shang saikorali shang akhawuili mi tharārā, thingkhawuili shākha, thingtharāwuili thingkha da khuilaga mibingwui vang kashakazā phungrā ngasakra; kala Israelwui alungli Benjaminwui Gibe-ahna ningkakachai mithit kashong kasāwui vang athut hāngsangra.”

¹¹ Chithāda Israel saikora ningkha sāda keinung chili ngarar khavai kazipa.

¹² Kala Israel shang saikorana Benjamin shangli pao chiphunvāda hānga, “Nathumwui alungli makaphā makhayā otsak leikahai hi katha kahaikhala?

¹³ Chiwui vang eina ara Gibe-ahwui shuikhangarui mibing chi khuishoklu; chithāda sāda ithumna athumli shaothathailaga Israelwui alungli makaphā saikora shimān ngasakphalungra.” Kha Benjaminnaobingna achinā ngarā Israelwui tui makhuisangmithuwa.

¹⁴ Kala Benjaminwui mibingna khokkha sāda shokngaroklaga Israelwui mibingli rai sākhavai Gibe-ah keinungli kazipa.

¹⁵ Kala chithang Benjaminnaobingna athumwui keinungbingli khalei raighai singkathei mi thing maga̱da tharuk kapangkhui, chiwuitungli Gibe-ahwui māng eina hākakhui mi shāshini kapangkhui.

¹⁶ Athum saikora hiwui ngachaili uithap mi hākakhui shāshini zangsai; athum chiya sampanaolila mangapatla shairong eina kapza̱kashapa mi mānga.

¹⁷ Kala Israelwui mi saikora Benjaminwui mi mazangla, raighai singkathei mi lakh mati kapangkhui; athum hi raimi mānga.

Benjaminnaobingli Rai Kasā

¹⁸ Israelwui mibingna Bethelli vai, kala Vareli angahāna, “Benjaminbingli ngarar khavai khipashi shang vārikaprakhala?” Kala Prohona, “Judahna vārikaplu” da hānga.

¹⁹ Chieina Israelwui mibingna ngathorshong zatphokta Gibe-ahli rairum asāpama.

²⁰ Kala Israelwui mibingna Benjaminnaobingli ngarar khavai vāda Gibe-ahli angarānhaowa.

²¹ Benjaminnaobingna Gibe-ahwui eina shokta Israelwui mi chithang thing maga̱da khani pitāhaowa.

²² Kha Israelwui mibingna, khangachee maleilakla, kharethangwui tākam eina kakhane thangla angarānluishita.

²³ Kala Israelwui mibingna Prohowui mangāli kāda ngazin eina tangda chapsasui Proholi “Ichināngarā Benjaminnaobingli rai masāluirakhala?” da ngahāna, kala Prohona hānga, “Athumli angararlu.”

²⁴ Chieina Israelwui mibingna, kakhanethang Benjaminnaobingli ngarar khavai valui.

²⁵ Kala kakhanethangla Benjaminnaobingna Gibe-ahwui eina shokngararda Israelwui raighai singkathei mi thing tharāda chishat pitā ngasakhaowa.

²⁶ Chiwui thili Israelwui mi saikora, raimi katonga Bethelli kāda chapa; athumna Prohowui mangāli pamda ngazin eina tangda kakhum eina rikkatā kachigat kala ningyatchigat Proholi chigata.

²⁷ Kala Israelwui mibingna Proholi (kaja atam chili Varewui tuingashit oko chi apam chili haihaida,

²⁸ Aaronwui nao Eleazarna kapharā Phinehasna otram ngatha̱misai), ngahāna, “Ichina Benjaminnaobingli rai saluira̱ka thahaorakhala?” Prohona hānga, “Vālu; kaja akhama ina athumli nathumwui pāngli horsangmira.”

²⁹ Chieina Israelna Gibe-ahli kuimareida ngathirai sākhavai vāpama.

³⁰ Kala kakathumathang Israelwui mibingna, ngathānthangwui thāda Benjaminnaobingli ngarar khavai raipam akhuiluishita.

³¹ Kala Benjaminshina mibingli shokngararda keinungwui eina katāva̱li kharomvāhaowa kala kharethangwui vākhavai chanreili shaothatluida, Bethel shong Gibe-ahshong vākhavai tampāklila chanreilila Israelwui mibing thumrā sha̱kha shaothata.

³² Kala Benjaminnaobingna, “Kharewui thāda athumli kupmihaira” da hānga. Kha Israelwui mibingna hānga, “Ithum yāmhaida athumli keinungwui eina chanreili shokserhaoranu.”

³³ Chieina Israel mibing saikora chiwui eina thuihaida Baal-tamarli ungngarānhaowa. Kala Gebawui zingtunshong ngathirai kasā Israelwui mibingna apamwui eina muishoka.

³⁴ Kala Israel katongawui eina hākakhui mi thing tharāna Gibe-ahli sakchanglak eina shokngarara; kha Benjaminnaobingna ashi maishiki kaji atam nganaihaira kaji maphaningsalakmana.

³⁵ Kala Prohona Israelwui mangāli athumli maishi ngasakta Benjaminnaobingli yuihaowa; kala Benjaminwui raighai kasing thing maga̱da phangā kala shākha Israelwui mibingna chithang sāshimānmihaowa.

³⁶ Chieina Benjaminshi maishihaira kaji ashi khalatta theihaowa. Israelwui mibingna Benjaminshili apong chikākhamina, khikhalajila Gibe-ahli ngathirai kasābing chili athumna ning horsanghaowa.

³⁷ Kala ngathirai kasābing china hengsāda Gibe-ahli muishokta keinungli khalei saikora raighai eina sāthathaowa.

³⁸ Israelwui mibing eina ngathirai kasābingna theingarok khavai machut chiya, keinungli meikhut kashok tharan Israel mibingna ngararphokki kajina.

³⁹ Chitharan Benjaminshina rai sāphokta mi thumra sha̱kha sāthat kahai eina athumna hānga, “Ithumwui mangāli kachangkhat kharewui khangarar thāda athum mutluihaira.”

⁴⁰ Kha keinungwui eina khudam chi meikhut pemda kashok eina, Benjaminnaobingna khanukvāk kapeikhaung eina, yanglu, keinung katonga kazingram kāshungda meikhut pemhairasai.

⁴¹ Chieina Israelwui mibingna ngareiungda ngararkaphok eina Benjaminshi ning shimānhaowa, kaja kashimān chi nganaihaira da athumna theihaowa.

⁴² Chiwui vang eina athumna Israelnaobingwui eina lamhāngshong yāmvā khavai sai, kha raina mayāmpaithuda keinungwui eina shokkhangaroka Israelwui mibingna athumli alungli sāshimānhaowa.

⁴³ Benjaminwui mibingli sathatta athumna Nohahwui eina thuilaga Gibe-ah ngalei kāroda khalei zingshoshong vāshungda kharomvai.

⁴⁴ Benjaminwui rai kapinga raimimāng thing tharāda chishat pitai.

⁴⁵ Kala athumna Rimmonwui lunghārpam lamhāngshong yāmvai; kha chanreili mi thing phangā yortāhaowa, kala Gidom vāshungda kharomvai, chili thingkhani sāthata.

⁴⁶ Chieina Benjaminwui mi chithang kathi, raighai singkathei thing maga̱da phangāna, athum chiya rai kapinga raimimānga.

⁴⁷ Kha athum shatharukva lamhāngshong yāmvāda Rimmonwui lunghārpamli kachāng mati apama.

⁴⁸ Kala Israel mibingna latvāluilaga Benjaminshi mila, sha̱keila, athumna samkaphang yaitupthathaowa, kala athumna khavā keinung kachiva̱la mei thottamiserhaowa.